വലിപ്പവും ചെറുപ്പവും

Updated: Sunday, November 4, 2012, 22:35 [IST]

വളരെ അഭിമാനിയും പ്രശസ്തനുമായ ഒരു ഭടന്‍ ഒരിക്കല്‍ ഒരു സെന്‍ ഗുരുവിനടുത്തെത്തി. ഗുരുവിന്റെ മുഖത്തെ സൗന്ദര്യവും പ്രകാശവും കണ്ടപ്പോള്‍ ഭടന് വല്ലാത്തൊരു അരക്ഷിതബോധവും ഭയവും തന്നെ പിടികൂടുന്നതായി തോന്നി. ഉടന്‍തന്നെ ഭടന്‍ ഗുരുവിനോട് തനിയ്‌ക്കെന്താണിങ്ങനെ തോന്നുന്നത് എന്ന് ചോദിച്ചു. യുദ്ധമുഖത്ത് മരണത്തെ മുഖാമുഖം കാണുമ്പോള്‍പ്പോലും തനിയ്ക്കിത്തരത്തിലൊരു വികാരമുണ്ടായിട്ടില്ലെന്നും ഭടന്‍ പറഞ്ഞു.

ഇതുകേട്ടപ്പോള്‍ ഗുരു പറഞ്ഞു 'നില്‍ക്കൂ, എല്ലാവരും പോയിക്കഴിഞ്ഞ് ഞാന്‍ നിങ്ങള്‍ക്ക് ഉത്തരം തരാം'

ഗുരുവിന്റെ വാക്കുകള്‍ കേട്ട് ഭടന്‍ അവിടെ കാത്തിരുന്നു. സന്ദര്‍ശകര്‍ വന്നും പോയുമിരുന്നു. കാത്തുകാത്തിരുന്ന് ഭടന്‍ ക്ഷീണിതനായി. ഒടുവില്‍ വൈകുന്നേരം ഗുരുവിന്റെ മുറിയില്‍ സന്ദര്‍ശകര്‍ ഒഴിഞ്ഞപ്പോള്‍ ഭടന്‍ ചോദിച്ചു 'ഇനിയെങ്കിലും അങ്ങേയ്ക്ക് ഉത്തരം പറയാമോ?'

അപ്പോള്‍ ഗുരു അയാളെയും വിളിച്ച് പുറത്തേയ്ക്ക് പോയി. അന്ന് പൗര്‍ണമിയായിരുന്നു, പുറത്ത് നല്ല നിലാവുണ്ടായിരുന്നു.

ഗുരു പറഞ്ഞു 'ഈ മരങ്ങളെ നോക്കൂ ഒരു മരം ആകാശത്തോളം വളര്‍ന്നു നില്‍ക്കുന്നു, അതിനടുത്തുള്ള മറ്റൊന്നാവട്ടെ വളരെ ചെറുതാണ്. അവ കുറേനാളായി ഈ ജനാലയ്ക്കരികിലായി ഒരു പ്രശ്‌നവുമില്ലാതെ വളരുന്നുണ്ട്. ചെറിയ മരം ഒരിയ്ക്കലും വലിയ മരത്തോട് അതിന്റെ വലിപ്പക്കൂടുതലില്‍ തനിയ്ക്ക് വല്ലായ്മ തോന്നിയിട്ടുണ്ടെന്ന് പറഞ്ഞിട്ടില്ല. ഈ മരം വലുതാണ് മറ്റേത് ചെറുതും എന്നിട്ടും ഒരു പിറുപിറുക്കലും ഞാനിതുവരെ കേട്ടിട്ടില്ല. കാരണമെന്താണ്?'

അപ്പോള്‍ ഭടന്‍ പറഞ്ഞു 'അവര്‍ക്ക് പരസ്പരം താരതമ്യപ്പെടുത്താന്‍ കഴിയില്ല'

അപ്പോള്‍ ഗുരു 'ഇനി നിങ്ങള്‍ നേരത്തേ ചോദിച്ച ചോദ്യത്തിന് ഞാന്‍ ഉത്തരം നല്‍കേണ്ടതില്ല, ഉത്തരം നിങ്ങള്‍ക്കറിയാം.'