ശുഭയോഗങ്ങള്‍ നിറഞ്ഞ മിഥുന സംക്രാന്തി; സൂര്യദേവന്റെ അനുഗ്രഹം നല്‍കിത്തരും അപൂര്‍വ്വ ഭാഗ്യം

Mithun Sankranti 2023: നവഗ്രഹങ്ങളുടെ രാജാവായി സൂര്യനെ കണക്കാക്കുന്നു. സൂര്യന്‍ എല്ലാ മാസവും അതിന്റെ രാശി മാറുന്നു. ഇതിനെ സംക്രാന്തി എന്ന് വിളിക്കുന്നു. ജൂണ്‍ 15ന് സൂര്യന്‍ മിഥുന രാശിയിലേക്ക് പ്രവേശിക്കും. ഈ ദിവസം മിഥുന സംക്രാന്തിയായി അറിയപ്പെടും. ഒരു വ്യക്തിയുടെ ജാതകത്തില്‍ സൂര്യന്‍ ആധിപത്യം പുലര്‍ത്തിയാല്‍ അവര്‍ക്ക് ജീവിതത്തില്‍ ധാരാളം നേട്ടങ്ങള്‍ ലഭിക്കുന്നു.

സൂര്യദേവനെ ഒരു നേരിട്ടുള്ള ദേവന്റെ രൂപത്തിലാണ് ആരാധിക്കുന്നത്. സൂര്യദേവന്‍ അനുഗ്രഹം ചൊരിയുന്ന വ്യക്തിയാണെന്ന് വിശ്വസിക്കപ്പെടുന്നു. മിഥുന സംക്രാന്തിയുടെ പുണ്യ കാലവും ആരാധനാരീതിയും പ്രാധാന്യവും എന്താണെന്ന് ഈ ലേഖനത്തില്‍ നിങ്ങള്‍ക്ക് വായിച്ചറിയാം.

മിഥുന സംക്രാന്തി ശുഭസമയം
ഇത്തവണ മിഥുന സംക്രാന്തി ജൂണ്‍ 15 വ്യാഴാഴ്ചയായിരിക്കും. ഇതിന്റെ പുണ്യകാലവും മഹാപുണ്യകാലവും വൈകുന്നേരം 6.29 മുതല്‍ 7.20 വരെയായിരിക്കും. കഴിഞ്ഞ വര്‍ഷവും ജൂണ്‍ 15ന് തന്നെ മിഥുന സംക്രാന്തി വന്നിരുന്നു എന്നതാണ് പ്രത്യേകത. മിഥുന സംക്രാന്തി ദിനത്തില്‍ സുകര്‍മ്മ, ധൃതി യോഗകള്‍ രൂപപ്പെടുന്നു, രണ്ട് യോഗങ്ങളും വളരെ ശുഭകരമായി കണക്കാക്കുന്നു.

ഈ യോഗങ്ങളില്‍ ചെയ്യുന്ന പ്രവൃത്തികള്‍ വിജയം നല്‍കുന്നു. മിഥുന സംക്രാന്തി നാളില്‍ ആരംഭിക്കുന്ന സുകര്‍മയോഗം അടുത്ത ദിവസം ജൂണ്‍ 16 ന് പുലര്‍ച്ചെ 2.03 വരെ തുടരും. ജൂണ്‍ 17 ന് പുലര്‍ച്ചെ 1.23 വരെ ധൃതി യോഗം തുടരും. ജൂണ്‍ 15ന് ഉച്ചയ്ക്ക് 2.51 മുതല്‍ 3.45 വരെ വിജയ മുഹൂര്‍ത്തവുമുണ്ട്. ഈ പ്രത്യേക യോഗവും മുഹൂര്‍ത്തവും ഈ ദിവസത്തെ വളരെ ശുഭകരമാക്കുന്നു.

മിഥുന സംക്രാന്തിയുടെ പ്രാധാന്യം
ഹിന്ദു വിശ്വാസപ്രകാരം, എല്ലാ സംക്രാന്തി ദിനങ്ങളിലും സൂര്യഭഗവാനെ ആരാധിക്കുന്നതിനും ദാനധര്‍മ്മങ്ങള്‍ നടത്തുന്നതിനും പ്രത്യേക പ്രാധാന്യമുണ്ട്. ജീവകാരുണ്യ പ്രവര്‍ത്തനങ്ങളുടെ കാര്യത്തിലും മിഥുന സംക്രാന്തി വളരെ പ്രധാനമാണ്. ഈ ദിവസം സൂര്യദേവനെയും മഹാവിഷ്ണുവിനെയും ആരാധിക്കുന്നത് ഉത്തമമായി കണക്കാക്കുന്നു.

ഈ ദിനം പ്രകൃതിയിലെ മാറ്റത്തെയും സൂചിപ്പിക്കുന്നു. സാധാരണയായി മഴക്കാലം ആരംഭിക്കുന്ന സമയമാണിത്. സൂര്യന്‍ കാര്‍ത്തിക നക്ഷത്രത്തില്‍ നിന്ന് രോഹിണിയിലേക്ക് നീങ്ങുമ്പോള്‍ തന്നെ മഴയ്ക്കുള്ള സാധ്യത വര്‍ദ്ധിക്കുന്നു. ഈ ദിവസം കര്‍ഷകര്‍ സൂര്യഭഗവാനെ പ്രാര്‍ത്ഥിച്ച് വ്രതമനുഷ്ഠിച്ച്, നല്ല മഴയ്ക്ക് വേണ്ടി പ്രാര്‍ത്ഥിച്ചുകൊണ്ട് രാജ ഉത്സവം ആഘോഷിക്കുന്നു. ഈ ദിവസം പുണ്യനദിയില്‍ കുളിച്ച് സൂര്യനെ പ്രാര്‍ത്ഥിക്കുന്നത് ജീവിതത്തില്‍ ഐശ്വര്യവും സമൂഹത്തില്‍ അന്തസ്സും വര്‍ദ്ധിപ്പിക്കുമെന്ന് വിശ്വസിക്കപ്പെടുന്നു.

മിഥുന സംക്രാന്തി പൂജാവിധി
ഈ ദിവസം രാവിലെ സൂര്യോദയത്തിന് മുമ്പ് എഴുന്നേറ്റ് കുളിച്ച് ധ്യാനിച്ച് ചെമ്പ് പാത്രത്തില്‍ സൂര്യന് അര്‍ഘ്യം അര്‍പ്പിക്കുക. ചുവന്ന പുഷ്പങ്ങള്‍, ചന്ദനം, ചന്ദനത്തിരി, വിളക്ക് എന്നിവ അര്‍പ്പിച്ച ശേഷം സൂര്യഭഗവാന്റെ പ്രീതിക്കായി 7 തവണ പ്രദക്ഷിണം ചെയ്യുക. സൂര്യഭഗവാനെ പൂജിച്ചതിന് ശേഷം അവശേഷിക്കുന്ന വെള്ളം ചെടികള്‍ക്ക് സമര്‍പ്പിക്കുക.

ഈ ദിവസം ഭൂമിദേവിയെയും ഭക്തര്‍ ആരാധിക്കുന്നു. ശര്‍ക്കര, അരിപ്പൊടി, നാളികേരം, നെയ്യ് എന്നിവകൊണ്ട് പലഹാരങ്ങള്‍ ഉണ്ടാക്കി ഭൂദേവിക്ക് നിവേദിക്കുന്നു. ഈ ദിവസം പൂര്‍വ്വികരുടെ ശ്രാദ്ധവും നടത്താറുണ്ട്. ഈ ദിവസം അരിയാഹാരം കഴിക്കില്ല. പാവപ്പെട്ട ബ്രാഹ്‌മണര്‍ക്ക് ദാനം ചെയ്യണം. ഈ ദിവസം പച്ചനിറത്തിലുള്ള വസ്തുക്കള്‍ ദാനം ചെയ്യുന്നത് നിങ്ങള്‍ക്ക് ഐശ്വര്യം വരുത്തും.

മിഥുന സംക്രാന്തി ശുഭപ്രവൃത്തികള്‍
സംക്രാന്തി ദിനത്തില്‍ രാവിലെ കുളിച്ച് ദാനം ചെയ്താല്‍ നിങ്ങളുടെ ജീവിതത്തില്‍ വിശേഷ ഗുണങ്ങളുണ്ടാകുന്നു. ഈ ദിവസം പുണ്യനദിയില്‍ സ്‌നാനം ചെയ്യുന്നയാള്‍ക്ക് കൂടുതല്‍ നേട്ടങ്ങള്‍ ലഭിക്കും. ജീവിതത്തില്‍ സന്തോഷത്തോടൊപ്പം സമ്പത്തും ഐശ്വര്യവും ലഭിക്കും. അന്നം, ധനം, വസ്ത്രം മുതലായ ദാനം ചെയ്യുന്നത് കണക്കില്ലാത്ത പുണ്യം നല്‍കുന്നുവെന്ന് പുരാണങ്ങളില്‍ പറഞ്ഞിട്ടുണ്ട്. ഈ ദിവസം പിതൃക്കള്‍ക്ക് വഴിപാട് നടത്തുന്നവര്‍ക്ക് പൂര്‍വ്വികരുടെ അനുഗ്രഹം ലഭിക്കും.

വിഷ്ണുവിനും ഭൂമി ദേവിക്കുമായി ഈ ദിവസം പ്രാര്‍ത്ഥനകള്‍ നടത്തുന്നത് ഒരു വ്യക്തിക്ക് ശുഭഫലങ്ങള്‍ നല്‍കുന്നു. ഈ ദിവസം ദരിദ്രര്‍ക്ക് വസ്ത്രങ്ങളും ഭക്ഷണവും ദാനം ചെയ്യുന്നത് വളരെ ശുഭമായി കണക്കാക്കപ്പെടുന്നു. മിഥുന സംക്രാന്തിയില്‍ പശുക്കളെ ദാനമായി നല്‍കുന്നത് വളരെ പവിത്രമായി കണക്കാക്കപ്പെടുന്നു. പലയിടത്തും മഴയെ സ്വാഗതം ചെയ്യുന്നതിനായി ആളുകള്‍ ഈ പുണ്യ വേളയില്‍ നഗ്നപാദരായി നടക്കുന്നു. ഒപ്പം മനോഹരമായ ഗാനങ്ങള്‍ ആലപിച്ച് നൃത്തവും ചെയ്യുന്നു.

മിഥുന സംക്രാന്തിയുടെ ആചാരങ്ങള്‍
വ്യത്യസ്ത സംസ്ഥാനങ്ങള്‍ക്ക് മിഥുന സംക്രാന്തിക്ക് വ്യത്യസ്ത പേരുകളുണ്ട്. വിവിധ പശ്ചാത്തലങ്ങളില്‍ നിന്നുള്ള ആളുകള്‍ വ്യത്യസ്ത പാരമ്പര്യങ്ങളോടെ അതിനെ അനുസ്മരിക്കുന്നു. കിഴക്കന്‍ ഇന്ത്യയിലും ഒഡീഷയിലും മിഥുന സംക്രാന്തി അറിയപ്പെടുന്നത് രാജ പര്‍ബ എന്നാണ്. മിഥുന സംക്രാന്തിയില്‍, സൂര്യന്റെ സ്ഥാനം ഇടവം രാശിയില്‍ നിന്ന് മിഥുനം രാശിയിലേക്ക് മാറുന്നു. ഈ ദിവസം ആളുകള്‍ സൂര്യഭഗവാനോട് നല്ല മഴയ്ക്കായി പ്രാര്‍ത്ഥിക്കുകയും ഉപവസിക്കുകയും ചെയ്യുന്നു.

മിഥുന്‍ സംക്രാന്തി നാളിലെ പരിഹാരങ്ങള്‍
* മിഥുന സംക്രാന്തി ദിനത്തില്‍ ദരിദ്രര്‍ക്ക് ദാനം ചെയ്യുന്നതിലൂടെ സൂര്യദേവന്റെ അനുഗ്രഹം ലഭിക്കും. ഈ ദിവസം പച്ചനിറത്തിലുള്ള വസ്തുക്കള്‍ ദാനം ചെയ്യുന്നതാണ് ഉത്തമം.
* മിഥുന സംക്രാന്തി ദിനത്തില്‍ ഉപ്പ് കഴിക്കാതെ വ്രതം അനുഷ്ഠിക്കണം. ഇത് നിങ്ങളുടെ ജീവിതത്തിലെ പ്രശ്‌നങ്ങള്‍ അവസാനിപ്പിക്കും.
* മിഥുന സംക്രാന്തി നാളില്‍ ചീര, പച്ച വസ്ത്രങ്ങള്‍ എന്നിവ ദാനം ചെയ്യുന്നത് ഐശ്വര്യകരമാണ്.