ഒരു സ്ത്രീയും രണ്ട് ഭിക്ഷുക്കളും

Short Story

oi-Saritha

By Veena

Updated: Monday, August 6, 2012, 4:46 [IST]

യാത്രചെയ്യുകയായിരുന്ന രണ്ട് ഭിക്ഷുക്കള്‍ ഒരു നദിക്കരയിലെത്തി, അവിടെവച്ച് അവര്‍ ഒരു യുവതിയെ കണ്ടുമുട്ടി. നല്ല ഒഴുക്കുള്ള നദി മുറിച്ചുകടക്കാനുള്ള വഴിആലോചിച്ചു നില്‍ക്കുകയായിരുന്നു യുവതി. ഭിക്ഷുക്കളെ കണ്ടപ്പോള്‍ തന്നെ എടുത്തുകൊണ്ട് നദി കടക്കാമോയെന്ന് യുവതി ചോദിച്ചു.

ഭിക്ഷുക്കളില്‍ ഒരാള്‍ക്ക് ഇതുകേട്ടപ്പോള്‍ വല്ലായ്മയായി. എന്നാല്‍ യുവതി പറഞ്ഞത് കേള്‍ക്കേണ്ട താമസം രണ്ടാമന്‍ അവരെ എടുത്ത് തന്റെ ചുമലിലേറ്റിക്കൊണ്ട് നദി കടന്ന് അക്കരെയെത്തി. നന്ദി പറഞ്ഞ യുവതി എങ്ങോട്ടോ പോവുകയും ചെയ്തു.

അവര്‍ പോയതിന് പിന്നലെ ഭിക്ഷുക്കളും തങ്ങളുടെ യാത്ര തുടര്‍ന്നു. ഇവരില്‍ ഒന്നാമന്‍ ആലോചനാമഗ്നനായിട്ടാണ് പിന്നീട് നടന്നത്. കുറേ നേരം ഒന്നും മിണ്ടാതെ നടന്ന ഇദ്ദേഹം പെട്ടെന്ന് രണ്ടാമനോടായി പറഞ്ഞു - 'സഹോദരാ നമ്മള്‍ ആത്മീയതയില്‍ പരിശീലനം നേടുന്നവരാണ്. സ്ത്രീകളുമായി ഒരുവിധത്തിലുള്ള ബന്ധവും പാടില്ലെന്ന് നമ്മള്‍ പഠിച്ചിട്ടുണ്ട്. പക്ഷേ നിങ്ങള്‍ സ്വന്തം ചുമലില്‍ ഒരു സ്ത്രീയെ വഹിച്ചു'.

അപ്പോള്‍ രണ്ടാമന്‍- 'ഒരു സ്ത്രീയെ ചുമലില്‍ എടുത്ത് നദി കടത്തിയെന്നത് ശരിയാണ് പക്ഷേ ഞാനവരെ ഇക്കരെയെത്തിച്ച് യാത്ര പറയുകയും ചെയ്തു. പക്ഷേ നിങ്ങള്‍ ഇപ്പോഴും അവളെ ചുമന്നുകൊണ്ട് നടക്കുകയാണോ?'

(ചിലയിടങ്ങളില്‍ ഈ കഥയില്‍ പറയുന്ന നദിയ്ക്ക് പകരം ഒരു ചതുപ്പ് കുറുകെ കടന്നുവെന്നാണ് പറയുന്നത്)