പണമിടപാട് വേണ്ട ഈ ദിവസം; ബാധ്യത ഫലം

ചൊവ്വാഴ്ച ദിവസം

ചൊവ്വാഴ്ച ദിവസത്തെ ഭരിക്കുന്നത് ചൊവ്വാ ഗ്രഹമാണ്. ഹിന്ദുമതവും ഇന്ത്യന്‍ ജ്യോതിഷവും അനുസരിച്ച് ചൊവ്വാ ഗ്രഹത്തെ 'ധര്‍തിപുത്ര' അല്ലെങ്കില്‍ ഭൂമിയുടെയോ മണ്ണിന്റെയോ പുത്രന്‍ എന്നറിയപ്പെടുന്നു. ഭൂമിയുടെ വലുപ്പവുമായി താരതമ്യപ്പെടുത്തുമ്പോള്‍ ചൊവ്വ പകുതിയോളം വലിപ്പമേ ഉള്ളൂവെങ്കിലും, വേദ ജ്യോതിഷമനുസരിച്ച് ഇത് ഒരാളുടെ ജീവിതത്തില്‍ ആഴത്തില്‍ സ്വാധീനം ചെലുത്തുന്നു.

ചൊവ്വയുടെ സ്വഭാവം

ചൊവ്വയുടെ സ്വഭാവം വളരെ പരുഷമാണ്. എല്ലായ്‌പ്പോഴും കോപവും ഏറ്റുമുട്ടലിനുള്ള മാനസികാവസ്ഥയും കാണിക്കുന്നു. പ്രതികാരദാഹിയാണ് ഇത്. പലരും ചൊവ്വയെ ഒരു ക്ഷുദ്ര ഗ്രഹമായി കണക്കാക്കുകയും അതിനെ തിന്മയായി കരുതുകയും ചെയ്യുന്നു. ചൊവ്വ എല്ലായ്‌പ്പോഴും ശത്രുക്കള്‍ക്ക് ഭീഷണി സൃഷ്ടിക്കുന്ന ഗ്രഹമാണ്.

ചൊവ്വയുടെ സ്വാധീനം

ചൊവ്വ ഭരിക്കുന്ന രാശിക്കാര്‍ ജഡികാഭിലാഷങ്ങള്‍ കൂടുതലായി ആസ്വദിക്കുന്നു. ചന്ദ്രന്‍ ക്ഷയിച്ചുകൊണ്ടിരിക്കുന്ന ഘട്ടത്തില്‍ ചൊവ്വ ഏറ്റവും ശക്തമാകുന്നു. ഈ ഗ്രഹത്തിന്റെ ദിശ തെക്കോട്ടാണ്. തീ, ഭൂകമ്പം, അപകടങ്ങള്‍ തുടങ്ങി എല്ലാ പ്രധാന പ്രകൃതിദുരന്തങ്ങളെയും ഇത് നിയന്ത്രിക്കുന്നു. ജാതകത്തില്‍ ചൊവ്വയുള്ള ശക്തമായ സ്വാധീനമുള്ളവര്‍ മികച്ച സ്വത്ത് കച്ചവടക്കാര്‍, ഉദ്യോഗസ്ഥര്‍, ശസ്ത്രക്രിയാ വിദഗ്ധര്‍, സൈനികര്‍ എന്നിവരായിത്തീരുന്നു.

എന്തുകൊണ്ട് ചൊവ്വാഴ്ച

ജ്യോതിഷമനുസരിച്ച് ചൊവ്വാഴ്ച ദിവസം ചൊവ്വാ ഗ്രഹം ഭരിക്കുന്നതിനാല്‍ പണം കടം വാങ്ങുന്നതിന് വളരെ മോശമായ ദിവസമായി കണക്കാക്കപ്പെടുന്നു. കാരണം, ചൊവ്വാഴ്ച എടുക്കുന്ന വായ്പകളുടെയോ കടങ്ങളുടെയോ തിരിച്ചടവ് പ്രയാസപ്പെടുമെന്ന് വിശ്വസിക്കപ്പെടുന്നു. ഈ ദിവസത്തിലും പുതിയ വസ്ത്രങ്ങള്‍ ധരിക്കുന്നതും ഒഴിവാക്കുന്നതാണ് നല്ലത്.

കടമിടപാടുകള്‍ വേണ്ട

ഈ ജ്യോതിഷ ഘടകങ്ങളാല്‍ വായ്പ തിരിച്ചടയ്ക്കാന്‍ കഴിയില്ലെന്ന വസ്തുത തിരിച്ചറിഞ്ഞ് പണമിടപാടുകാര്‍ പലപ്പോഴും ചൊവ്വാഴ്ച വായ്പയെടുക്കാന്‍ ഉപഭോക്താക്കളെ ആകര്‍ഷിക്കുന്നു.

ചൊവ്വയെ പ്രസാദിപ്പിക്കാന്‍ ചെയ്യേണ്ടത്

ചൊവ്വാ ഗ്രഹത്തെ പ്രസാദിപ്പിക്കാന്‍, ചെമ്പ് ലോഹത്തില്‍ പണിത വസ്തുക്കള്‍ ദാനം ചെയ്യുന്നത് ശുഭമായി കണക്കാക്കുന്നു. ചൊവ്വയുടെ സ്വാധീനത്താല്‍ മഹാദശയോ അന്തര്‍ദശയോ ഉള്ളവര്‍ ചുവന്ന പവിഴം ധരിക്കുന്നത് പ്രയോജനകരമാണ്. ജാതകത്തില്‍ ചൊവ്വ മോശം സ്ഥാനത്ത് തുടരുന്നവരും ഇത് ചെയ്യണം. ചൊവ്വാഴ്ച ദിവസം ഓറഞ്ച് കളര്‍ വസ്ത്രങ്ങള്‍ ഉപയോഗിക്കുന്നത് ഗുണം ചെയ്യും. വെള്ളി അല്ലെങ്കില്‍ സ്വര്‍ണ്ണം കൊണ്ടുള്ള ഒരു പവിഴ മോതിരം വലത് കൈയില്‍ ധരിക്കാം. നെറ്റിയില്‍ ഒരു ഓറഞ്ച് നിറത്തിലുള്ള കുറി തൊടുക, സുബ്രഹ്മണ്യനെ ആരാധിക്കുക, മംഗള ഗായത്രി മന്ത്രം ചൊല്ലുക തുടങ്ങിയ പ്രവര്‍ത്തികള്‍ ചൊവ്വയെ പ്രീതിപ്പെടുത്താനായി ചെയ്യാവുന്നതാണ്.

ഈ ദിവസം ഉത്തമം

തിങ്കളാഴ്ച ദിവസം ജ്യോതിഷമനുസരിച്ച് വായ്പ എടുക്കുന്നതിനും നല്‍കുന്നതിനും ഒരു നല്ല ദിവസമായി കണക്കാക്കപ്പെടുന്നു. അത്തരമൊരു സാഹചര്യത്തില്‍ കടം വേഗത്തില്‍ തിരിച്ചടയ്ക്കാനാവുമെന്നു കരുതപ്പെടുന്നു. വെള്ളിയാഴ്ച ദിവസവും ജ്യോതിഷമനുസരിച്ച് കടം വാങ്ങുകയും കൊടുക്കുകയും ചെയ്യുന്നതിന് നല്ല ദിവസമായി കണക്കാക്കുന്നു.