പുല്ലിനും മരത്തിനും ബോധോദയം

Updated: Saturday, September 22, 2012, 12:21 [IST]

സെന്‍ ഗുരുവായ ഷിന്‍കാന്‍ ആദ്യത്തെ ആറുവര്‍ഷം ടെന്‍ഡായിയും പിന്നീട് ഏഴുവര്‍ഷം ബുദ്ധതത്വങ്ങളും പഠിച്ചു. അതുകഴിഞ്ഞ് ചൈനയിലേയ്ക്കുപോയ അദ്ദേഹം പതിമൂന്നു വര്‍ഷം ധ്യാനവുമായി കഴിഞ്ഞു. പിന്നീട് ജപ്പാനിലേയ്ക്കുതന്നെ തിരിച്ചെത്തിയ അദ്ദേഹത്തെ കാണാനും പലകാര്യങ്ങള്‍ ചോദിച്ചറിയാനും ആളുകള്‍ ആഗ്രഹിച്ചു. സന്ദര്‍ശകരുടെ ചോദ്യങ്ങള്‍ക്ക് വളരെ അപൂര്‍വ്വമായി മാത്രമേ അദ്ദേഹം പ്രതികരിച്ചിരുന്നുള്ളു.

ഒരിക്കല്‍ ബോധോദയം ആഗ്രഹിച്ചുനടക്കുന്ന അമ്പത് വയസ്സുള്ള ഒരാള്‍ ഷിന്‍കാനിനടുത്തെത്തി. അയാള്‍ ചോദിച്ചു 'വളരെ ചെറുപ്പം മുതലേ ഞാന്‍ ടെന്‍ഡായ് പഠിയ്ക്കുന്നുണ്ട്. പക്ഷേ അതിലെ ഒരു ആശയം ഇതേവരെ എനിയ്ക്ക് മനസിലായിട്ടില്ല. ടെന്‍ഡായിയില്‍ പറയുന്നത് പുല്ലിനും മരത്തിനും വരെ ബോധോദയമുണ്ടാകുമെന്നാണ്. എനിയ്ക്കിത് വളരെ വിചിത്രമായിട്ടാണ് തോന്നിയത്.'

ഇതുകേട്ടപ്പോള്‍ ഷിന്‍കാന്‍ പറഞ്ഞു 'പുല്ലിനും മരത്തിനും ബോധോദയമുണ്ടാകുന്നതെങ്ങനെയെന്ന് പറയേണ്ടതിന്റെ ആവശ്യമെന്താണ്. നിങ്ങള്‍ക്ക് എങ്ങനെ ബോധോദയം നേടാമെന്നതാണ് ചോദിക്കേണ്ടത്. നിങ്ങള്‍ അതിനെക്കുറിച്ച് ചിന്തിച്ചിട്ടുണ്ടോ?'

അപ്പോള്‍ സന്ദര്‍ശകന്‍ 'ഞാനൊരിയ്ക്കലും ആ രീതിയില്‍ ചിന്തിച്ചിട്ടില്ല.'

അപ്പോള്‍ ഷിന്‍കാന്‍ 'എന്നാല്‍ തിരിച്ചു വീട്ടിലേയ്ക്ക് പോയി അതിനെക്കുറിച്ച് ചിന്തിയ്ക്കൂ'