അഹംഭാവത്തിന്റെ നിര്‍വ്വചനം

Short Story

oi-Saritha

By Veena

Updated: Monday, August 20, 2012, 10:39 [IST]

ടാങ് സാമ്രാജ്യത്തിലെ പ്രധാനമന്ത്രി ഒരു ഭരണധികാരിയെന്ന നിലയിലും ഒരു സൈനിക മേധാവിയെന്ന നിലയിലും ഏറെ പേരെടുത്ത ഒരാളായിരുന്നു. ദേശീയ നായകനെന്ന നിലയിലായിരുന്നു അദ്ദേഹം കണക്കാക്കപ്പെട്ടിരുന്നത്. ഇത്രയേറെ പ്രശസ്തനും അധികാരം കയ്യാളുവന്നവനുമൊക്കെയാണെങ്കിലും അദ്ദേഹം വളരെ വിനീതനായ ഒരു ബുദ്ധവിശ്വാസിയായിരുന്നു.

ഇടക്കിടെ ബുദ്ധ തത്വങ്ങള്‍ പഠിയ്ക്കുന്നതിനായി അദ്ദേഹം തനിയ്‌ക്കേറെ ഇഷ്ടമുള്ള സെന്‍ ഗുരുവിനടുത്തുചെല്ലുക പതിവായിരുന്നു. ഗുരുവും പ്രധാനമന്ത്രിയും തമ്മില്‍ വളരെ നല്ല ബന്ധമാണുണ്ടായിരുന്നത്. താന്‍ ഒരു പ്രധാനമന്ത്രിയാണെന്ന ഭാവമൊന്നും കൂടാതെ വളരെ വിനീതനായ ശിഷ്യനായിട്ടായിരുന്നു അദ്ദേഹം ഗുരുവിനടുത്തിരുന്ന് കാര്യങ്ങള്‍ മനസ്സിലാക്കിയത്.

ഒരു ദിവസം പതിവ് സന്ദര്‍ശനത്തിനെത്തിയപ്പോള്‍ പ്രധാനമന്ത്രി ഗുരുവിനോട് ബുദ്ധിസത്തില്‍ ഞാനെന്ന ഭാവത്തിന്റെ അര്‍ത്ഥമെന്താണെന്ന് ചോദിച്ചു. ഇതുകേട്ടപ്പോള്‍ ഗുരുവിന്റെ മുഖം ആകെ മാറി, സ്ഥലകാലബോധമില്ലാത്തവണ്ണം രോഷാകുലനായി അദ്ദേഹം ഉച്ചത്തില്‍ ചോദിച്ചു-' എന്തൊരു വിവരംകെട്ട ചോദ്യമാണിത്?'. പ്രധാനമന്ത്രിയെ കൊച്ചാക്കുന്നതരത്തിലായിരുന്നു ഗുരുവിന്റെ പ്രവൃത്തി.

ഗുരുവില്‍ നിന്നുമുണ്ടായ അപ്രതീക്ഷിത പ്രതികരണം പ്രധാനമന്ത്രിയെ രോഷാകുലനാക്കി. അതുകണ്ട ഗുരു അതുവരെയുള്ള ഭാവം മാറ്റി ശാന്തനായി പറഞ്ഞു ഇതാ ഇതുതന്നെയാണ് ചോദ്യത്തിന്റെ ഉത്തരം, നിങ്ങളിലിപ്പോള്‍ ഉണ്ടായിരിക്കുന്ന ഭാവമാണ് അഹമെന്ന ഭാവം.