Chaitra Navratri 2022 : ഭക്തര്‍ക്ക് പുണ്യകാലം; ചൈത്ര നവരാത്രി ആഘോഷങ്ങള്‍ക്ക് തുടക്കം

ചൈത്ര നവരാത്രി 2022 തീയതിയും പൂജാ സമയവും

ഈ വര്‍ഷം, ചൈത്ര നവരാത്രിയുടെ ഒമ്പത് ദിവസം 2022 ഏപ്രില്‍ 2 ന് ആരംഭിച്ച് ഏപ്രില്‍ 11 വരെ നീണ്ടുനില്‍ക്കും. ഉത്സവത്തിന്റെ ഏറ്റവും പ്രധാനപ്പെട്ട ദിവസങ്ങളില്‍ ഒന്നായി കണക്കാക്കപ്പെടുന്ന അഷ്ടമി ഏപ്രില്‍ 9നാണ്. കൂടാതെ, നവരാത്രിയിലെ പ്രധാന ചടങ്ങുകളിലൊന്നാണ് ഘടസ്ഥാപനം.

ദിവസം 1: ഏപ്രില്‍ 2 പ്രതിപാദം

ദിവസം 2: ഏപ്രില്‍ 3 ദ്വിതീയ

ദിവസം 3: ഏപ്രില്‍ 4 തൃതീയ

ദിവസം 4: ഏപ്രില്‍ 5 ചതുര്‍ത്ഥി

ദിവസം 5: ഏപ്രില്‍ 6 പഞ്ചമി

ദിവസം 6: ഏപ്രില്‍ 7 ഷഷ്ഠി

ദിവസം 7: ഏപ്രില്‍ 8 സപ്തമി

ദിവസം 8: ഏപ്രില്‍ 9 അന്നപൂര്‍ണ അഷ്ടമി -സന്ധി പൂജ

ദിവസം 9: ഏപ്രില്‍ 10 രാമ നവമി

കലശ സ്ഥാപനം

ചൈത്ര നവരാത്രി ഏപ്രില്‍ 02, ശനിയാഴ്ച ആരംഭിച്ച് ഏപ്രില്‍ 10 ഞായര്‍ വരെ തുടരും. ഈ സമയത്ത്, നവരാത്രിയുടെ 9 ദിവസങ്ങളില്‍ രാജ്യത്തുടനീളം ദുര്‍ഗാ ദേവിയുടെ 9 രൂപങ്ങളെ ആരാധിക്കുന്നു. നവരാത്രിയില്‍ ദുര്‍ഗ്ഗയുടെ 9 രൂപങ്ങളെ ആരാധിക്കുന്നത് പ്രത്യേക കൃപ നല്‍കുമെന്ന് വിശ്വസിക്കപ്പെടുന്നു. ഈ സമയത്ത് ഘടസ്ഥാപനം അല്ലെങ്കില്‍ കലശം മിക്കവാറും എല്ലാ ഭക്തരുടെയും വീട്ടില്‍ സ്ഥാപിക്കപ്പെടുന്നു. ഏപ്രില്‍ 2 ശനിയാഴ്ച രാവിലെ 6.03 മുതല്‍ 8.31 വരെയാണ് നവരാത്രി ഘടസ്ഥാപനത്തിന്റെ ഇത്തവണത്തെ മുഹൂര്‍ത്തം. ഈ മുഹൂര്‍ത്തത്തില്‍ നിങ്ങള്‍ക്ക് കലശം സ്ഥാപിക്കാന്‍ കഴിയുന്നില്ലെങ്കില്‍, അഭിജിത കാലത്ത് 11:48 മുതല്‍ 12:37 വരെ കലശം സ്ഥാപിക്കാം.

ചൈത്ര നവരാത്രി ചരിത്രവും പ്രാധാന്യവും

ചൈത്ര നവരാത്രി ഉത്സവം ദുര്‍ഗ്ഗാദേവിയുടെ ഒമ്പത് അവതാരങ്ങളെ ആരാധിക്കുന്നതിനാണ്. ഈ ഉത്സവത്തിന്റെ ഓരോ ദിവസവും വ്യത്യസ്ത പ്രാധാന്യമുള്ളതും ദുര്‍ഗ്ഗയുടെ ഒമ്പത് അവതാരങ്ങള്‍ക്കായി സമര്‍പ്പിക്കപ്പെട്ടതുമാണ്. ശൈലപുത്രി, ബ്രഹ്‌മചാരിണി, ചന്ദ്രഘണ്ട, കൂശ്മാണ്ഡ, സ്‌കന്ദ മാത, കാത്യായനി, കാളരാത്രി, മഹാഗൗരി, സിദ്ധിദാത്രി എന്നിവയാണ് അവ. മഹാവിഷ്ണുവിന്റെ ഏഴാമത്തെ അവതാരമായ ശ്രീരാമന്റെ ജനനവുമായി പലരും ഈ ഉത്സവത്തെ ബന്ധപ്പെടുത്തുന്നു. ശ്രീരാമന്റെ ജനനവും അദ്ദേഹത്തിന്റെ ജീവിതവുമായി ബന്ധപ്പെട്ട സ്ഥലങ്ങള്‍ ഈ ദിവസത്തില്‍ ആഘോഷത്താല്‍ മുഖരിതമാകുന്നു. അദ്ദേഹത്തെ ആരാധിക്കാന്‍ ഭക്തര്‍ ഈ പുണ്യസ്ഥലങ്ങളില്‍ എത്തുന്നു.

ചൈത്ര നവരാത്രി ആഘോഷങ്ങള്‍

ക്ഷേത്രങ്ങളും ആരാധനാലയങ്ങളും ചൈത്ര നവരാത്രി ദിവസങ്ങളില്‍ ഭക്തര്‍ക്ക് പ്രാര്‍ത്ഥനക്കായി സൗകര്യങ്ങള്‍ ഒരുക്കുന്നു. കൂടാതെ, ഈ ഒമ്പത് ദിവസങ്ങളില്‍ ഭക്തര്‍ മദ്യപാനം, നോണ്‍-വെജ് ഭക്ഷണം, ഉള്ളി, വെളുത്തുള്ളി എന്നിവ കഴിക്കുന്നതും ഒഴിവാക്കുന്നു. ഹിന്ദു ജ്യോതിഷ പ്രകാരം നിരവധി ആളുകള്‍ ഈ സമയം ആചാരങ്ങളും പൂജകളും നടത്തുന്നു.

എന്തുകൊണ്ടാണ് ചൈത്ര നവരാത്രി ആഘോഷിക്കുന്നത്

ഹിന്ദു വിശ്വാസികള്‍ ഒരു വര്‍ഷത്തില്‍ ആചരിക്കുന്ന നാല് നവരാത്രികളില്‍ ഒന്നാണ് ചൈത്ര നവരാത്രി. ഗ്രിഗോറിയന്‍ കലണ്ടര്‍ പ്രകാരം മാര്‍ച്ച്-ഏപ്രില്‍ മാസമായ ചൈത്ര മാസത്തിലാണ് ഈ നവരാത്രി വരുന്നത്. മഹാവിഷ്ണുവിന്റെ അവതാരമായി ശ്രീരാമന്റെ ജന്മദിനമായ രാമനവമിയോടെയാണ് ചൈത്ര നവരാത്രി അവസാനിക്കുന്നത്. ഈ വര്‍ഷം രാമനവമി 2022 ഏപ്രില്‍ 10 ന് ആഘോഷിക്കും.