രാഗേശ്വരിയുടെ രണ്ടാം ജന്മം...

ദുനിയ എന്ന ആദ്യ ആല്‍ബത്തിലൂടെ തന്നെ ഒട്ടേറെ ആരാധകരെ സൃഷ്ടിച്ച രാഗേശ്വരിയ്ക്ക് വളരെ അപ്രതീക്ഷിതമായാണ് ബെല്‍ഡ് പാള്‍സി രോഗം ബാധിച്ചത്. മുഖവും ശരീരഭാഗങ്ങളും കോടുകയും സംസാരശേഷി തന്നെ നഷ്ടമാകുകയും ചെയ്യുന്ന ഈ രോഗം ഹിന്ദി പോപ് സംഗീതരംഗത്ത് രാഗേശ്വരിയുടെ പ്രതീക്ഷകളെല്ലാം തകര്‍ക്കുമെന്ന അവസ്ഥവരെയുണ്ടായി.

എന്നാല്‍, രോഗത്തിന്റെ നീരാളിപ്പിടുത്തില്‍ നിന്നും രക്ഷപ്പെട്ട് തനിക്ക് പ്രിയങ്കരമായ സംഗീതത്തിന്റെയും അഭിനയത്തിന്റെയും ലോകത്ത് രാഗേശ്വരി സജീവമാകുന്നു. 2001ന്റെ പുതിയ പുലരിയിലായിരുന്നു ബെല്‍ഡ് പാള്‍സി രാഗേശ്വരിയുടെ ജീവിതത്തിലേയ്ക്ക് കടന്നു വന്നത്. പുതിയ നൂറ്റാണ്ടിനെ ലോകം മുഴുവന്‍ സന്തോഷത്തോടെ വരവേറ്റപ്പോള്‍ വൈ ടു കെ എന്ന പേരില്‍ പുതുനൂറ്റാണ്ടിനെ വരവേല്‍ക്കാനുള്ള ഹിറ്റ് ആല്‍ബം പുറത്തിറക്കിയ പാട്ടുകാരി കിടക്കയില്‍ നിന്നുമെഴുന്നേറ്റത് ഒരു വശത്തേയ്ക്ക് കോടിയ മുഖവുമായിട്ടായിരുന്നു.

രോഗം പാട്ടുകാരിയുടെ ശബ്ദത്തിനേയും ബാധിച്ചു. സംസാരിക്കുന്നതൊന്നും ആര്‍ക്കും മനസിലാക്കാനാവാത്ത അവസ്ഥ. ചെയ്യുന്ന ജോലികളെയെല്ലാം ബാധിക്കുന്ന വിധത്തില്‍ മുഖവും ശബ്ദവും വികൃതമാകുക...പാട്ടുപാടിയും അഭിനയിച്ചും കഴിയുന്ന ഒരു കലാകാരിയ്ക്ക് സഹിക്കാനാവുന്നതിനപ്പുറമായിരുന്നു ഇത്.

പ്രതീക്ഷയോടെ രാഗേശ്വരി തന്നെ ബാധിച്ച രോഗത്തോട് പടവെട്ടി. ആറുമാസത്തെ വിദഗ്ധ ചികിത്സ. ഒടുവില്‍ എല്ലാം ശരിയായി. രാഗേശ്വരി സംഗീതത്തിന്റേയും അഭിനയത്തിന്റെയും ലോകത്തേയ്ക്ക് തിരിച്ചു വന്നിരിക്കുന്നു.

പൂജാ ഭട്ട് സംവിധാനം ചെയ്യാന്‍ പോകുന്ന ടെലിഫിലിമിലെ നായിക രാഗേശ്വരിയാണ്. ദൂരദര്‍ശനു വേണ്ടി ഇന്ത്യയിലെ നഗരങ്ങള്‍ മുഴുവന്‍ ചുറ്റി സഞ്ചരിച്ച് കുട്ടികള്‍ക്കു വേണ്ടിമിനി സൂപ്പര്‍സ്റ്റാര്‍ എന്നൊരു പരിപാടിയും രാഗേശ്വരി അവതരിപ്പിക്കുന്നു. പഴയ പാട്ടുകള്‍ക്കു വേണ്ടി ബാര്‍ ബാര്‍ ദേഖേം എന്നൊരു പരിപാടി രാഗേശ്വരിയുടെ നിര്‍മാണ കമ്പനി തുടങ്ങിക്കഴിഞ്ഞു.