അരുന്ധതിയുടെ യുദ്ധം

ഒരു ദിവസത്തെ ജയില്‍വാസത്തിന് ശേഷം പുറത്തു വന്ന അരുന്ധതി കോടതിയ്ക്കെതിരെ കൂടുതല്‍ ചെളിവാരിയെറിയുകയും ചെയ്തു. അരുന്ധതിയെ അടക്കിനിര്‍ത്താന്‍ കഴിഞ്ഞില്ലെന്ന് മാത്രമല്ല, അഭിപ്രായസ്വാതന്ത്യ്രത്തിനെ ഹനിയ്ക്കുന്ന തരത്തില്‍ ഒരു വിധി നടത്തിയതിന് സുപ്രീം കോടതിയുടെ യശസ്സ് അല്പം കുറഞ്ഞോയെന്ന് സംശയവും ബാക്കിയായി.

അരുന്ധതി റോയ്ക്ക് ജയില്‍ ഒരു പ്രശ്നമല്ല. 16ാം വയസ്സില്‍ വീടുവിട്ട് ദില്ലിയ്ക്ക് വണ്ടി കയറിയ അരുന്ധതി ആദ്യം താമസിച്ചത് തകരഷീറ്റുകൊണ്ട് മേഞ്ഞ ഒരു അഴുക്കുമുറിയിലാണ്. ദില്ലിയില്‍ ആര്‍കിടെക്ചറിന് പഠിക്കുന്ന കാലത്ത് ഗോവയില്‍ കുറേ നാള്‍ അലഞ്ഞിട്ടുമുണ്ട്. അതൊക്കെ പോട്ടെ, ബുക്കര്‍ സമ്മാനം ലഭിച്ച ശേഷം ലോകപര്യടനത്തിലായിരുന്നപ്പോള്‍ വന്‍കിട ഹോട്ടലുകളില്‍ അരുന്ധതിയ്ക്ക് താമസിക്കേണ്ടിവന്നു. ഈ ഹോട്ടല്‍ മുറികളിലെ ആഡംബരങ്ങളെപ്പറ്റി അരുന്ധതി പറഞ്ഞത്: അസംബന്ധമായ ആഡംബരം എന്നാണ്.