ദാമ്പത്യം വാഴില്ല, ഈ നക്ഷത്രക്കാര്‍ തമ്മിലുള്ള വിവാഹം ദുരിതതുല്യം; എന്നും കലഹവും വഴക്കും

പൊരുത്തം

വിവാഹം എന്ന പദത്തിന് വിശിഷ്ടമായ വഹനം എന്നാണ് അര്‍ത്ഥം. ഒരിക്കലും ഉപേക്ഷിക്കാന്‍ കഴിയാത്തതും ജീവിതാവസാനം വരെ കൂടെ കൊണ്ടുപോകേണ്ടതുമായ ബന്ധമാണ് വിവാഹത്തിലൂടെ രൂപപ്പെടുന്നത്. പൊതുവേ വിവാഹത്തിന് സ്ത്രീ പുരുഷന്മാരുടെ ജാതകങ്ങളെ മുന്‍നിര്‍ത്തിയുള്ള പൊരുത്ത പരിശോധന അനിവാര്യമാണ്. പൊരുത്തം എന്നാല്‍ തുല്യമായവ ചേര്‍ക്കുക എന്നേ അര്‍ത്ഥമാകുന്നുള്ളൂ. 23 പൊരുത്തങ്ങള്‍ ഉണ്ട്. എന്നാല്‍ വിവാഹത്തിന് അതില്‍ പത്തെണ്ണം നിര്‍ബന്ധമായി കണക്കാക്കുന്നു. ഇതില്‍ ഒരു പൊരുത്തമാണ് യോനിപൊരുത്തം. സ്ത്രീയോനീ നക്ഷത്രങ്ങളും പുരുഷ യോനിയും നക്ഷത്രങ്ങളും ഏതെല്ലാമാണ് നോക്കാം.

പുരുഷയോനി

അശ്വതി, ഭരണി, പൂയം, ആയില്യം, മകം, ഉത്രം, ചോതി, വിശാഖം, തൃക്കേട്ട, മൂലം, പൂരാടം, ഉത്രാടം, തിരുവോണം, പൂരുരുട്ടാതി എന്നീ നക്ഷത്രങ്ങള്‍ പുരുഷയോനി നക്ഷത്രങ്ങളാണ്. പുരുഷന്മാര്‍ പൊതുവെ പുരുഷ യോനി നക്ഷത്രങ്ങളില്‍ ജനിക്കുന്നത് അത്യുത്തമമാണെന്ന് പറയപ്പെടുന്നു. അത്തരക്കാര്‍ക്ക് ജീവിതത്തില്‍ നിരവധി ഭാഗ്യാനുഭവങ്ങള്‍ കൈവരുന്നു. സമ്പത്ത് വര്‍ദ്ധിക്കുന്നു. വിവിധ മാര്‍ഗങ്ങളിലൂടെ ജീവിതത്തില്‍ സാമ്പത്തിക ഉയര്‍ച്ച നേടാന്‍ സാധിക്കുന്നു. എന്നാല്‍ പലപ്പോഴും പലര്‍ക്കും ഇത് തിരിച്ചറിയാന്‍ സാധിക്കണമെന്നില്ല. ചിലര്‍ക്ക് അപ്രതീക്ഷിതമായ ധനയോഗങ്ങള്‍ ജീവിതത്തില്‍ വരുന്നു. അതിനാല്‍ പുരുഷയോനിയില്‍ പുരുഷന്‍മാര്‍ ജനിക്കുന്നത് അതിവിശേഷമായി കണക്കാക്കപ്പെടുന്നു.

സ്ത്രീയോനി

കാര്‍ത്തിക, രോഹിണി, മകീര്യം, തിരുവാതിര, പുണര്‍തം, പൂരം, അത്തം, ചിത്തിര, അനിഴം, അവിട്ടം, ചതയം, ഉത്രട്ടാതി രേവതി എന്നിവ സ്ത്രീയോനി നക്ഷത്രങ്ങളാണ്. സ്ത്രീകള്‍ സ്ത്രീയോനി നക്ഷത്രങ്ങളില്‍ ജനിക്കുന്നത് അതിവിശേഷമായി കണക്കാക്കുന്നു. അത്തരക്കാര്‍ക്ക് നിരവധി ഗുണങ്ങള്‍ ജീവിതത്തില്‍ ലഭിക്കുന്നു. സമ്പത്ത് വര്‍ധിക്കുന്നു. ജീവിതത്തില്‍ പലപ്പോഴും സാമ്പത്തികമായ നേട്ടങ്ങള്‍ അപ്രതീക്ഷിതമായി വന്നു ചേരുന്നു. യോനീപൊരുത്തത്താല്‍ ഉത്തമമായവര്‍ ആരെല്ലാമാണ് നമുക്ക് നോക്കാം.

ഉത്തമം

പുരുഷന്‍ ജനിച്ച പുരുഷ നക്ഷത്രങ്ങളും സ്ത്രീയോനിയില്‍ ജനിച്ച സ്ത്രീ നക്ഷത്രങ്ങളും തമ്മില്‍ വിവാഹത്തിന് യോനി പൊരുത്തം ഉത്തമമാണ്. ഇങ്ങനെ വിവാഹം നടത്തുന്നത് വളരെ ശുഭകരമാണ്. ഇവരുടെ ജീവിതത്തില്‍ എപ്പോഴും സ്‌നേഹവും ഐക്യവുമുണ്ടാകുന്നു. പലവിധത്തിലുള്ള വഴക്കുകള്‍ ജീവിതത്തില്‍ ഉണ്ടാകുമെങ്കിലും അതെല്ലാം ജീവിതത്തില്‍ നിന്ന് ഒഴിവായി പോകുന്നു. ഇത്തരക്കാര്‍ തമ്മിലുള്ള വിവാഹം അതിവിശേഷമാണ്. ജീവിതത്തില്‍ വന്നുചേരുന്ന ദുരിതങ്ങള്‍ അവര്‍ അറിയാതെ തന്നെ പലപ്പോഴും അവരില്‍ നിന്ന് ഒഴിഞ്ഞുപോകുന്നു. കൂടാതെ സാമ്പത്തിക ഉയര്‍ച്ചയും മറ്റു നേട്ടങ്ങളും കൈവരുന്നു.

മധ്യമം

ഇരുനക്ഷത്രക്കാരും സ്ത്രീയോനിയില്‍ ജനിച്ചവരാണ് എങ്കില്‍ അവര്‍ തമ്മിലുള്ള പൊരുത്തം മധ്യമമാണ്. ഇവരുടെ ജീവിതത്തില്‍ വലിയ കുഴപ്പങ്ങള്‍ ഇല്ലാതെ മുന്നോട്ടുപോകും. എങ്കിലും രോഗാവസ്ഥകള്‍ ജീവിതത്തില്‍ പലപ്പോഴും പിന്തുടരുന്നത് ഇത്തരക്കാരുടെ മനസ്സമാധാനം കെടുത്തും. രോഗദുരിതങ്ങളും സാമ്പത്തിക ക്ലേശങ്ങളും പലപ്പോഴും അനുഭവപ്പെടുന്നു.

അധമം

പങ്കാളികള്‍ ഇരുവരും പുരുഷ യോനി നക്ഷത്രങ്ങളിലാണ് ജനിച്ചത് എങ്കില്‍ അവര്‍ തമ്മിലുള്ള പൊരുത്തം അധമമാണ്. ഇങ്ങനെ സംഭവിക്കുന്നതിലൂടെ ഇത്തരക്കാരുടെ ജീവിതത്തില്‍ വഴക്കുകള്‍ വിട്ടുമാറില്ല. ജീവിതത്തില്‍ എപ്പോഴും മനസമാധാനക്കേട് വരുന്നു. ചെറിയ കാര്യങ്ങള്‍ക്ക് പോലും വീട്ടില്‍ കലഹം പതിവായിരിക്കും. അതിനാല്‍ പല ബുദ്ധിമുട്ടുകളും ഇവരുടെ ജീവിതത്തില്‍ വന്നുചേരുന്നു. തൊഴില്‍ തടസങ്ങള്‍, സാമ്പത്തിക ബുദ്ധിമുട്ടുകള്‍ എന്നിവ അനുഭവിക്കേണ്ടിവരുന്നു. പുരുഷ യോനിയില്‍ ജനിച്ച നക്ഷത്രക്കാര്‍ തമ്മില്‍ വിവാഹം കഴിക്കുന്നതിലൂടെ ദാമ്പത്യ ഐക്യം കുറയുന്നു.

അധമാധമം

പുരുഷന്‍ സ്ത്രീ യോനി നക്ഷത്രത്തിലും സ്ത്രീ പുരുഷയോനി നക്ഷത്രത്തിലും ജനിക്കുന്നവര്‍ ഒരിക്കലും വിവാഹം കഴിക്കുവാന്‍ പാടുള്ളതല്ല. ഇങ്ങനെ ചേര്‍ക്കുന്നതിലൂടെ വലിയ ദോഷമാണ് സംഭവിക്കുക. ആയുസ്സിനുവരെ ആപത്ത് വരുന്നു. സാമ്പത്തിക ബുദ്ധിമുട്ടുകള്‍ രോഗ ദുരിതങ്ങള്‍ എന്നിവ ജീവിതത്തില്‍ പതിവാകുന്നു.