ശിവരാത്രി വ്രതമെടുക്കാം ഐശ്വര്യത്തിനായി

എന്താണ് ശിവരാത്രി

പാലാഴി മഥനത്തിനിടയ്ക്ക് ഉയര്‍ന്നു വന്ന കാളകൂട വിഷം ശിവന്‍ കഴിയ്ക്കുകയും ഇത് കണ്ട പാര്‍വ്വതീ ദേവി ശിവന്റെ കഴുത്തില്‍ പിടുത്തമിടുകയും ചെയ്തു. ഇതിനെ തുടര്‍ന്ന വിഷം ശരീരത്തെ ബാധിയ്ക്കാതിരിയ്ക്കാന്‍ ആ ദിവസം മുഴുവന്‍ ഉറക്കമൊഴിച്ചിരുന്നതിന്റെ ഫലമായാണ് ശിവരാത്രി ആഘോഷിക്കുന്നത്.

തലേദിവസം തുടക്കം

ശിവരാത്രിയുടെ തലേ ദിവസം തന്നെ വ്രതത്തിനുള്ള ചിട്ടകള്‍ ആരംഭിയ്ക്കണം. രാവിലെ കുളിച്ച് ശിവക്ഷേത്രത്തില്‍ ദര്‍ശനം നടത്തണം.

കുളിച്ച് ശുദ്ധിയോടെ

കുളിച്ച് ശുദ്ധിയോടു കൂടിയായിരിക്കണം വ്രതം ആരംഭിയ്‌ക്കേണ്ടത്. മാത്രമല്ല മത്സ്യ-മാംസാദികള്‍ നിര്‍ബന്ധമായും ഒഴിവാക്കേണ്ടതാണ്. മാത്രമല്ല വ്രതത്തെ ബാധിയ്ക്കുന്ന രീതിയിലുള്ള യാതൊരു വിധത്തിലുള്ള കാര്യങ്ങളും ചെയ്യാന്‍ പാടുള്ളതല്ല.

ശിവരാത്രി നാളില്‍

ശിവരാത്രി നാളില്‍ വ്രതമെടുക്കേണ്ട രീതിയാണ് വളരെ പ്രധാനം. ശ്രദ്ധയോടൊയും ചിട്ടയോടെയും വേണം ശിവരാത്രി വ്രതത്തിനു തുടക്കം കുറിക്കാന്‍. അല്ലാതെ വഴിപാടിനെടുക്കുന്ന വ്രതം ശിവരാത്രി വ്രതത്തിന്റെ പുണ്യത്തെ ഇല്ലാതാക്കുകയാണ് ചെയ്യുന്നത്. ചിട്ടയാണ് പ്രധാനമായും പാലിയ്‌ക്കേണ്ടത്.

പ്രഭാതസ്‌നാനം

ശിവരാത്രി ദിനം പ്രഭാത സ്‌നാനം കഴിഞ്ഞ് ഭസ്മം ധരിയ്ക്കണം. ഇതിന് ശേഷം ശിവക്ഷേത്ര ദര്‍ശനം നിര്‍ബന്ധമാണ്. ഉപവാസവും പ്രധാനം.

പകല്‍ മുഴുവന്‍

പകല്‍ മുഴുവന്‍ ഉപവാസം നടത്തണം. ഉപവസിക്കുന്നതോടൊപ്പം തന്നെ ശിവമാഹാത്മ്യ കഥകള്‍ കേള്‍ക്കുകയും വായിക്കുകയും ചെയ്യേണ്ടതാണ്.

പഞ്ചാക്ഷരി മന്ത്രം

പഞ്ചാക്ഷരി മന്ത്രം സ്ഥിരമായി ഉരുവിട്ട് കൊണ്ടിരിയ്ക്കുക. ഉപവാസവും പഞ്ചാക്ഷരി മന്ത്രവുമാണ് ശിവരാത്രി വ്രതത്തിന്റെ പുണ്യം. ഓം നമ:ശിവായ എന്ന മന്ത്രം ഉരുവിട്ട് കൊണ്ടേ ഇരിയ്ക്കണം. ഇത് പുണ്യത്തിലേക്ക് നമ്മളെ കൂടുതല്‍ അടുപ്പിക്കുകയാണ് ചെയ്യുന്നത്.

ശിവന് അര്‍ച്ചന

ശിവന് നടത്തേണ്ട അര്‍ച്ചനകള്‍ ഇവയാണ്. കൂവളത്തില കൊണ്ട് മാല, കൂവളത്തില കൊണ്ട് അര്‍ച്ചന, ശുദ്ധജലം, പാല്‍ എന്നിവ കൊണ്ട് അഭിഷകം, ധാര തുടങ്ങിയ വഴിപാടുകള്‍ ശിവന് നടത്തണം.

പകലോ രാത്രിയോ ഉറങ്ങരുത്

പകലോ രാത്രിയോ ഉറങ്ങാന്‍ പാടുള്ളതല്ല. ഉറക്കം ശിവരാത്രി വ്രതത്തിന്റെ മാഹാത്മ്യം ഇല്ലാതാക്കും. ശിവരാത്രി കഴിഞ്ഞ് അടുത്ത ദിവസം തന്നെ പിതൃബലിയ്ക്ക് ശേഷം പാരണ വീട്ടി വ്രതമവസാനിപ്പിക്കാം.