ആറ്റുകാല്‍ പൊങ്കാല 2023: മുപ്പത്തിമുക്കോടി പരദൈവങ്ങളുടെ ശക്തിയില്‍ അമ്മ: വ്രതം ഇപ്രകാരം

തീയ്യതിയും മുഹൂര്‍ത്തവും

ഈ വര്‍ഷത്തെ ആറ്റുകാല്‍ പൊങ്കാല വരുന്നത് മാര്‍ച്ച് 7-നാണ്. ഇതിന് വേണ്ടി തിങ്കളാഴ്ച പുലര്‍ച്ചെ തന്നെ ദേവിയെ കാപ്പു കെട്ടി കുടിയിരുത്തുന്ന ചടങ്ങുണ്ട്. പിന്നീട് ഏഴിന് രാവിലെ തോറ്റംപാട്ടിന്റെ അകമ്പടിയോടെയാണ് പൊങ്കാല തയ്യാറാക്കല്‍ ആരംഭിക്കുന്നത്. പാണ്ഡ്യരാജാവിനെ വധിച്ച കണ്ണകിയുടെ കഥയാണ് തോറ്റം പാട്ടില്‍ അവതരിപ്പിക്കുന്നത്. ക്ഷേത്രം തന്ത്രിയി.ല്‍ നിന്ന് മേല്‍ശാന്തി ദീപം ഏറ്റുവാങ്ങുകയും തിടപ്പള്ളിയിലെ അടുപ്പില്‍ ദീപം തെളിയിച്ച ശേഷം സഹമേല്‍ശാന്തിയാണ് ക്ഷേത്രത്തിന് മുന്നിലുള്ള പണ്ടാര അടുപ്പിലേക്ക് തീപകരുന്നത്. തുടര്‍ന്നാണ് പൊങ്കാല സമര്‍പ്പിക്കാന്‍ എത്തിയ ലക്ഷക്കണക്കിന് ഭക്തരുടെ അടുപ്പുകളിലേക്ക് തീപകരുന്നത്. ഉച്ചക്ക് 2.30 ആവുമ്പോഴേക്ക് പൊങ്കാല സദ്യ തയ്യാറാക്കി നിവേദിക്കുന്നതിന് ആരംഭിക്കുന്നു.

വ്രതാനുഷ്ഠാനം

പൊങ്കാല ദിനം വ്രതം അനുഷ്ഠിക്കുന്നവര്‍ ശ്രദ്ധിക്കേണ്ടതായ ചില കാര്യങ്ങള്‍ ഉണ്ട്. മാതൃസങ്കല്‍പ്പത്തിലാണ് ദേവിയെ നാം ആരാധിക്കുന്നത്. കാപ്പു കെട്ട് ദിനം മുതല്‍ തന്നെ അതിനോട് അനുബന്ധിച്ചുള്ള 9 ദിവസത്തോളം ദേവിയെ ആരാധിക്കുന്നു. ഈ ദിനങ്ങളിലെല്ലാം വ്രതം അനുഷ്ഠിച്ച് വേണം ദേവിയെ ആരാധിക്കുന്നതിന്. വ്രതമെടുക്കുമ്പോള്‍ നാം ശ്രദ്ധിക്കേണ്ടതായ ചില കാര്യങ്ങള്‍ ഉണ്ട്. ഭക്ഷണത്തിന്റെ കാര്യത്തില്‍ വ്രതശുദ്ധികള്‍ പാലിച്ചാല്‍ പോരാ. മറ്റ് ചില കാര്യങ്ങള്‍ കൂടി ശ്രദ്ധിക്കേണ്ടതാണ്.

വ്രതം ആരംഭിക്കുമ്പോള്‍

പൊങ്കാല വ്രതം എടുക്കാന്‍ ആഗ്രഹിക്കുന്ന സ്ത്രീകള്‍ ശരീരവും മനസ്സും ഒരുപോലെ ശുദ്ധിയാക്കി വേണം വ്രതാനുഷ്ഠാനം ആരംഭിക്കുന്നതിന്. വ്രതമെടുക്കുന്ന ഒന്‍പത് ദിവസങ്ങളിലും ആറ്റുകാലമ്മയെ മാത്രം മനസ്സില്‍ ധ്യാനിച്ച് വേണം മുന്നോട്ട് പോവുന്നതിന്. ഒരു തരത്തിലുള്ള കുശുമ്പോ അസൂയയോ മനസ്സില്‍ തോന്നാന്‍ പാടില്ല. ഒരു നേരം മാത്രം അരിയാഹാരം കഴിച്ച് ബാക്കി സമയങ്ങളില്‍ ഫലമൂലാദികള്‍ ഭക്ഷിച്ച് വേണം വ്രതമെടുക്കേണ്ടത്. സദാസമയവും ആറ്റുകാലമ്മയെ മനസ്സാ സങ്കല്‍പ്പിക്കുകയും ദേവി കൂടെയുണ്ടെന്ന് കരുതുകയും വേണം.

Image courtesy: Wikipedia

വ്രതം ആരംഭിക്കുമ്പോള്‍

അരിയാഹാരം ഒരു നേരം മാത്രമേ കഴിക്കാന്‍ പാടുള്ളൂ. മത്സ്യ-മാംസാദികള്‍ പൂര്‍ണമായും ഒഴിവാക്കണം. കൂടാതെ ലഹരി പദാര്‍ത്ഥങ്ങളും പുരുഷ സാന്നിധ്യവും പൂര്‍ണമായും ഒഴിവാക്കണം. ദേവി സ്‌തോത്രം ദിനവും സദാസമയവും ഉരുവിട്ട് കൊണ്ടിരിക്കുന്നത് നല്ലതാണ്. ഇതിലൂടെ നിങ്ങളോടൊപ്പം ദേവി സാന്നിധ്യം എപ്പോഴും ഉണ്ടാവും എന്ന് മനസ്സിലാക്കാന്‍ സാധിക്കുന്നു. തന്നെത്തന്നെ ഈ ദിനങ്ങളില്‍ ദേവിക്ക് സമര്‍പ്പിക്കുകയാണ് എന്നതാണ് പൊങ്കാലയുടെ മഹത്വം. അതുകൊണ്ട് തന്നെ ഈ ദിനങ്ങളില്‍ ദേവി മന്ത്രം മാത്രമായിരിക്കണം ഓരോരുത്തരുടേയും മനസ്സില്‍. നല്ല വാക്ക്, നല്ല ചിന്ത എന്നിവ മാത്രമേ മനസ്സില്‍ ഉണ്ടാവാന്‍ പാടുകയുള്ളൂ.

വ്രതം ആരംഭിക്കുമ്പോള്‍

ധരിക്കുന്ന വസ്ത്രത്തിന്റെ കാര്യത്തില്‍ പോലും ശ്രദ്ധിക്കണം. പൊങ്കാല ദിനത്തില്‍ കോട്ടണ്‍ കോടി വസ്ത്രങ്ങള്‍ മാത്രമേ ധരിക്കാവൂ. അത് മാത്രമല്ല മനസ്സിന്റെ ശുദ്ധി വളരെ പ്രധാനപ്പെട്ടതാണ്. പുല വാലായ്മയുള്ളവര്‍ പൊങ്കാലയിടരുത്. പൊങ്കാല തിളച്ച് മറിയുന്ന ദിക്ക് പോലും അത്രയേറെ പ്രധാനപ്പെട്ടതാണ്. പൊങ്കാല എപ്പോഴും തിളച്ച് തൂകണം എന്നാണ് പറയുന്നത്. ഇത് നിങ്ങളുടെ ജീവിതത്തില്‍ ഉണ്ടാവാന്‍ ഇടയുള്ള അഭിവൃദ്ധിയെയാണ് സൂചിപ്പിക്കുന്നത്. കിഴക്കോട്ടാണ് പൊങ്കാല നിവേദ്യം തിളച്ച് തൂവുന്നതെങ്കില്‍ അത് അര്‍ത്ഥമാക്കുന്നത് അഭീഷ്ടസിദ്ധിയെന്നാണ്, വടക്കോട്ടാണ് എന്നുണ്ടെങ്കില്‍ പല കാര്യങ്ങളിലും കാലതാമസം വരും എന്നാണ് സൂചിപ്പിക്കുന്നത്. എന്നാല്‍ പടിഞ്ഞാറ് ഭാഗത്തേക്കും തെക്ക് ഭാഗത്തേക്കുമായാല്‍ ദുരിതഫലങ്ങള്‍ നേരിടേണ്ടി വരുമെന്നും ദേവിയെ മനസ്സറിഞ്ഞ് പ്രാര്‍ത്ഥിക്കണം എന്നുമാണ് വിശ്വാസം.

വ്രതാവസാനം

പൊങ്കാലയിട്ടതിന് ശേഷം എപ്പോള്‍ വ്രതം മുറിക്കാം എന്നത് പലരുടേയും സംശയമാണ്. പൊങ്കാല തിളച്ച് തൂവിയ ഉടനേ വ്രതം മുറിക്കരുത്. മാത്രമല്ല പൊങ്കാല തിളച്ച് വരുന്നത് വരെ ഭക്ഷണവും കഴിക്കാന്‍ പാടില്ല. നിവേദ്യം തയ്യാറാക്കി ദേവിക്ക് നേദിച്ച് കഴിഞ്ഞ ശേഷമാണ് ഇത്തരത്തില്‍ വ്രതം അവസാനിപ്പിക്കേണ്ടത്. കരിക്കോ, പാലോ, പഴമോ കഴിച്ച് ഉപവാസം അവസാനിപ്പിക്കണം. പിന്നീട് ദേവിയുടെ പ്രസാദ ഊട്ട് കഴിക്കാവുന്നതാണ്. കൂടാതെ പൊങ്കാല കഴിഞ്ഞ അന്നേ ദിവസം നിങ്ങള്‍ കുളിക്കരുത്. കാരണം ദേവി സാന്നിധ്യം നിങ്ങളോടൊപ്പം ഉണ്ട് എന്നാണ് പറയുന്നത്. അതുകൊണ്ട് വ്രതാനുഷ്ഠാനത്തോടെ ഇരിക്കുന്നതിന് ശ്രദ്ധിക്കുക.