മനുഷ്യത്വത്തിന്റെ കാവലാളുകള്‍

Updated: Tuesday, October 30, 2012, 12:49 [IST]

ഒരിക്കല്‍ കുറച്ച് ജപ്പാന്‍ ഭടന്മാര്‍ ചേര്‍ന്ന് സെന്‍ ഗുരുവായ ഗസനിന്റെ ക്ഷേത്രത്തിലെത്തി. ക്ഷേത്രം തങ്ങളുടെ സൈനിക നീക്കങ്ങളുടെ കേന്ദ്രമാക്കിമാറ്റാമെന്നായിരുന്നു അവരുടെ കണക്കുകൂട്ടല്‍.

ഗസന്‍ ആശ്രമത്തിലുണ്ടാക്കുന്ന വളരെ ലളിതമായ ഭക്ഷണം തന്നെ സൈനികര്‍ക്കും നല്‍കാനായി തന്റെ പാചക്കാരനോട് ആവശ്യപ്പെട്ടു. ഗുരുവിന്റെ ഈ നിര്‍ദ്ദേശം ഭടന്മാരെ രോഷാകുലരാക്കി.

അവരില്‍ ഒരാള്‍ ക്ഷോഭം അടക്കാനാവാതെ ഗസനോട് ചോദിച്ചു- 'ഞങ്ങള്‍ ആരാണെന്നാണ് നിങ്ങളുടെ വിചാരം, ഞങ്ങള്‍ ഭടന്മാരാണ്, രാജ്യരക്ഷയ്ക്കായി സ്വന്തം ജീവന്‍ തന്നെ ബലിയര്‍പ്പിക്കാനായി ഇറങ്ങിത്തിരിച്ചവരാണ്, നിങ്ങള്‍ക്ക് എന്തുകൊണ്ട് ഞങ്ങളെ വിഭവസമൃദ്ധമായ ഭക്ഷണം നല്‍കി സല്‍ക്കരിച്ചുകൂട?'

അപ്പോള്‍ ഗുരു പറഞ്ഞു - 'നിങ്ങള്‍ ഞങ്ങളെക്കുറിച്ച് എന്താണ് കരുതിവച്ചിരിക്കുന്നത്, ഞങ്ങളും ഭടന്മാരാണ്, അതായത് മനുഷ്യത്വത്തിന്റെ കാവലാളുകള്‍, ജീവനുള്ള എന്തിനെയും രക്ഷിക്കുന്നവരാണ് ഞങ്ങള്‍.'