ശിവചൈതന്യം ഭൂമിയിലൊഴുകും പുണ്യദിനം; ശിവരാത്രി ശുഭമുഹൂര്‍ത്തം, പൂജാവിധി, ആരാധനാരീതി

മഹാശിവരാത്രി 2023

ഈ വര്‍ഷത്തെ മഹാശിവരാത്രി ഉത്സവം ഫെബ്രുവരി 18, ശനിയാഴ്ച ആഘോഷിക്കും. ഈ ദിവസം യഥാര്‍ത്ഥ ഭക്തിയോടും വിശ്വാസത്തോടും കൂടി വ്രതമനുഷ്ഠിക്കുകയും ആരാധിക്കുയും ചെയ്യുന്ന ഭക്തരുടെ എല്ലാ ആഗ്രഹങ്ങളും നിറവേറ്റപ്പെടുമെന്ന് വിശ്വസിക്കുന്നു. എല്ലാത്തരം പ്രവൃത്തികളും ചെയ്യാന്‍ ഏറ്റവും മികച്ച ദിനമായി ശിവരാത്രി കണക്കാക്കപ്പെടുന്നു.

മഹാശിവരാത്രി 2023 ശുഭമുഹൂര്‍ത്തം

ഹിന്ദു കലണ്ടര്‍ പ്രകാരം ഇത്തവണ ഫെബ്രുവരി 18നാണ് മഹാശിവരാത്രി. ഇതോടൊപ്പം ശനി പ്രദോഷ വ്രതവും ഈ ദിവസം ആചരിക്കുന്നുണ്ട്. വിശ്വാസമനുസരിച്ച്, പ്രദോഷ വ്രതം ആചരിക്കുന്നതിലൂടെ ഭക്തരുടെ എല്ലാ ആഗ്രഹങ്ങളും പരമേശ്വരന്‍ നിറവേറ്റുകയും തന്റെ ഭക്തരെ സന്തോഷിപ്പിക്കുകയും ചെയ്യുന്നു.

മഹാശിവരാത്രിയിലെ ചതുര്‍ദശി തിഥി ഫെബ്രുവരി 18ന് രാത്രി 08:02-ന് ആരംഭിച്ച് ഫെബ്രുവരി 19ന് വൈകുന്നേരം 04:18-ന് അവസാനിക്കും.

നിഷിത കാല പൂജ: ഫെബ്രുവരി 19 ന് രാവിലെ 12:16 മുതല്‍ 1:06 വരെ ആയിരിക്കും.

മഹാശിവരാത്രി വ്രതം അവസാനിക്കുന്നത്: ഫെബ്രുവരി 19, ഞായറാഴ്ച രാവിലെ 06:57 മുതല്‍ 03:33 വരെ

മഹാശിവരാത്രി പൂജാവിധി

ബ്രാഹ്‌മമുഹൂര്‍ത്തത്തില്‍ കുളിച്ച ശേഷം പൂജാമുറി വൃത്തിയാക്കുക. ഇതിനു ശേഷം ചന്ദനം പുരട്ടി ശിവലിംഗം പഞ്ചാമൃതം കൊണ്ട് അഭിഷേകം ചെയ്യുക. മഹാശിവരാത്രി വ്രതത്തില്‍, ഒരു മണ്‍പാത്രത്തില്‍ വെള്ളമോ പാലോ നിറച്ച്, മുകളില്‍ കൂവള ഇല, അരി മുതലായവ ഇട്ട് ശിവലിംഗത്തിന് സമര്‍പ്പിക്കുക. നിങ്ങളുടെ വീടിനടുത്ത് ശിവക്ഷേത്രം ഇല്ലെങ്കില്‍, വീട്ടില്‍ ഒരു ശിവലിംഗം ഉണ്ടാക്കി പൂജിക്കുക.

ഇതിന് ശേഷം ശിവപുരാണം ചൊല്ലുകയും മഹാമൃത്യുഞ്ജയ മന്ത്രം അല്ലെങ്കില്‍ ശിവന്റെ പഞ്ചാക്ഷര മന്ത്രമായ ഓം നമ ശിവായ ജപിക്കുകയും ചെയ്യുക. ശിവപൂജയ്ക്ക് ശേഷം എള്ള്, അരി, നെയ്യ് എന്നിവ കലര്‍ത്തിയ വഴിപാട് സമര്‍പ്പിക്കുക. മഹാശിവരാത്രി ദിനത്തില്‍ രാത്രി വ്രതമെടുക്കുന്ന ഭക്തര്‍ ഉറക്കമൊഴിയണം. ഇത് ചെയ്യുന്ന ഭക്തരുടെ എല്ലാ ആഗ്രഹങ്ങളും സഫലമാകുമെന്നാണ് വിശ്വാസം.

ശിവലിംഗ പൂജ

പരമശിവന്റെ പ്രതീകമാണ് ശിവലിംഗം. ശിവ എന്നാല്‍ ക്ഷേമം, ലിംഗം എന്നാല്‍ സൃഷ്ടി. സംസ്‌കൃതത്തില്‍ ലിംഗ എന്നാല്‍ ചിഹ്നം എന്നാണ് അര്‍ത്ഥമാക്കുന്നത്. ശിവന്‍ നിത്യതയുടെ പ്രതീകമാണ്. വിശ്വാസമനുസരിച്ച്, ലിംഗം പ്രപഞ്ചത്തിന്റെ പ്രതീകമായി കണക്കാക്കപ്പെടുന്നു.

മഹാശിവരാത്രിയുടെ പ്രാധാന്യം

മഹാശിവരാത്രി ദിനത്തില്‍ ശിവനെ പ്രീതിപ്പെടുത്താനായി ഭക്തര്‍ വ്രതം അനുഷ്ഠിക്കുന്നു. ഈ ദിവസം വ്രതമനുഷ്ഠിച്ച് ആരാധനകള്‍ ചെയ്യുന്ന ഭക്തരില്‍ പരമേശ്വരന്‍ സന്തുഷ്ടനാകുകയും തന്റെ ഭക്തരെ അനുഗ്രഹിക്കുകയും ചെയ്യുന്നു. ഈ വ്രതം അനുഷ്ഠിക്കുന്നതിലൂടെ എല്ലാ ജന്മങ്ങളിലെയും പാപങ്ങളില്‍ നിന്ന് ഒരാള്‍ക്ക് മോചനം ലഭിക്കും. ആഗ്രഹിച്ച വരനെ ലഭിക്കാന്‍ ആഗ്രഹിക്കുന്ന പെണ്‍കുട്ടികള്‍ മഹാശിവരാത്രി വ്രതം അനുഷ്ഠിക്കണം. ഈ വ്രതം അനുഷ്ഠിക്കുന്നതിലൂടെ വിവാഹ സംബന്ധമായ എല്ലാ തടസ്സങ്ങളും നീങ്ങുന്നതായിരിക്കും.

മഹാശിവരാത്രിയില്‍ ഗ്രഹങ്ങളുടെ ചലനം

ഇത്തവണ മഹാശിവരാത്രിയില്‍ ശനി ഗ്രഹം അതിന്റെ രാശിയായ കുംഭത്തില്‍ ഇരിക്കും. കൂടാതെ ഫെബ്രുവരി 13ന് സൂര്യനും കുംഭ രാശിയില്‍ പ്രവേശിക്കും. അതായത് ഇത്തവണ മഹാശിവരാത്രിയില്‍ സൂര്യനും ശനിയും ഒരേ രാശിയായ കുംഭത്തില്‍ ഒന്നിച്ച് ഇരിക്കുന്നതിനാല്‍ സൂര്യ-ശനി സഖ്യത്തിന് രൂപം നല്‍കും. ജ്യോതിഷ പ്രകാരം ശനിയും സൂര്യനും ശത്രു ഗ്രഹങ്ങളാണ്. ഫെബ്രുവരി 15ന് ശുക്രനും മീനരാശിയില്‍ പ്രവേശിക്കും. അതായത് മഹാശിവരാത്രിയില്‍ ശുക്രന്‍ മീനം രാശിയിലായിരിക്കും. മാര്‍ച്ച് 12 വരെ ശുക്രന്‍ മീനം രാശിയിലായിരിക്കും. മഹാശിവരാത്രിയില്‍ ഈ ശുക്ര സംക്രമണം എല്ലാ രാശിക്കാര്‍ക്കും നല്ലതായിരിക്കുമെന്ന് വിശ്വസിക്കപ്പെടുന്നു.

ജോലിയിലെ പ്രശ്‌നങ്ങള്‍ നീങ്ങാന്‍

ശിവരാത്രി നാളില്‍ വെള്ളി കൊണ്ട് നിര്‍മ്മിച്ച ശിവലിംഗത്തെ ആരാധിക്കുക. ഈ ശിവലിംഗത്തെ വെള്ളം, പാല്‍, തൈര്, നെയ്യ്, തേന്‍, പഞ്ചസാര എന്നിവ ഉപയോഗിച്ച് അഭിഷേകം ചെയ്യുക. ഓം നമഃ ശിവായ മന്ത്രം 108 തവണയെങ്കിലും ജപിക്കുക. ഈ പ്രതിവിധി ചെയ്യുന്നതിലൂടെ, നിങ്ങളുടെ ജോലിയിലോ ബിസിനസ്സിലോ വരാനിരിക്കുന്ന പ്രശ്നങ്ങളില്‍ നിന്ന് നിങ്ങള്‍ക്ക് മോചനം ലഭിക്കും.

ഹനുമാന്‍ ചാലിസ

ഹനുമാന്‍ സ്വാമിയെ ശിവന്റെ അവതാരമായാണ് കണക്കാക്കുന്നത്. ശിവരാത്രിയില്‍ ഹനുമാന്‍ ചാലിസ പാരായണം ചെയ്യുന്നതിലൂടെ ഹനുമാന്‍ സ്വാമിയും ശിവനും സന്തുഷ്ടരാണ്. അവരുടെ കൃപയാല്‍ ഭക്തരുടെ എല്ലാ പ്രശ്‌നങ്ങളും നീക്കാന്‍ സാധിക്കുന്നു.