പെണ്‍കുട്ടിയുടെ ധ്യാനം

ഒരിക്കല്‍ ബോധിസത്വനായ മഞ്ജുശ്രീ ബുദ്ധസഭയില്‍ സന്ദര്‍ശനത്തിനെത്തി. മഞ്ജുശ്രീ എത്തുമ്പോഴേയ്ക്കും സഭ പിരിയുകയും മിക്കവാറും എല്ലാവരും പോവുകയും ചെയ്തിരുന്നു. ബുദ്ധനും ധ്യാനിയ്ക്കുന്ന ഒരു പെണ്‍കുട്ടിയും മാത്രമേ അവിടെയുണ്ടായിരുന്നുള്ളു.

അതിഗാഡമായ ധ്യാനത്തിലായിരുന്നു പെണ്‍കുട്ടി. ഇത് കണ്ട് മഞ്ജുശ്രീയ്ക്ക് അതിശയം തോന്നി. തനിയ്ക്ക് പോലും ഇതുവരെ എത്തിപ്പെടാന്‍ കഴിയാത്തതരത്തില്‍ ഇത്രയധികം ആഴത്തില്‍ ധ്യാനനിരതയാകാന്‍ ഈ പെണ്‍കുട്ടിയ്ക്ക് എങ്ങനെ കഴിയുന്നുവെന്ന് അദ്ദേഹം ബുദ്ധനോട് ചോദിച്ചു.

അപ്പോള്‍ പെണ്‍കുട്ടിയെ ധ്യാനത്തില്‍ നിന്നുണര്‍ത്തി അവരോട് തന്നെ കാര്യം ചോദിച്ചറിയാനായിരുന്നു ബുദ്ധന്റെ നിര്‍ദ്ദേശം. ഇത് കേട്ട മഞ്ജുശ്രീ ആദ്യം പെണ്‍കുട്ടിയ്ക്ക് ചുറ്റും മൂന്നുവട്ടം ആദരസൂചകമായി വലം വച്ചു. പിന്നീട് അവരെ ഉണര്‍ത്താനായി തന്റെ കൈകള്‍ നീട്ടി. പക്ഷേ പെണ്‍കുട്ടി ധ്യാനത്തില്‍ നിന്നുണര്‍ന്നില്ല, താന്‍ സ്വാംശീകരിച്ചിട്ടുള്ള മാന്ത്രിക സിദ്ധികളെല്ലാം മഞ്ജുശ്രീ പ്രയോഗിച്ചും ഒരുവേള പെണ്‍കുട്ടിയെ അദ്ദേഹം നിലത്തുനിന്നും ഉയര്‍ത്തുകയും ചെയ്തു. പക്ഷേ ഫലമൊന്നുമുണ്ടായില്ല. പെണ്‍കുട്ടി ധ്യാനം തുടര്‍ന്നു

ഈ സമയത്ത് ബോധോദയം ലഭിച്ചിട്ടില്ലാത്ത മോംയോയെന്ന വ്യക്തി ഭൂമിയ്ക്കടിയില്‍ നിന്നും കുതിച്ചെത്തുകയും ചെറിയൊരു വിരല്‍ഞൊടികൊണ്ട് പെണ്‍കുട്ടിയെ ധ്യാനത്തില്‍ നിന്നും ഉണര്‍ത്തുകയും ചെയ്തു.