സഞ്ജന...നാടകം ...ജീവിതം...

പക്ഷേ, സഞ്ജന സ്നേഹിച്ചത് നാടകത്തെയാണ്. അതും അമച്വര്‍ നാടകത്തെ. ഇന്ന് മുംബൈയിലെ അമച്വര്‍ നാടകപ്രവര്‍ത്തനങ്ങളുടെ ജീവനാഡി സഞ്ജനയാണ്. അവര്‍ നേതൃത്വം നല്‍കുന്ന പ്രൃഥ്വി തിയറ്റേറും.

അരങ്ങിലും അണിയറയിലും മുത്തച്ഛനും അച്ഛനും വെട്ടിത്തെളിച്ച നാടകവഴിയിലൂടെ നടക്കാനാണ് സഞ്ജനയ്ക്കിഷ്ടം. ബോളിവുഡിന്റെ മായികലോകമല്ല, നാടകത്തിന്റെ പരുക്കന്‍ ലോകമാണ് തനിക്കിഷ്ടമെന്ന് ചെറുപ്പത്തിലേ സഞ്ജന മനസിലാക്കുകയായിരുന്നു.

നാടകം ജീവിതമായി സ്വീകരിക്കാന്‍ സഞ്ജനയ്ക്ക് പ്രചോദനമായത് മുത്തച്ഛന്‍ പൃഥ്വിരാജ് കപൂറും അച്ഛന്‍ ശശി കപൂറും തന്നെയായിരുന്നു. ഹിന്ദി സിനിമാലോകത്ത് കുലപതിയായി വാണപ്പോഴും പൃഥ്വിരാജ് കപൂറിന് നാടകവേദിയോട് വല്ലാത്ത അഭിനിവേശമായിരുന്നു.

എഴുപതുകളില്‍ ഹിന്ദിസിനിമയുടെ മുഖച്ഛായ ആകെ മാറി , ഇതിവൃത്ത സ്വീകരണത്തിലും സാങ്കേതിക മേന്മയിലും ബോളിവുഡ് കുതിച്ചു കയറിയപ്പോള്‍ രംഗത്തെത്തിയ ശശി കപൂറിനും പക്ഷേ, കൂടുതല്‍ സ്നേഹം നാടകത്തോടായിരുന്നു. അദ്ദേഹത്തിന്റെ മകള്‍ സഞ്ജനയ്ക്കാകട്ടെ അഭിനിവേശം രംഗവേദിയോട് മാത്രമായി.

ഇന്ന് മുംബൈയിലെ പൃഥ്വി തിയേറ്ററിന്റെ അമരക്കാരി സഞ്ജനയാണ്. ഹിന്ദി നാടകവേദിയും ഹിന്ദി നാടകവും മുംബൈയില്‍ ഇപ്പോള്‍ അറിയപ്പെടുന്നത് തന്നെ പൃഥ്വി തിയേറ്ററിന്റെ പേരിലാണ്. പൃഥ്വിരാജ് കപൂറിന്റെ സ്മരണ നിലനിര്‍ത്താന്‍ സ്ഥാപിച്ച ട്രസ്റ്റിന്റെ കീഴിലാണ് പൃഥ്വി തിയേറ്റര്‍ പ്രവര്‍ത്തിക്കുന്നത്. സഞ്ജനയോടൊപ്പം സഹോദരന്മാരായ കുനലും കരണും പൃഥ്വിയുടെ അണിയറയിലുണ്ട്.

മനസില്‍ നല്ല നാടകം മാത്രം...

നാടകങ്ങള്‍ അവതരിപ്പിക്കുന്നതിലുപരി , നല്ല നാടകങ്ങള്‍ക്ക് അവതരണവേദിയൊരുക്കുകയാണ് പൃഥ്വി തിയേറ്റര്‍ ചെയ്യുന്നത്. അര്‍ഥവത്തായ നാടകവേദി മനസില്‍ കണ്ടുള്ള അവാര്‍ഡുകള്‍, സെമിനാറുകള്‍, ചര്‍ച്ചകള്‍, സംവാദങ്ങള്‍...സഞ്ജനയും കൂട്ടരും നല്ല നാടകങ്ങളുടെ അണിയറയിലാണ്. വര്‍ഷം തോറും പൃഥ്വി തിയേറ്റര്‍ നാടകോത്സവം നടത്തുന്നു. നല്ല നാടകങ്ങളെ സ്നേഹിക്കുകയും പരിപോഷിപ്പിക്കുകയും പരിരക്ഷിക്കുകയും ചെയ്യുന്നവരുടെ കൂട്ടായ്മയാണ് പൃഥ്വി നാടകോത്സവത്തിന്റെ മുഖ്യലക്ഷ്യമെന്ന് സഞ്ജന കപൂര്‍ പറയുന്നു.

താന്‍ സിനിമയിലേയ്ക്ക് ഇല്ലെന്നു പറയുന്ന സഞ്ജന നാടകം മാത്രമാണ് തന്റെ മാധ്യമമെന്നും ഉറച്ചുവിശ്വസിക്കുന്നു. നാടകപ്രതിസന്ധി തീര്‍ക്കാന്‍ ഭാവിയില്‍ നല്ലൊരു പ്രേക്ഷക സമൂഹത്തെ സൃഷ്ടിക്കാനുള്ള യജ്ഞത്തിലാണ് അവരിപ്പോള്‍. ഇതിനായി ഇപ്പോള്‍ കുട്ടികളുടെ നാടകവേദിയില്‍ കൂടുതല്‍ ശ്രദ്ധ വയ്ക്കുന്നു.

നാടകത്തിന്റെ വിദ്യാഭ്യാസ മൂല്യത്തെപ്പറ്റി അവബോധമുള്ള നാടകപ്രവര്‍ത്തകരും നല്ല നാടകത്തെ സ്നേഹിക്കുന്ന പ്രേക്ഷകസമൂഹവും ഒത്തു ചേര്‍ന്നാല്‍ നാടകത്തിന്റെ ഭാവി ശോഭനമാണെന്ന് സഞ്ജന വിശ്വസിക്കുന്നു. ഇതിനായി രാജ്യമെങ്ങുമുള്ള നാടകപ്രവര്‍ത്തകരുടെ കൂട്ടായ്മ കെട്ടിപ്പടുക്കുകയെന്ന ദൗത്യത്തിലാണ് സഞ്ജനയിപ്പോള്‍.