ശനി, ശിവ ആരാധനയ്ക്ക് അത്യുത്തമ ദിനം; ഭാഗ്യം മാത്രം സമ്മാനിക്കുന്ന ശ്രാവണ ശനി പ്രദോഷം

ശ്രാവണ മാസത്തില്‍ ശിവപൂജയാല്‍ അന്തരീക്ഷം ഭക്തിസാന്ദ്രമാകുന്നു. ഈ മാസം ശിവാരാധനയ്ക്കായി സമര്‍പ്പിച്ചിരിക്കുന്ന കാലമാണ്. ശ്രാവണ മാസത്തിലെ തിങ്കളാഴ്ചകളില്‍ ആരാധിക്കുന്നത് കൂടുതല്‍ ഗുണം ചെയ്യും. ഇതുകൂടാതെ, പ്രദോഷ നാളായ ശിവരാത്രി നാളിലും ശിവനെ പ്രത്യേകം ആരാധിക്കുന്നു. ഇത്തവണ ശ്രാവണ മാസത്തിലെ കൃഷ്ണപക്ഷത്തില്‍ പ്രദോഷവും ശിവരാത്രിയും വരുന്നത് ഒരേ ദിവസമാണ്. ഇത് വളരെ അപൂര്‍വ്വമായി കണക്കാക്കപ്പെടുന്നു.

ശിവഭക്തര്‍ക്ക് ഏറെ ഗുണം ചെയ്യുന്ന തരത്തില്‍ രണ്ട് തീയതികളും ഒന്നിച്ചുള്ള യോഗമാണ് രൂപീകരിക്കപ്പെടുന്നത്. ജൂലൈ 15 ശ്രാവണ കൃഷ്ണ പക്ഷത്തിന്റെയും ശനിയാഴ്ചയുടെയും ത്രയോദശി തിഥിയാണ്. ഈ ദിവസം രാവിലെ 8.21ന് വൃദ്ധിയോഗവും തുടര്‍ന്ന് ധ്രുവയോഗവും നടക്കും. ഇത്തണ ജൂലൈ 15ന് ശ്രാവണ ശനിപ്രദോഷ വ്രതം ആചരിക്കും. ശ്രാവണ ശനി പ്രദോഷ വ്രതത്തിന്റെ ശുഭസമയം, ആരാധനാ രീതി എന്നിവ ഇവിടെ നിങ്ങള്‍ക്ക് വായിച്ചറിയാം.

പ്രദോഷത്തിന്റെ പൂജാ സമയം
ശനി കൃഷ്ണ പ്രദോഷം ജൂലൈ 15 വൈകുന്നേരം 06:43 മുതല്‍ 08:32 വരെ 01:49 മിനിറ്റ് ആയിരിക്കും. ത്രയോദശി തിഥി ജൂലൈ 14 വെള്ളിയാഴ്ച 07:17 മുതല്‍ ആരംഭിക്കും, ത്രയോദശി തിഥി ജൂലൈ 15, ശനിയാഴ്ച 08:32 ന് അവസാനിക്കും. പ്രദോഷ തീയതി ജൂലൈ 14ന് ലഭ്യമല്ല, അതിനാല്‍ ഈ വ്രതം 15-ന് ആചരിക്കും.

ശ്രാവണ ശനി പ്രദോഷ വ്രതം പൂജാരീതി
ശ്രാവണ പ്രദോഷ വ്രത നാളില്‍ അതിരാവിലെ എഴുന്നേറ്റ് കുളിയും മറ്റും കഴിഞ്ഞ് വൃത്തിയുള്ള വസ്ത്രം ധരിച്ച് ആരാധിക്കുക. ഇതിനുശേഷം പൂജാമുറിയില്‍ വിളക്ക് കൊളുത്തി വ്രതാനുഷ്ഠാനം നടത്തുക. പ്രദോഷകാലത്ത് ദിവസം മുഴുവന്‍ വ്രതമനുഷ്ഠിച്ച് ശിവനെ ആരാധിക്കുക. തുടര്‍ന്ന് പ്രദോഷകാലത്ത് സന്ധ്യാസമയത്ത് പാല്‍, തൈര്, നെയ്യ്, തേന്‍, ഗംഗാജലം എന്നിവ കലര്‍ത്തി പഞ്ചാമൃതം കൊണ്ട് ശിവലിംഗത്തെ അഭിഷേകം ചെയ്യുക.

ഭാംഗ്, ഉമ്മം, കൂവള പുഷ്പം, നൈവേദ്യം എന്നിവ ശിവന് സമര്‍പ്പിക്കുക. ഇതിനുശേഷം ശിവവിഗ്രഹത്തിന് സമീപം വിളക്ക് കത്തിച്ച് പ്രദോഷ വ്രതത്തിന്റെ കഥ വായിക്കുകയോ കേള്‍ക്കുകയോ ചെയ്യുക. അവസാനം ശിവന്റെ ആരതി നടത്തി ആരാധന അവസാനിപ്പിക്കുക.

പ്രദോഷ വ്രതത്തിന്റെ ഫലം
പ്രദോഷ വ്രതത്തിന് വിവിധ ദിവസങ്ങള്‍ക്കനുസരിച്ച് വ്യത്യസ്ത പ്രാധാന്യമുണ്ട്. ഈ വ്രതം ആചരിക്കുന്ന ദിവസം അനുസരിച്ച് അതിന്റെ പേരും പ്രാധാന്യവും കൂടുതല്‍ വര്‍ദ്ധിക്കുന്നതായി വിശ്വസിക്കപ്പെടുന്നു. ഈ വ്രതം വളരെ ശുഭകരവും ഗുണകരവുമായി കണക്കാക്കപ്പെടുന്നു. ഈ ദിവസം ശിവനെ ആരാധിക്കുന്നത് നിങ്ങളുടെ എല്ലാ വിഷമതകളും അകറ്റുന്നു. ത്രയോദശി രാത്രിയുടെ ആദ്യപാദത്തില്‍ നിവേദ്യവുമായി ശിവവിഗ്രഹ ദര്‍ശനം നടത്തുന്നയാള്‍ക്ക് ജീവിതത്തില്‍ സന്തോഷം ലഭിക്കുമെന്ന് പറയപ്പെടുന്നു.

എപ്പോഴാണ് പ്രദോഷകാലം
സൂര്യാസ്തമയത്തിന് ശേഷവും രാത്രിയാകുന്നതിന് മുമ്പും വരുന്ന സമയത്തെയാണ് പ്രദോഷകാലം എന്ന് പറയുന്നത്. സൂര്യാസ്തമയത്തിന് 45 മിനിറ്റ് മുമ്പ് മുതല്‍ സൂര്യാസ്തമയത്തിനു ശേഷമുള്ള 45 മിനിറ്റ് വരെ പ്രദോഷകാലമായി കണക്കാക്കപ്പെടുന്നു. പ്രദോഷ വ്രതം എല്ലാ മാസത്തിലും രണ്ട് തവണ വരുന്നു. പ്രദോഷ സമയത്ത് കൈലാസ പര്‍വ്വതത്തില്‍ സ്ഥിതി ചെയ്യുന്ന തന്റെ ഭവനില്‍ ശിവന്‍ നൃത്തം ചെയ്യുന്നു. ഇക്കാരണത്താല്‍ ഭക്തര്‍ ശിവനെ പ്രീതിപ്പെടുത്താന്‍ പ്രദോഷവ്രതം ആചരിക്കുന്നു. ഈ വ്രതം അനുഷ്ഠിക്കുന്നതിലൂടെ ഒരു വ്യക്തിയുടെ എല്ലാ പ്രശ്നങ്ങളും നീങ്ങും.

ശനിദോഷം നീങ്ങുന്നു
ശ്രാവണ മാസത്തില്‍ പ്രദോഷ വ്രതം ആചരിക്കുന്നത് വളരെ ശുഭകരമാണ്. ഇതിലൂടെ ശിവന്റെ പ്രത്യേക കൃപ നിങ്ങളില്‍ നിലനില്‍ക്കുന്നു. ശിവരാത്രി പ്രദോഷത്തോടൊപ്പം ശനിയാഴ്ചയും വന്നാല്‍, അന്നേ ദിവസം പൂജിക്കുന്നത് സന്താന ഗുണം നല്‍കും. ജാതകത്തില്‍ ശനിയുടെ ഏഴരശനി, കണ്ടകശനി എന്നിവയുള്ളവര്‍ ഈ ദിവസം ശിവനെ ആരാധിക്കണം. ഇങ്ങനെ ചെയ്താല്‍ ശനിയുടെ ദോഷഫലം കുറയുന്നതായിരിക്കും.

നിഴല്‍ ദാനം ചെയ്യുക
ശനി പ്രദോഷ ദിനത്തില്‍ നിഴല്‍ ദാനം ചെയ്യുന്നതിന് പ്രത്യേക പ്രാധാന്യമുണ്ട്. അതുകൊണ്ട്, ശനി പ്രദോഷ വ്രത നാളില്‍ ഒരു പാത്രത്തില്‍ കടുകെണ്ണ പുരട്ടി അതില്‍ നിങ്ങളുടെ നിഴല്‍ കാണുകയും ഈ എണ്ണ ശനി ക്ഷേത്രത്തില്‍ ദാനം ചെയ്യുകയും ചെയ്യുക. എണ്ണ ദാനം ചെയ്യുമ്പോള്‍ അതില്‍ ഒരു രൂപ നാണയം ഇടുക.

ശിവലിംഗത്തില്‍ കൂവള ഇല അര്‍പ്പിക്കുക
ശനി പ്രദോഷ വ്രത ദിനത്തില്‍ ശിവലിംഗത്തില്‍ 108 കൂവള ഇല സമര്‍പ്പിക്കുക. ശനിയാഴ്ച ഇത് ചെയ്യുന്നത് വളരെ നല്ലതാണെന്നാണ് പറയപ്പെടുന്നത്. വേണമെങ്കില്‍ നിങ്ങള്‍ക്ക് കറുത്ത ഷൂസ്, കറുത്ത വസ്ത്രങ്ങള്‍, ശനിയുമായി ബന്ധപ്പെട്ട വസ്തുക്കള്‍ എന്നിവ ദാനം ചെയ്യാം. ഇത് ചെയ്യുന്നതിലൂടെ ശനിദേവന്റെ പ്രത്യേക അനുഗ്രഹം നിങ്ങളില്‍ നിലനില്‍ക്കുമെന്ന് പറയപ്പെടുന്നു.

കറുത്ത നായക്ക് ഭക്ഷണം
ബിസിനസ്സില്‍ അടിക്കടി നിങ്ങള്‍ പരാജയം നേരിടുന്നുണ്ടെങ്കില്‍, ശനി പ്രദോഷ വ്രതത്തില്‍ കറുത്ത നായയ്ക്ക് മധുര ഭക്ഷണം നല്‍കുക. ഈ പ്രതിവിധി ചെയ്താല്‍ നിങ്ങളുടെ ഉറങ്ങിക്കിടന്ന ഭാഗ്യം ഉണരും. ബിസിനസ് കുതിച്ചുയരും.

ദാനം ചെയ്യുക
ശനി പ്രദോഷ വ്രത നാളില്‍ ആവശ്യക്കാര്‍ക്ക് ഭക്ഷണവും വെള്ളവും ദാനം ചെയ്യണം. ഇത് ചെയ്യുന്നതിലൂടെ നിങ്ങളുടെ കുടുംബത്തില്‍ സന്തോഷവും ഐശ്വര്യവും നിലനില്‍ക്കും.