സ്വര്‍ഗവും നരകവും

ഒരിക്കല്‍ ഭടനായ നൊബുഷിഗെ ഒരു സംശയ നിവാരണത്തിനായി സെന്‍ ഗുരുവായ ഹൗകിനടുത്തെത്തി. സ്വര്‍ഗവും നരകവും യഥാര്‍ത്ഥത്തിലുള്ള കാര്യങ്ങളാണോയെന്നായിരുന്നു നൊബുഷിഗെയ്ക്ക് അറിയേണ്ടിയിരുന്നത്.

ഭടന്റെ ചോദ്യം കേട്ട ഗുരു ചോദിച്ചു- 'നിങ്ങള്‍ ആരാണ?'

അപ്പോള്‍ നൊബുഷിഗെ- 'ഞാനൊരു ഭടനാണ്'

ഇതു കേട്ടപ്പോള്‍ ഗുരു ആശ്ചര്യത്തോടെ ചോദിച്ചു - 'ഹോ നിങ്ങള്‍ ഒരു ഭടനാണോ? ഏത് ഭരണാധികാരിയാണ് നിങ്ങളെ ഒരു ഭടനായി നിയമിച്ചിരിക്കുന്നത്, നിങ്ങളുടെ മുഖം കണ്ടാല്‍ ഒരു യാചകനെപ്പോലിരിക്കുന്നു.'

ഇതു കേട്ടതും നൊബുഷിഗേ രോഷാകുലനായി അരയില്‍ സൂക്ഷിച്ചിരുന്ന വാള്‍ വലിച്ചെടുക്കാന്‍ തുനിഞ്ഞു.

ഇതു കണ്ടപ്പോള്‍ ഗുരു വീണ്ടും നൊബുഷിഗേയുടെ രോഷം ഇരട്ടിപ്പുക്കുന്ന രീതിയില്‍ പറഞ്ഞു- 'ഹോ നിങ്ങളുടെ കയ്യില്‍ വാളുമുണ്ടോ, പക്ഷേ നിങ്ങളുടെ ആയുധം എന്റെ തലയറുക്കാന്‍ മാത്രം മതിയാകില്ല.'

ഇതുകൂടി കേട്ടപ്പോള്‍ ദേഷ്യം അടക്കാന്‍ കഴിയാതെ ഭടന്‍ വാള്‍ വലിച്ചൂരി

അതുകണ്ടപ്പോള്‍ ഗുരു പറഞ്ഞു - 'ഇവിടെയാണ് നരകത്തിന്റെ വാതില്‍ തുറക്കപ്പെടുന്നത്'

ഇതുകേട്ടപ്പോള്‍ നൊബുഷിഗേ പെട്ടെന്ന് മനസ്സാന്നിധ്യം വീണ്ടെടുക്കുകയും വാള്‍ യഥാസ്ഥാനത്ത് വെയ്ക്കുകയും ചെയ്തു.

അപ്പോള്‍ ഗുരു വീണ്ടും പറഞ്ഞു- 'ഇവിടെ സ്വര്‍ഗ കവാടം തുറക്കപ്പെടുന്നു.'