സൂക്ഷിക്കുക കുഞ്ഞ് നിങ്ങളുടേതാണ്...

കോട്ടയത്തെ ഒരേഴു വയസുകാരിയുടെ കഥ കേള്‍ക്കൂ. വൈകുന്നേരം മകളെ കുളിപ്പിക്കാന്‍ അമ്മ എണ്ണതേച്ചു നിര്‍ത്തിയിരിക്കുമ്പോള്‍ അടുത്തുളള കടക്കാരന്‍ കുട്ടിയെ കടയിലേയ്ക്കു ക്ഷണിക്കുന്നു. പരിചയമുളളയാളായതിനാല്‍ കുട്ടി പേടിക്കാതെ അടുത്തു ചെന്നു. കടയുടെ പിന്നില്‍ വച്ച് ഉടമ കുട്ടിയെ ശാരീരികമായി ഉപദ്രവിച്ചു. കുട്ടി തിരിച്ചെത്തിയത് ദേഹം മുഴുവന്‍ മുറിവുകളുമായി. ഇതുവരെ ഇയാളെ അറസ്റു ചെയ്തിട്ടില്ല എന്നു കൂടി അറിയുമ്പോഴേ ചിത്രം പൂര്‍ണ്ണമാകൂ.

ഇനിയൊരു കൊല്ലം സംഭവം. ഭാര്യയും ഭര്‍ത്താവും സര്‍ക്കാര്‍ ജീവനക്കാര്‍. മൂന്നു വയസുളള കുട്ടിയെ നോക്കാന്‍ ആളെക്കിട്ടാതെ വിഷമിക്കുന്നു. ജോലിക്കാരി കുട്ടിയെ നേരെ നോക്കാത്തതിനാല്‍ അവരെ പറഞ്ഞു വിട്ടു. പ്രേമവിവാഹമായതിനാല്‍ വീട്ടുകാരുടെ സഹായവും ഇല്ല. അപ്പോഴാണ് അടുത്ത വീട്ടിലെ അപ്പൂപ്പന്‍ സഹായ ഹസ്തം നീട്ടിയത്. പെന്‍ഷന്‍ പറ്റിയ മനുഷ്യന്‍. ചെറുമകളുടെ വിവാഹവും കഴിഞ്ഞ് വെറുതേ വീട്ടിലിരിക്കുന്നു. അദ്ദേഹത്തിനൊരു നേരം പോക്കും തങ്ങളുടെ കുട്ടിക്കൊരു തണലും ആകുമെന്ന് വീട്ടുകാര്‍ കരുതി.

ഒരിക്കല്‍ കുഞ്ഞിനെ കുളിപ്പിക്കുമ്പോള്‍ കുഞ്ഞിന് ജനനേന്ദ്രിയത്തിനു ചുറ്റും അസഹ്യമായ വേദന. സൂക്ഷിച്ചു നോക്കിയപ്പോള്‍ അവിടമാകെ നഖത്തിന്റെ പാടുകള്‍. അയല്‍ക്കാരനില്‍ നിന്നും എത്രയും വേഗം കുഞ്ഞിനെ രക്ഷിച്ച് ഡേകെയറിലാക്കാന്‍ ഡോക്ടര്‍ ഉപദേശിച്ചു.