കത്തികള്‍ വൃത്തിയാക്കാന്‍...

അടുക്കളയില്‍ ഒഴിച്ചു കൂടാന്‍ വയ്യാത്ത ഒന്നാണ് കത്തി. വീട്ടമ്മമാരുടെ മിത്രമെന്നു വേണമെങ്കില്‍ പറയാം. അടുക്കളയില്‍ മാത്രമല്ല, വീട്ടിലെയും തോട്ടത്തിലെയും മറ്റു പല ആവശ്യങ്ങള്‍ക്കും കത്തി വളരെ പ്രധാനമാണ്.

ഉപയോഗം കൂടുന്നതു കൊണ്ടുതന്നെ കത്തിയില്‍ കറ പിടിയ്ക്കാനുളള സാധ്യതയും കൂടുതലാണ്. പ്രത്യേകിച്ച് പച്ചക്കറികളും മറ്റും അരിയുമ്പോള്‍. മാത്രമല്ല, ഇരുമ്പു കൊണ്ടുള്ള കത്തികളില്‍ തുരുമ്പു പിടിയ്ക്കാനുള്ള സാധ്യതയും കൂടുതലാണ്.

കത്തി വൃത്തിയാക്കാനുള്ള ചില വഴികളെക്കുറിച്ചറിയൂ,

ഡിഷ് വാഷ് ഉപയോഗിച്ച് കത്തിയില്‍ ഉരസുക. പിന്നീട് ഇത് ചൂടുവെള്ളം കൊണ്ട് കഴുകി വൃത്തിയാക്കാം. ഇത് കത്തികളിലെ കറ കളയുന്നതിന് സഹായിക്കും.

കത്തിയില്‍ പ്ലാസ്റ്റിക്കിന്റെ ഭാഗമില്ലെങ്കില്‍ ഇത് ചൂടുവെള്ളത്തില്‍ ഇട്ടു വയ്ക്കാം. ഇതിനു ശേഷം പുറത്തെടുത്തു കഴുകി തുടച്ചു വൃത്തിയാക്കാം.

ചെറുനാരങ്ങ മുറിച്ചത് കത്തിയില്‍ ഉരസുക. ഇത് കത്തിയിലെ അഴുക്കും കറയും നീക്കാന്‍ സഹായിക്കും.കത്തി വൃത്തിയാവുകയും ചെയ്യും.

തിളയ്ക്കുന്ന വെള്ളത്തില്‍ അല്‍പം വിനെഗര്‍ ഒഴിയ്ക്കുക. ഇതില്‍ കത്തി മുക്കി വയ്ക്കുക. ഇത് അല്‍പം കഴിഞ്ഞ് കഴുകിയെടുത്ത് ഉണക്കാം.

ചൂടുവെള്ളത്തില്‍ ചെറുനാരങ്ങാനീരും സോപ്പുപൊടിയും കലര്‍ത്തുക. ഇതില്‍ കത്തി മുക്കി വയ്ക്കുന്നതും ഗുണം ചെയ്യും.

കത്തി എപ്പോഴും ഉണക്കി സൂക്ഷിയ്ക്കുക. അല്ലെങ്കില്‍ ഇത് കേടാകാനുള്ള സാധ്യത കൂടുതലാണ്.