മോക്ഷത്തിലേക്കുള്ള വഴി തുറക്കുന്ന അമലകി ഏകാദശി; മംഗളം ചൊരിയുന്ന വിഷ്ണുദേവന്‍

ഹിന്ദു മതത്തില്‍ വളരെ പ്രാധാന്യത്തോടെ കണക്കാക്കപ്പെടുന്ന ഒന്നാണ് ഏകാദശി വ്രതം. ഏകാദശി വ്രതം മോക്ഷത്തിലേക്കുള്ള വഴി തുറക്കുമെന്ന് പറയപ്പെടുന്നു. എല്ലാ മാസവും രണ്ട് ഏകാദശി വ്രതങ്ങള്‍ വരുന്നുണ്ട്. ഒന്ന് കൃഷ്ണപക്ഷത്തിലും മറ്റൊന്ന് ശുക്ലപക്ഷത്തിലും. ഈ രീതിയില്‍ ഒരു വര്‍ഷത്തില്‍ ആകെ 24 ഏകാദശി വ്രതങ്ങളുണ്ട്. ഓരോ ഏകാദശിക്കും അതിന്റേതായ പ്രത്യേക പ്രാധാന്യമുണ്ട്. ഈ ഏകാദശി വ്രതങ്ങളില്‍ ചിലത് വളരെ സവിശേഷമാണ്. അതിലൊന്നാണ് അമലകി ഏകാദശി.

ഫാല്‍ഗുന മാസത്തിലെ ശുക്ല പക്ഷത്തിലെ ഏകാദശിയെ അമലകി ഏകാദശി അല്ലെങ്കില്‍ അംല ഏകാദശി എന്ന് വിളിക്കുന്നു. ഈ വ്രതാനുഷ്ഠാനത്തില്‍ നെല്ലിമരത്തെ പൂജിക്കുകയും മഹാവിഷ്ണുവിനെ ആരാധിക്കുകയും ചെയ്യുന്നു. അമലകി ഏകാദശിയുടെ ശുഭമുഹൂര്‍ത്തവും പൂജാരീതിയും അറിയാന്‍ ലേഖനം വായിക്കൂ.

അമലകി ഏകാദശി 2024

ഫാല്‍ഗുന മാസത്തിലെ ശുക്ല പക്ഷത്തിലെ ഏകാദശിയെ അമലകി ഏകാദശി അല്ലെങ്കില്‍ അംല ഏകാദശി എന്ന് വിളിക്കുന്നു. പലയിടത്തും ഇത് രംഗ്ഭരി ഏകാദശി എന്നും അറിയപ്പെടുന്നു. കലണ്ടര്‍ അനുസരിച്ച്, ഈ വര്‍ഷത്തെ അമലകി ഏകാദശി മാര്‍ച്ച് 20ന് ബുധനാഴ്ച പുലര്‍ച്ചെ 12:21 ന് ആരംഭിച്ച് മാര്‍ച്ച് 21 ന് വ്യാഴാഴ്ച പുലര്‍ച്ചെ 2:22 ന് അവസാനിക്കും. അത്തരമൊരു സാഹചര്യത്തില്‍ ഉദയതിഥി പ്രകാരം മാര്‍ച്ച് 20 ബുധനാഴ്ച ഈ ഏകാദശി വ്രതം ആചരിക്കും.

അമലകി ഏകാദശി 2024 ശുഭസമയം

അമലകി ഏകാദശി ദിനത്തില്‍ നെല്ലിമരത്തെ ആരാധിക്കുന്നു. ഈ വ്രതം മഹാവിഷ്ണുവിനുള്ളതാണ്. അമലകി ഏകാദശി നാളില്‍ സൂര്യോദയത്തിനു ശേഷം മഹാവിഷ്ണുവിനെ പൂജിച്ചാല്‍ അത് കൂടുതല്‍ ഫലദായകമായി കണക്കാക്കപ്പെടുന്നു. മാര്‍ച്ച് 20 ന് ഏകാദശി ദിനത്തില്‍, സൂര്യോദയം രാവിലെ 6.25 ന് ആയിരിക്കും. അടുത്ത ദിവസം, അതായത് മാര്‍ച്ച് 21 ഉച്ചയ്ക്ക് 1:41 മുതല്‍ 4:07 വരെ ഈ വ്രതം അനുഷ്ഠിക്കാം.

അമലകി ഏകാദശിയുടെ പ്രാധാന്യം

വര്‍ഷത്തിലെ 24 ഏകാദശികള്‍ക്കും പ്രത്യേക പ്രാധാന്യമുണ്ട്. എന്നാല്‍ അമലകി ഏകാദശി അതായത് അംല ഏകാദശി വളരെ പ്രാധാന്യത്തോടെ കണക്കാക്കപ്പെടുന്നു. ഈ ദിവസം മഹാവിഷ്ണുവിനൊപ്പം നെല്ലിവൃക്ഷത്തെയും ആരാധിക്കുന്നു. പുണ്യഗ്രന്ഥങ്ങളില്‍ പറയുന്നത് എല്ലാ ദേവീദേവന്മാരും നെല്ലി മരത്തില്‍ വസിക്കുന്നു എന്നാണ്. അതിനാല്‍ നെല്ലിമരത്തെ ആരാധിക്കുന്നതിലൂടെ എല്ലാ ദേവന്മാരുടെയും അനുഗ്രഹം നിങ്ങള്‍ക്ക് ലഭിക്കും. അമലകി ഏകാദശി വ്രതം അനുഷ്ഠിക്കുന്ന വ്യക്തിക്ക് എല്ലാ പാപങ്ങളില്‍ നിന്നും മോചനം ലഭിക്കുമെന്നും ജീവിതത്തിലെ എല്ലാ പ്രശ്‌നങ്ങളും ഇല്ലാതാകുമെന്നും പറയപ്പെടുന്നു. മരണശേഷം അവര്‍ക്ക് മോക്ഷപ്രാപ്തിയും ലഭിക്കുന്നു.

മഹാവിഷ്ണുവിനെ ആരാധിക്കാന്‍

അമലകി പൂജാ ദിവസം മഹാവിഷ്ണുവിനെ ആരാധിക്കണം. ഈ ദിവസം മഹാവിഷ്ണുവിന് 21 മഞ്ഞ പൂക്കള്‍ അര്‍പ്പിക്കുക. ഇങ്ങനെ ചെയ്താല്‍ മഹാവിഷ്ണുവിന്റെ അനുഗ്രഹം ലഭിക്കും. കൂടാതെ നിങ്ങളുടെ എല്ലാ ആഗ്രഹങ്ങളും നിറവേറ്റാനും കഴിയും. ഏകാദശി നാളില്‍ നെല്ലി മരത്തില്‍ ധാരാളം വെള്ളം സമര്‍പ്പിച്ച് മഹാവിഷ്ണുവിനെ ധ്യാനിക്കുക. ഇത് ചെയ്യുന്നതിലൂടെ തൊഴില്‍, ബിസിനസ്സ് പ്രശ്നങ്ങള്‍ എന്നിവയില്‍ നിന്ന് മുക്തി നേടാനാകും.

നെല്ലി മരം ആരാധന

ഈ ദിവസം 7 തവണ നെല്ലിമരത്തെ പ്രദക്ഷിണം ചെയ്യുകയും 7 തവണ ചരട് കെട്ടുകയും വേണം. ഇത് ചെയ്യുന്നതിലൂടെ നിങ്ങളുടെ ദാമ്പത്യ ജീവിതത്തില്‍ സന്തോഷം കൈവരുന്നതായിരിക്കും. അമലകി ഏകാദശി ദിനത്തില്‍ ഒരുകണ്ണുള്ള തേങ്ങ മഞ്ഞ നിറത്തിലുള്ള തുണിയില്‍ പൊതിഞ്ഞ് സൂക്ഷിക്കുക. പൂജയ്ക്ക് ശേഷം ഈ നാളികേരം പണം സൂക്ഷിക്കുന്ന സ്ഥലത്ത് വയ്ക്കുക. ഇങ്ങനെ ചെയ്താല്‍ സാമ്പത്തിക പ്രതിസന്ധിയില്‍ നിന്ന് മോചനം നേടാനാകും.

നെല്ലിക്കയുടെ പ്രാധാന്യം

നിങ്ങള്‍ അമലകി ഏകാദശി വ്രതം ആചരിക്കുകയാണെങ്കില്‍, നെല്ലി മരത്തിനും നെല്ലിക്കയ്ക്കും പ്രത്യേക പ്രാധാന്യമുണ്ടെന്ന് ഓര്‍മ്മിക്കുക. ഇതില്ലാതെ അമലകി ഏകാദശിയുടെ ആരാധനയും വ്രതാനുഷ്ഠാനവും പൂര്‍ണമാകില്ല. മഹാവിഷ്ണുവിന് നെല്ലിക്ക നിവേദിക്കുക, പ്രസാദമായി നെല്ലിക്ക കഴിക്കുക.