കെമ്പമ്മ ദേവി നല്‍കിയ സ്വപ്‌ന ദര്‍ശനം; നായയെ ദൈവമായി ആരാധിക്കുന്ന ക്ഷേത്രം

Channapatna Dog Temple : ഭാഷയിലോ സംസ്‌കാരത്തിലോ ഉള്ള വൈവിധ്യം കൊണ്ടല്ല ഇന്ത്യയെ അവിശ്വസനീയ നാട് എന്ന് വിളിക്കുന്നത്‌. ഇന്ത്യ അതിന്റെ വിചിത്രമായ ആചാരങ്ങള്‍ക്കും പേരുകേട്ടതാണ്. ഇന്ത്യ അടിസ്ഥാനപരമായി വിചിത്രവും അസാധാരണവുമായ പല കാര്യങ്ങളുടെയും കേന്ദ്രമാണ്. രാജ്യത്തിന് മാത്രമുള്ള, വിശദീകരിക്കപ്പെടാത്ത നിരവധി വിചിത്രമായ വസ്തുതകള്‍ നമുക്ക് കാണാന്‍ കഴിയും. നായയെ ദൈവമായി ആരാധിക്കുന്ന ഒരു ക്ഷേത്രം ഇന്ത്യയിലുണ്ടെന്ന് പറഞ്ഞാല്‍ നിങ്ങള്‍ വിശ്വസിക്കുമോ? അതെ, അതാണ് കര്‍ണാടകയിലെ ചന്നപട്ടണത്തിലുള്ള നായ ക്ഷേത്രം. ചന്നപട്ടണ നായ ക്ഷേത്രത്തെക്കുറിച്ചുള്ള രസകരമായ ചില കാര്യങ്ങള്‍ ഈ ലേഖനത്തില്‍ നിങ്ങള്‍ക്ക് വായിച്ചറിയാം.

ചന്നപട്ടണത്തിലെ നായ ക്ഷേത്രം

കര്‍ണാടകയിലെ ചന്നപട്ടണ നഗരത്തിലെ അഗ്രഹാര വലഗെരഹള്ളി എന്ന ചെറിയ ഗ്രാമത്തിലാണ് ചന്നപട്ടണ നായ ക്ഷേത്രം എന്നറിയപ്പെടുന്ന കര്‍ണാടകയിലെ നായ ക്ഷേത്രം സ്ഥിതി ചെയ്യുന്നത്. തടികൊണ്ടുള്ള കളിപ്പാട്ടങ്ങള്‍ക്ക് ആഗോളതലത്തില്‍ പേരുകേട്ട നഗരമായ ചന്നപട്ടണത്തെ 'കളിപ്പാട്ടങ്ങളുടെ പട്ടണം' എന്ന് സ്‌നേഹപൂര്‍വ്വം വിളിക്കുന്നു. ബാംഗ്ലൂര്‍ നഗരത്തില്‍ നിന്ന് ഏകദേശം 60 കിലോമീറ്റര്‍ അകലെ സ്ഥിതി ചെയ്യുന്ന ഈ ക്ഷേത്രത്തിന്റെ അസ്തിത്വത്തെക്കുറിച്ച് പലരും അറിഞ്ഞിരിക്കണമെന്നില്ല. കന്നഡയിലെ പ്രാദേശിക ഭാഷയില്‍ 'നായി ദേവസ്ഥാന' എന്നറിയപ്പെടുന്ന ഇത് 2010ല്‍ രമേഷ് എന്ന വ്യവസായിയാണ് നിര്‍മ്മിച്ചത്. ഈ ക്ഷേത്രത്തില്‍ നായ്ക്കളെയാണ് ആരാധിക്കുന്നത്.

ക്ഷേത്രത്തിന് കാവലായ നായ്ക്കള്‍

ചന്നപട്ടണത്തെ നിവാസികള്‍ തലമുറകളായി, പ്രാദേശിക ഗ്രാമദേവതയായ കെമ്പമ്മയെ ആരാധിച്ചുവരുന്നവരാണ്. കെമ്പമ്മ ദേവിക്കായി ഒരു ക്ഷേത്രം പണിയാന്‍ തുടങ്ങിയപ്പോഴാണ് എങ്ങുനിന്നോ രണ്ട് നായ്ക്കള്‍ പ്രത്യക്ഷപ്പെട്ടത്. ക്ഷേത്രനിര്‍മ്മാണം പുരോഗമിക്കുമ്പോഴെല്ലാം ഈ നായകള്‍ ക്ഷേത്രപരിസരത്ത് ഉണ്ടായിരുന്നു. എന്നാല്‍ ക്ഷേത്ര നിര്‍മാണം പൂര്‍ത്തിയായ ഉടന്‍, രണ്ട് നായ്ക്കളും നിഗൂഢമായി അപ്രത്യക്ഷമായി.

ദേവിയുടെ ആജ്ഞ

കഥകള്‍ അനുസരിച്ച്, ഒരു ഗ്രാമവാസിയുടെ സ്വപ്നങ്ങളിലൊന്നില്‍ കെമ്പമ്മ ദേവി പ്രത്യക്ഷപ്പെടുകയും തന്റെ ക്ഷേത്രത്തെ തിന്മയില്‍ നിന്ന് സംരക്ഷിക്കുന്നതിനായി അപ്രത്യക്ഷമായ നായ്ക്കളെ കണ്ടെത്താന്‍ കല്‍പ്പിക്കുകയും ചെയ്തു. എന്നാല്‍ കാണാതായ നായ്ക്കളെ കണ്ടെത്താന്‍ ഗ്രാമവാസികള്‍ക്ക് കഴിയാതെ വന്നപ്പോള്‍, കെമ്പമ്മ ദേവിയുടെ കല്‍പ്പന പ്രകാരം ഒരു ചെറിയ ആരാധനാലയം നിര്‍മ്മിക്കാന്‍ അവര്‍ തീരുമാനിച്ചു. അങ്ങനെയാണ് ഈ ക്ഷേത്രം നിര്‍മിക്കപ്പെട്ടത്. ക്ഷേത്രത്തിനുള്ളില്‍ നിങ്ങള്‍ രണ്ട് നായ്ക്കളുടെ പ്രതിമകള്‍ കാണാനാകും. അന്നുമുതല്‍, ഈ രണ്ട് നായ്ക്കള്‍ ഗ്രാമത്തെ സംരക്ഷിക്കുകയും തിന്മയില്‍ നിന്ന് സംരക്ഷിക്കുകയും ചെയ്യുന്നുവെന്ന് ഗ്രാമീണര്‍ വിശ്വസിക്കുന്നു. ക്ഷേത്രത്തിലെത്തുന്നവര്‍ ഭക്തിയോടെ പഴങ്ങളും പൂക്കളും സമര്‍പ്പിക്കുകയും ആഴ്ചയില്‍ മൂന്ന് തവണ വൈകുന്നേരം പൂജ നടത്തുകയും ചെയ്യുന്നു. എല്ലാ വര്‍ഷവും ഈ കാവല്‍ നായ്ക്കളുടെ സ്മരണയ്ക്കായി ഗ്രാമത്തില്‍ വലിയ ഉത്സവവും നടക്കാറുണ്ട്.

കര്‍ണാടകയുടെ കളിപ്പാട്ടഭൂമി

ചന്നപട്ടണത്തെ കളിപ്പാട്ടങ്ങളുടെ നഗരം എന്ന് വിളിക്കുന്നു. കര്‍ണാടകയിലെ രാംനഗര ജില്ലയിലാണ് ഇത് സ്ഥിതി ചെയ്യുന്നത്. ചന്നപട്ടണത്ത് നിര്‍മ്മിക്കുന്ന കളിപ്പാട്ടങ്ങള്‍ അവയുടെ ആകര്‍ഷകമായ ഡിസൈനുകള്‍ക്കും കുറ്റമറ്റ കരകൗശലത്തിനും പേരുകേട്ടതാണ്. ഈ കളിപ്പാട്ടങ്ങളില്‍ പലതും ആനക്കൊമ്പ്, പൈന്‍ മരം, ചന്ദനം എന്നിവ കൊണ്ടാണ് നിര്‍മ്മിക്കുന്നത്. ചന്നപട്ടണയിലെ കളിപ്പാട്ടങ്ങള്‍ക്ക് ടിപ്പു സുല്‍ത്താന്റെ കാലം മുതല്‍ (1700കളുടെ മധ്യത്തില്‍) പ്രശസ്തമാണ്. ടിപ്പു സുല്‍ത്താന്‍ പേര്‍ഷ്യക്കാരെ ഇന്ത്യയിലെത്തിച്ച് കലാകാരന്മാരെ മര കളിപ്പാട്ടങ്ങള്‍ നിര്‍മിക്കുന്നതിനുള്ള കരകൗശലവിദ്യ പഠിപ്പിച്ചു. ചന്നപട്ടണത്തെ കളിപ്പാട്ടങ്ങളുടെ നഗരമാക്കിയത് ബാവാസ് മിയാന്‍ എന്ന ജാപ്പനീസ് കലാകാരനാണ്. കളിപ്പാട്ട നിര്‍മ്മാണത്തില്‍ പ്രാദേശിക കലാകാരന്മാരെ സഹായിക്കുന്നതിനും കളിപ്പാട്ടങ്ങള്‍ മെച്ചപ്പെടുത്തുന്നതിന് പുതിയ ജാപ്പനീസ് സാങ്കേതികവിദ്യ അവതരിപ്പിക്കുന്നതിനുമായി അദ്ദേഹം പരിശ്രമിച്ചു.

കെംപഗൗഡ അന്താരാഷ്ട്ര വിമാനത്താവളവും ബെംഗളൂരുവിലെ ബാംഗ്ലൂര്‍ സിറ്റി റെയില്‍വേ സ്റ്റേഷനുമാണ് യഥാക്രമം ചന്നപട്ടണയിലേക്കുള്ള ഏറ്റവും അടുത്തുള്ള വിമാനത്താവളവും റെയില്‍വേ സ്റ്റേഷനും. എയര്‍പോര്‍ട്ടില്‍ നിന്നും റെയില്‍വേ സ്റ്റേഷനുകളില്‍ നിന്നും ചന്നപട്ടണത്തിലേക്ക് നേരിട്ട് ബസ് ലഭിക്കും. അല്ലെങ്കില്‍ ഒരു ടാക്‌സി വാടകയ്ക്കെടുക്കാം. ചന്നപട്ടണ കേന്ദ്രത്തില്‍ നിന്ന് ഏകദേശം 20 കിലോമീറ്റര്‍ അകലെ അഗ്രഹാര വലഗെരെഹള്ളി ഗ്രാമത്തിനകത്താണ് ഈ നായ ക്ഷേത്രം സ്ഥിതി ചെയ്യുന്നത്.