വിന്‍ഡോസില്‍ ഗാര്‍ഡന്‍: തുളസി മുതല്‍ കറിവേപ്പില വരെ ജനാലപ്പടിയില്‍ തളച്ചുവളരുന്ന ചെടികള്‍

ചില വീടുകളിലേക്ക് കയറിച്ചെന്നാല്‍ കണ്ണിന് കുളിര്‍മ്മ നല്‍കിക്കൊണ്ട് വീട്ടിലൊന്നാകെ പച്ചപ്പ് തുടിച്ചുനില്‍ക്കുന്നത് കാണാം. പലതരം ഇന്‍ഡോര്‍ പ്ലാന്റുകള്‍ പറ്റാവുന്നിടത്തെല്ലാം വെച്ച് വീട്ടിനുള്ളില്‍ അതിമനോഹരമായ ഒരു പൂന്തോട്ടം അവിടെയുണ്ടാകും. പച്ചപ്പ് ഉള്ള വീടുകള്‍ ജീവനുള്ളതായി തന്നെ നമുക്ക് തോന്നും.

വീട്ടിനുള്ളില്‍ പച്ചപ്പ് വര്‍ദ്ധിപ്പിക്കാനുള്ള മാര്‍ഗ്ഗങ്ങള്‍ അന്വേഷിക്കുന്നവര്‍ക്ക് പരീക്ഷിക്കാവുന്ന ഒന്നാണ് വിന്‍ഡോസില്‍ ഗാര്‍ഡന്‍, അഥവാ ജനാലപ്പടിയിലെ പൂന്തോട്ടം. നഗരങ്ങളില്‍ താമസിക്കുന്നവര്‍ക്കാണ് വിന്‍ഡോസില്‍ ഗാര്‍ഡന്‍ ഏറ്റവും അനുഗ്രഹമാകുക. പുറത്തൊരു പൂന്തോട്ടം ഒരുക്കാന്‍ കഴിയാത്തവര്‍ക്ക് ബാല്‍ക്കെണിയിലും ജനാലപ്പടിയിലുമായി അതിമനോഹരമായ പൂന്തോട്ടം ഒരുക്കാം. വീട്ടിനുള്ളില്‍ ചെടികള്‍ വളര്‍ത്തുന്നത് അകത്തളങ്ങളുടെ മനോഹാരിത വര്‍ദ്ധിപ്പിക്കുക മാത്രമല്ല, വായു ശുദ്ധീകരിക്കുകയും ചെയ്യുന്നു. കൂടാതെ, അകത്തളങ്ങളില്‍ ചെടികള്‍ വെക്കുന്നതിലൂടെ മാനസിക പിരിമുറുക്കം കുറച്ച് മൂഡ് മെച്ചപ്പെടുത്താനും സാധിക്കുമെന്ന് ഗവേഷണങ്ങള്‍ പറയുന്നു.

വിന്‍ഡോസില്‍ ഗാര്‍ഡന്‍ എങ്ങനെ ഒരുക്കാം

നിങ്ങളുടെ വീടിന്റെ ജനാലപ്പടികള്‍ക്ക് അനുയോജ്യമായ ചട്ടികളും ആവശ്യത്തിന് മണ്ണും നല്ല സൂര്യപ്രകാശം ലഭിക്കുന്ന ജനലുകളും മാത്രമേ ഈ പൂന്തോട്ടത്തിന് ആവശ്യമുള്ളു. സാധാരണ മണ്ണ് ഉപയോഗിക്കുന്നതിനേക്കാള്‍ കടകളില്‍ ലഭ്യമായ പോട്ടിംഗ് മിക്‌സ് ആണ് വിന്‍ഡോസില്‍ ഗാര്‍ഡന് ഉചിതം.

വിന്‍ഡോസില്‍ ഗാര്‍ഡന് ഏതൊക്കെ ചെടികളാണ് നല്ലത്

തുളസി - വളരെ പവിത്രമായി കരുതപ്പെടുന്ന, ഔഷധഗുണങ്ങളുള്ള തുളസിച്ചെടി വിന്‍ഡോസില്‍ ഗാര്‍ഡന് പറ്റിന് ചെടിയാണ്. രാവിലെയും വൈകുന്നേരവും നേരിട്ട് സൂര്യപ്രകാശം അടിക്കുന്നിടത്ത് തുളസി നല്ലതുപോലെ വളരും. മാത്രമല്ല, വീട്ടിനുള്ളില്‍ തുളസി ഉണ്ടെങ്കില്‍ ചുമയ്ക്കും ജലദോഷത്തിനുമെല്ലാം മരുന്നായും ഉപയോഗിക്കാം. ചായയിലും ഭക്ഷണത്തിലും തുളസി ചേര്‍ക്കാം. വെറുതേ കഴിച്ചാലും പ്രശ്‌നമില്ല.

കറിവേപ്പില- അടുക്കളയില്‍ മിക്ക കറികളിലും ഒഴിച്ചുകൂടാനാകാത്ത, ഔഷധഗുണങ്ങള്‍ ഏറെയുള്ള കറിവേപ്പിലയും ജനാലപ്പടിയില്‍ വളര്‍ത്താം. വളരെ പതുക്കയേ കറിവേപ്പില വളരൂ. സൂര്യപ്രകശം കറിവേപ്പിലയ്ക്ക് വലിയ ദോഷങ്ങള്‍ ചെയ്യില്ല. എല്ലാ കറികളിലും കറിവേപ്പില ഉപയോഗിക്കാം. ഇല്ലെങ്കില്‍ ഉണക്കിപ്പൊടിച്ച് തലയിലും മറ്റും തേക്കാം.

പുതിന-ജനാലപ്പടിയില്‍ നന്നായി വളരുന്ന മറ്റൊരു ചെടിയാണ് പുതിന. പുതിനയും ഔഷധസസ്യമാണ്. ദഹനപ്രശ്‌നങ്ങള്‍ മാറ്റാന്‍ പുതിനയ്ക്ക് കഴിവുണ്ട്. ചായയിലും മൊജിത്തോകളിലും സലാഡുകളിലും ചട്‌നിയിലുമെല്ലാം പുതിനയിടാം. വീട്ടിനുള്ളില്‍ പുതിനയുണ്ടെങ്കില്‍ അതിന്റെ സുഗന്ധവും അകത്തളങ്ങളെ ഫ്രഷ് ആക്കും. പുതിനയ്ക്ക് ദിവസവും വെള്ളം ഒഴിച്ചുകൊടുക്കേണ്ടതുണ്ട്.