വിഡ്ഢിയും സന്യാസിയും

Short Story

oi-Saritha

By Veena

Updated: Wednesday, December 5, 2012, 15:54 [IST]

ചൈനയില്‍ ജീവിച്ചിരുന്ന ഒരു യുവ സന്യാസി ബുദ്ധ തത്വങ്ങളില്‍ അതിപ്രധാനമായി കരുതപ്പെടുന്ന ധര്‍മ്മത്തിന്റെ അര്‍ത്ഥ തലങ്ങള്‍ അതിന്റെ യഥാര്‍ത്ഥരീതിയില്‍ ഉള്‍ക്കൊണ്ടയാളായിരുന്നു. ഒരിയ്ക്കല്‍ ഒരു ചോദ്യത്തിന് ഉത്തരം കണ്ടെത്താന്‍ കഴിയാതെ സന്യാസി ബുദ്ധിമുട്ടി. അദ്ദേഹത്തിന്റെ ജ്ഞാനം കൊണ്ട് ഉത്തരം കണ്ടെത്താവുന്നതിലും അപ്പുറത്തായിരുന്നു ആ ചോദ്യം.

ഒടുവില്‍ സന്യാസി ഈ ചോദ്യം തന്റെ ഗുരുവിന്റെ ശ്രദ്ധയില്‍പ്പെടുത്തി. ചോദ്യം കേട്ട ഗുരു ഉച്ചത്തില്‍ ചിരിയ്ക്കുകയും ഒന്നും പറയാതെ നടന്നുപോവുകയും ചെയ്തു. ഗുരുവിന്റെ പ്രതികരണത്തിന്റെ അര്‍ത്ഥം മനസ്സിലാകാതെ സന്യാസി ആകെ അസ്വസ്ഥനായി, അടുത്ത രണ്ടുമൂന്നു ദിവസത്തേയ്ക്ക് അദ്ദേഹത്തിന് ഉണ്ണാനും ഉറങ്ങാനും കഴിഞ്ഞില്ല, എല്ലായ്‌പ്പോഴും ഗുരുവിന്റെ പ്രതികരണത്തിന്റെ പൊരുളെന്താണെന്നതായിരുന്നു സന്യാസിയുടെ ചിന്ത. അദ്ദേഹം ഇക്കാര്യം വീണ്ടും ഗുരുവിന്റെ ശ്രദ്ധയില്‍പ്പെടുത്തി.

അതുകേട്ടപ്പോള്‍ ഗുരു ചോദിച്ചു - 'യഥാര്‍ത്ഥത്തില്‍ നിങ്ങളെ അലട്ടുന്ന പ്രശ്‌നമെന്താണെന്ന് നിങ്ങള്‍ക്ക് അറിയാമോ? ഒരു വിഡ്ഢിയെക്കാളം താഴെയാണ് നിങ്ങളെന്നതാണ് പ്രശ്‌നം.'

ഗുരുവിന്റെ ഉത്തരം കേട്ട് ആകെ സ്തംഭിച്ചുപോയ സന്യാസി ചോദിച്ചു - 'അങ്ങേയ്ക്ക് എങ്ങനെ ഇത് പറയാന്‍ കഴിയും ഏത് അര്‍ത്ഥത്തിലാണ് ഞാന്‍ വിഡ്ഢിയേക്കാളും താഴെയാകുന്നത്?'

അപ്പോള്‍ ഗുരു വിശദീകരിച്ചു - 'ഒരു വിഡ്ഢി ആളുകള്‍ ചിരിക്കുന്നത് നോക്കി ആസ്വദിയ്ക്കും. എന്നാല്‍ നിങ്ങളോ? ഒരാള്‍ ചിരിച്ചപ്പോള്‍ നിങ്ങള്‍ അസ്വസ്ഥനായി, ഇപ്പോള്‍ പറയൂ നിങ്ങള്‍ ഒരു വിഡ്ഢിയേക്കാളും താഴെയല്ലേ'?