ഐശ്വര്യത്തിന്റെ പൊരുള്‍

Short Story

oi-Saritha

By Veena

Updated: Thursday, July 5, 2012, 12:12 [IST]

ഒരിക്കല്‍ ഒരു സമ്പന്നന്‍ ഒരു സെന്‍ ഗുരുവിനോട് വരും വര്‍ഷങ്ങളില്‍ തന്റെ കുടുംബത്തിന് അഭിവൃദ്ധിയും ഐശ്വര്യവുമുണ്ടാക്കുന്ന എന്തെങ്കിലും എഴുതി നല്‍കാന്‍ ആവശ്യപ്പെട്ടു. കുടുംബത്തിന് തലമുറകളോളം നേട്ടമുണ്ടാക്കുന്ന എന്തെങ്കിലും സൂക്തങ്ങള്‍ എഴുതി നല്‍കണമെന്നായിരുന്നു സമ്പന്നന്റെ ആവശ്യം.

ഇദ്ദേഹത്തിന്റെ ആവശ്യപ്രകാരം ഒരു വലിയ കഷണം കടലാസില്‍ ഗുരു ഇങ്ങനെ എഴുതി- 'അച്ഛന്‍ മരിച്ചു, മകന്‍ മരിച്ചു, കൊച്ചുമകന്‍ മരിച്ചു'.

ഇതുകണ്ട് ദേഷ്യം വന്ന സമ്പന്നന്‍ താന്‍ കുടുംബത്തിന് ഐശ്വര്യവും സന്തോഷവും കൈവരുവാനുള്ള കാര്യം ആവശ്യപ്പെട്ടിട്ട് എന്താണിങ്ങനെ നിരാശയുണ്ടാക്കുന്ന കാര്യം എഴുതിത്തന്നതെന്ന് ഗുരുവിനോട് ചോദിച്ചു.

അപ്പോള്‍ ഗുരു പറഞ്ഞത് ഇങ്ങനെയാണ് - "നിങ്ങളുടെ മകന്‍ നിങ്ങളേക്കാള്‍ മുമ്പേ മരിച്ചാല്‍ അത് നിങ്ങളുടെ കുടുംബത്തിന് വലിയ ദുഖമാകും. നിങ്ങളുടെ മകന്റെ മരണത്തിന് മുമ്പേ കൊച്ചുമകന്‍ മരിച്ചാല്‍ അതും വലിയ സങ്കടമായിത്തീരും.

എന്നാല്‍ ഞാന്‍ എഴുതിയ പ്രകാരത്തില്‍ ആദ്യം നിങ്ങളും പിന്നീട് നിങ്ങളുടെ മകനും അതിന് ശേഷം കൊച്ചുമകനും മരിക്കുകയാണെങ്കില്‍ അത് തീര്‍ത്തും പ്രകൃത്യാ ഉള്ള ജീവിതചക്രമായിത്തീരും. അപ്പോള്‍ മാത്രമേ യഥാര്‍ത്ഥ സന്തോഷവും ഐശ്വര്യവും കുടുംബത്തിന് കൈവരുകയുള്ളു".