ആരാണ് യഥാര്‍ത്ഥ ശിഷ്യന്‍

Updated: Saturday, February 9, 2013, 20:47 [IST]

സെന്‍ ഗുരുവായ ഗറ്റന്‍ ശിഷ്യന്മാരെ മൂന്നായി തരംതിരിച്ചിട്ടുണ്ട്. ഇതില്‍ സെന്‍ തത്വങ്ങള്‍ മറ്റുള്ളവരില്‍ എത്തിക്കുന്നവരാണ് ആദ്യത്തെ വിഭാഗം, രണ്ടാമത്തേതാകട്ടെ സെന്‍ ക്ഷേത്രങ്ങളും വിഹാരങ്ങളും നോക്കി നടത്തുന്നവരാണ്. മൂന്നാമത്തെ വിഭാഗത്തില്‍ അദ്ദേഹം പെടുത്തിയിരിക്കുന്നത് സന്യാസിമാര്‍ കൊണ്ടുനടക്കുന്ന അരി സഞ്ചിയെയും ഉടയാടള്‍ തൂക്കിയിടുന്ന കൊളുത്തുകളേയുമാണ്.

ഇതേ പോലെ സെന്‍ ഗുരുവായ ഗസനും ശിഷ്യരെ തരംതിരിച്ചിട്ടുണ്ട്. പക്ഷേ ആ തരംതിരിവ് ഗുരുക്കന്മാരുമായി ബന്ധപ്പെടുത്തിയാണ് അദ്ദേഹം നടത്തിയിരിക്കുന്നത്.

സെന്‍ ഗുരുവായ ടെകിസുയിയ്ക്കു കീഴിലുള്ള പഠനകാലത്ത് ഗസാന്‍ ഏറെ കഷ്ടതകള്‍ അനുഭവിച്ചിട്ടുണ്ട്. സെന്‍ തത്വങ്ങള്‍ പഠിപ്പിക്കുന്നതിനിടെ ടെകിസുയി ശിഷ്യന്മാരെ ക്രൂരമായി മര്‍ദ്ദിച്ചിരുന്നു. പലപ്പോഴും ഗസന്‍നും പീഡനങ്ങള്‍ ഏറ്റിട്ടുണ്ട്. ശിഷ്യരില്‍ ചിലര്‍ ഗുരുവിന്റെ പീഡനം സഹിയ്ക്കവയ്യാതെ പഠനം പാതിയില്‍ നിര്‍ത്തിപ്പോവുകയും ചെയ്തു. എന്നാല്‍ എല്ലാം സഹിച്ച് ഗസന്‍ പഠനം തുടര്‍ന്നു.

ഗസന്‍ ശിഷ്യഗണത്തെ തരംതിരിച്ചിരിക്കുന്നത് ഇങ്ങനെയാണ്, പാവപ്പെട്ടവനായ ശിഷ്യന്‍ ഗുരുവിന്റെ സ്വാധീനത്തില്‍പ്പെടുന്നു, നല്ല ശിഷ്യര്‍ ഗുരുക്കന്മാരുടെ ദയാവായ്പിനെ സ്തുതിയ്ക്കുന്നു. എന്നാല്‍ സമര്‍ത്ഥരായ ശിഷ്യന്മാര്‍ അധ്യാപകരുടെ അച്ചടക്കനിയമത്തിന് കീഴില്‍ കരുത്തരായി വളരുന്നു.