മക്കളുടേയും കുടുംബത്തിന്റേയും സര്‍വ്വൈശ്വര്യം: മഹാദേവന്‍ കനിഞ്ഞനുഗ്രഹിക്കും ദിനം

ശിവപാര്‍വ്വതിമാരുടെ അനുഗ്രഹം

ശിവപാര്‍വ്വതിമാരുടെ അനുഗ്രഹം ഭക്തര്‍ക്ക് മേല്‍ ചൊരിയുന്ന ദിനമാണ് തിരുവാതിര. ധനുമാസത്തിലെ തിരുവാതിര. ഈ ദിനത്തില്‍ നാം ശിവനെ മാത്രമല്ല ശിവകുടുംബത്തെ വരെ ആരാധിക്കുന്നത് ജീവിതത്തില്‍ ഐശ്വര്യവും സന്തോഷവും സത് സന്താനയോഗവും നല്‍കുന്നു. മരണത്തെ വരെ ജയിക്കുന്നതിന് ശിവകുടുംബം നമ്മളെ അനുഗ്രഹിക്കുന്നു. ശിവപാര്‍വ്വതിമാരെ പ്രാര്‍ത്ഥിച്ച് വ്രതമെടുക്കുന്നതിലൂടെ തന്നെ ജീവിതത്തില്‍ സര്‍വ്വൈശ്വര്യവും നേട്ടങ്ങളും നല്‍കുന്നു. ശ്രീപരമേശ്വരന്റെ ജന്മനാളായാണ് തിരുവാതിര ദിനം ആഘോഷിക്കുന്നത്.

ഐതിഹ്യം

തിരുവാതിര വ്രതത്തിന് പിന്നില്‍ നിരവധി ഐതിഹ്യങ്ങള്‍ ഉണ്ട്. ഇതില്‍ ഒന്നാണ് സതീദേവിയുടെ ജീവത്യാഗം മൂലം പരമശിവന്‍ ക്രോധാകുലനായി ലോകത്തെയാകെ നശിപ്പിക്കാന്‍ തയ്യാറെടുക്കുകയായിരുന്നു. ഈ സമയം ദേവഗണങ്ങള്‍ ഒട്ടാകെ ശിവനെ ശാന്തനാക്കാന്‍ ശ്രമിച്ചുവെങ്കിലും സാധിച്ചില്ല. എന്നാല്‍ ഈ സമയത്തോടെ പാര്‍വ്വതി ദേവി പരമശിവനെ ഭര്‍ത്താവായി ലഭിക്കാന്‍ കഠിനമായ തപസ്സ് ചെയ്തു. തുടര്ന്ന് പാര്‍വ്വതിയില്‍ അനുരാദ വിവശനായ ശിവന്‍ പാര്‍വ്വതീ പരിണയം നടത്തിയ ദിനമായാണ് തിരുവാതിര ദിനത്തെ കണക്കാക്കുന്നത്. ഇത് കൂടാതെ ശ്രീകൃഷ്ണനെ ഭര്‍ത്താവായി ലഭിക്കാന്‍ ഗോപസ്ത്രീകള്‍ കാര്‍ത്യായനി പൂജ നടത്തിയ ദിവസമായും ഈ ദിനത്തെ കണക്കാക്കുന്നു.

തിരുവാതിര ദിനത്തിലെ ഉറക്കമൊഴിക്കല്‍

തിരുവാതിര ദിനത്തില്‍ ഉറക്കമൊഴിക്കുന്നതിന് പിന്നിലും ഒരു ഐതിഹ്യമുണ്ട്. പാലാഴി മഥനം നടത്തിയ സമയത്ത് വാസുകിയുടെ വായില്‍ നിന്ന് പുറത്ത് വന്ന കാളകൂട വിഷം ലോകത്തെ രക്ഷിക്കുന്നതിന് വേണ്ടി പരമശിവന്‍ കുടിക്കാന്‍ ശ്രമിച്ചു. എന്നാല്‍ ഇത് കണ്ട പാര്‍വ്വതി ദേവി ശിവന്റെ കഴുത്തില്‍ അമര്‍ത്തിപ്പിടിക്കുകയും ശിവനെ രക്ഷിക്കുന്നതിന് വേണ്ടി ഉറക്കമൊഴിഞ്ഞ് പ്രാര്ത്ഥിക്കുകയും ചെയ്തത് തിരുവാതിര ദിനത്തിലാണ് എന്നാണ് വിശ്വാസം. ഇതിന്റെ ഫലമായാണ് ഈ ദിനത്തില്‍ ഉറക്കമൊഴിഞ്ഞ് സ്ത്രീകള്‍ പ്രാര്ത്ഥിക്കുന്നത്. ഇത്തരത്തില്‍ ചെയ്യുന്നതിലൂടെ അത് ജീവിതത്തില്‍ ഐശ്വര്യവും സന്തോഷവും നിറക്കുകയും ജീവിത പങ്കാളിക്ക് ആയുരാരോഗ്യവും ആയുസ്സും പ്രദാനം ചെയ്യുകയും ചെയ്യുന്നു എന്നാണ് വിശ്വാസം.

വ്രതമെടുക്കേണ്ടത് ഇപ്രകാരം

തിരുവാതിര നാളില്‍ വ്രതമെടുക്കേണ്ടത് ഇപ്രകാരമാണ്. പാതിരാ പൂ ചൂടി മകരം നാളില്‍ തന്നെ ഉറക്കമൊഴിച്ച് അഷ്ടമംഗല്യത്തട്ടില്‍ ദശപുഷ്പങ്ങളും എടുത്ത് അത് മുടിയില്‍ ചൂടി നാലും കൂട്ടി മുറുക്കി കുളിക്കാന്‍ പോണം. തിരുവാതിരക്കുളി എന്നൊരു ചൊല്ല് തന്നെയുണ്ട്. അതിന് വേണ്ടി കുളത്തില്‍ പോയി തുടിച്ച് കുളിച്ച് ഊഞ്ഞാലാടുകയും ദീപം കൊളുത്തി ദശപുഷ്പങ്ങള്‍ ചൂടി തിരുവാതിരക്കളിയും കളിക്കുന്നു. വ്രതമെടുക്കുമ്പോള്‍ അതിരാവിലെ കുളിച്ച് കോടി വസ്ത്രങ്ങള്‍ ധരിച്ച് ശിവപാര്‍വ്വതി ക്ഷേത്രത്തില്‍ ദര്‍ശനം നടത്തി പൂജയും വഴിപാടും കഴിക്കണം. ശേഷം അരിഭക്ഷണം ഒഴിവാക്കി ഇളനീരും പഴവും മാത്രം കഴിക്കണം. തിരുവാതിര നാളില്‍ ഒരിക്കലും അരി ഭക്ഷണം കഴിച്ച് കൊണ്ട് വ്രതമെടുക്കാന്‍ പാടില്ല. ഇത് വ്രതത്തിന്റെ പുണ്യം നല്‍കുകയില്ല.