സ്വത്വം തേടിയെത്തിയയാള്‍

ഗുരുവിനെ കണ്ടയുടനെ അദ്ദേഹം പറഞ്ഞു - 'ഗുരോ എനിയ്ക്ക് സ്വയം നഷ്ടപ്പെട്ടതായി തോന്നുന്നു, ഞാന്‍ വല്ലാതെ നിരാശനാണ്. ഞാന്‍ ആരാണെന്ന് എനിയ്ക്ക് മനസ്സിലാകുന്നില്ല. എനിയ്ക്ക് എന്റെ യഥാര്‍ത്ഥ സ്വത്വം എന്താണെന്ന് കാണിച്ചുതരുവാന്‍ ഞാന്‍ അങ്ങയോട് അപേക്ഷിയ്ക്കുന്നു.'

ഇതുകേട്ട ഗുരു പ്രതികരിയ്ക്കാതെ ശാന്തനായി ഇരുന്നു.

ഗുരുവിന്റെ ഇരുപ്പ് കണ്ട് കൂടുതല്‍ ആകുലനായ അയാള്‍ വീണ്ടും വീണ്ടും ആദ്യം പറഞ്ഞ കാര്യം ആവര്‍ത്തിച്ചു, പക്ഷേ ഫലമൊന്നുമുണ്ടായില്ല. ഗുരു യാതൊരു തരത്തിലും പ്രതികരിച്ചില്ല.

പ്രതീക്ഷ നശിച്ച മനുഷ്യന്‍ തിരിച്ചുപോകാനൊരുങ്ങി, അപ്പോള്‍ ഗുരു അയാളെ വിളിച്ചു.

അയാള്‍ വിളികേട്ടു, വിളികേട്ടതിന് പിന്നാലെ അയാള്‍ തനിയ്ക്കുനേരെ തിരിയുന്നതിനിടയില്‍ ഗുരു വീണ്ടും പറഞ്ഞു 'അത് അവിടെത്തന്നെയുണ്ട്!'