മരുന്ന് തോല്ക്കുന്നിടത്ത് നൃത്തം

ബാംഗ്ലൂരിലെ ഒരു യാഥാസ്ഥിതിക തെലുങ്കുകുടുംബാംഗമാണ് സുജാത. ഭര്‍ത്താവ് വെങ്കിടേഷ് ജനീവയില്‍ ഒരു ടെലികോം കമ്പനിയുടെ ഐടി വിഭാഗം മേധാവിയാണ്. ജനീവയിലെത്തിയ സുജാത യാദൃച്ഛികമായി ഡോ. ജാക്വസ് ആര്‍പിനുമായി സംസാരിച്ചതാണ് ജീവിതത്തിലെ വഴിത്തിരിവായത്. പൗരസ്ത്യ കലാരൂപങ്ങള്‍ ആധുനികചികിത്സാരീതിയില്‍ എങ്ങിനെ ഉപയോഗിക്കാന്‍ കഴിയുമെന്നതിനെക്കുറിച്ച് ഗവേഷണം നടത്തി വരികയായിരുന്നു ഡോ. ജാക്വസ് ആര്‍പിന്‍. ഡോക്ടര്‍ ഒരു നര്‍ത്തകിയെ അന്വേഷിച്ചുനടക്കുകയായിരുന്നു. അദ്ദേഹത്തിന്റെ ഗവേഷണനിഗമനങ്ങള്‍ രോഗികളില്‍ പരീക്ഷിക്കാന്‍ കഴിയുന്ന ഒരു നര്‍ത്തകിയെ. സുജാതാ വെങ്കിടേഷില്‍ ഡോക്ടര്‍ ആ നര്‍ത്തകിയെ കണ്ടെത്തി.