നേപ്പാളിലെ രാജകുമാരിയുടെ ദുരന്തകഥ...

ആ പ്രേമം അത്രയ്ക്ക് ആഴത്തിലുള്ള ഒന്നായിരുന്നിരിയ്ക്കണം. അധരം കൊണ്ടെന്നതിന് പകരം ഹൃദയം കൊണ്ടായിരിക്കണം അവര്‍ വികാരവിചാരങ്ങള്‍ കൈമാറിയിരുന്നത്. അല്ലെങ്കില്‍ ആ യുവരാജാവ് ആ പ്രേമത്തിന് ഇത്രയും വിലകൊടുക്കില്ലായിരുന്നു. പക്ഷെ ആ വാര്‍ത്താ ലോകമനസ്സാക്ഷിക്കേറ്റ ഉണങ്ങാത്ത മുറിവായി. നേപ്പാള്‍ രാജകുംടുംബത്തിന്റെ വേരുകളാണ് പ്രേമകഥയിലെ നായകന്‍ പിഴുതെറിഞ്ഞത്. എല്ലാം തന്റെ പ്രണയിനിയ്ക്ക് വേണ്ടി. അവള്‍ ഇന്ത്യക്കാരിയായിരുന്നു എന്നതിനാല്‍ ഇപ്പോള്‍ നേപ്പാള്‍കാരുടെ മനസ്സില്‍ ഇന്ത്യ വെറുപ്പിന്റെ പ്രതീകമായി മാറിയിരിക്കുന്നു. ഇന്ത്യ- നേപ്പാള്‍ അതിര്‍ത്തി അടച്ചു.

പ്രേമത്തിലേക്ക് നയിച്ച ഗവേഷണം

നേപ്പാളിലെ യുവരാജകുമാര്‍ ദീപേന്ദ്ര തന്റെ അച്ഛനും അമ്മയും ഉള്‍പ്പെടെ നേപ്പാള്‍ രാജകുടുംബത്തിലെ 13 പ്രധാന അംഗങ്ങളെ വെടിവച്ചു കൊന്നു എന്നതാണ് ഇപ്പോള്‍ പ്രചരിക്കുന്ന വാര്‍ത്ത. സംഗതി സത്യമാണെങ്കില്‍ .......അതിനു കാരണക്കാരിയായ ദീപേന്ദ്രയുടെ ഇന്ത്യയില്‍ വേരുകളുള്ള കാമുകിയെ നേപ്പാള്‍കാര്‍ വെറുക്കുക സ്വാഭാവികം. നേപ്പാളില്‍ പിടിച്ചു നില്ക്കാന്‍ കഴിയാതെ ദേവയാനി നേപ്പാളിനോട് വിടപറഞ്ഞ് ഇന്ത്യയിലെത്തിക്കഴിഞ്ഞു.

സ്വന്തം പേരില്‍ ടിക്കറ്റ് ബുക്കു ചെയ്യാന്‍ കഴിയാത്തതിനാല്‍ വ്യാജനാമത്തില്‍ ടിക്കറ്റെടുത്താണ് ദേവയാനി ഇന്ത്യയിലെത്തിയത്. കാഠ്മണ്ഡുവിലെ ത്രിഭുവന്‍ സര്‍വകലാശാലയില്‍ ജലസ്രോതസ്സുകളെക്കുറിച്ച് ഗവേഷണം നടത്തുകയാണ് ദേവയാനി ഇപ്പോള്‍. ദീപേന്ദ്രയും ഇവിടെ വിദ്യാര്‍ത്ഥിയായിരുന്നപ്പോഴാണ് ഇവര്‍ തമ്മില്‍ അടുത്തത്. സര്‍വകലാശാലയ്ക്കടുത്തുള്ള ഒരു റസ്റോറന്റിലാണ് ഇവര്‍ തമ്മില്‍ കൂടിക്കാഴ്ചകള്‍ നടന്നിരുന്നത്. എന്നാല്‍ ദീപേന്ദ്രയുടെ അമ്മ ഐശ്വര്യാരാജ്ഞി ഈ ബന്ധത്തിന് എതിരായിരുന്നു.

സിന്ധ്യകുടുംബത്തില്‍ വേരുകള്‍

രാജകുടുംബത്തില്‍ നിന്നു തന്നെയുള്ള ഒരു പെണ്‍കുട്ടിയെ ആണ് രാജ്ഞി ദീപേന്ദ്രയ്ക്കുവേണ്ടി കണ്ടുവച്ചിരുന്നത്. എന്നാല്‍ ദേവയാനിയുടെ കുടുംബവും നേപ്പാളിനെ ഭരിച്ച പൂര്‍വകാലപ്രതാപമുള്ളവരാണ്. ദേവയാനി റാണാകുടുംബത്തിലെ അംഗമാണ്. 1951വരെ നേപ്പാളിനെ ഭരിച്ചിരുന്നത് റാണാകുടുംബമാണ്. ഇന്ത്യയിലെ വിജരാജ്യസിന്ധ്യ, മാധവറാവുസിന്ധ്യ, കേന്ദ്രമന്ത്രി വസുന്ധരരാജ്യ സിന്ധ്യ തുടങ്ങിയവര്‍ ഉള്‍പ്പെടുന്ന ഗ്വാളിയാറിലെ സിന്ധ്യ രാജകുടുംബവുമായി ദേവയാനിയുടെ കുടുംബത്തിന് ബന്ധമുണ്ട്. ബന്ധം ഇഴവിടര്‍ത്തിനോക്കുകയാണെങ്കില്‍ ദേവയാനിയുടെ മുത്തശ്ശിയായിവരും അന്തരിച്ച ബിജെപി നേതാവ് വിജയരാജസിന്ധ്യ.

ഇനി പ്രണയകഥയിലെ നായികയുടെ ജീവിതം എന്താകും? ആ ചോദ്യത്തിനുത്തരം പറയേണ്ടത് കാലമാണ്. എങ്കിലും ഒരിയ്ക്കലും ഉണങ്ങാത്ത മുറിവുകളുടെ വിങ്ങലായിരിയ്ക്കും ദേവയാനിയുടെ ഇനിയുള്ള ജീവിതം.