ചില മുട്ടക്കാര്യങ്ങള്‍

മുട്ടെയ പറ്റി എന്തു കാര്യങ്ങളെന്നാവും. ചില ചെറിയ കാര്യങ്ങള്‍.

മുട്ട പുഴുങ്ങുമ്പോള്‍ പൊട്ടിപ്പോകുന്നത് ഒരു പ്രധാന പ്രശ്‌നമാണ്. മുട്ട പുഴുങ്ങുന്ന വെള്ളത്തില്‍ അല്‍പം ഉപ്പിട്ടാല്‍ ഈ പ്രശ്‌നത്തിന് പരിഹാരമായി. അല്ലെങ്കില്‍ മുട്ടയുടെ ഉരുണ്ട അറ്റത്ത് സൂചി കൊണ്ട് ചെറിയൊരു ദ്വാരമിടുക. മുട്ടയ്ക്കുള്ളിലെ വായു പുറത്തു പോയാല്‍ പിന്നെ മുട്ട പൊട്ടില്ല.

മുട്ട പൊരിക്കാനായി പാത്രത്തിലൊഴിക്കുമ്പോള്‍ പാത്രത്തിന്റെ വശങ്ങളില്‍ പറ്റിപ്പിടിക്കുന്നത് സാധാരണം. ഭക്ഷണത്തില്‍ ചേര്‍ക്കുന്ന വിധത്തിലുള്ള വിനാഗിരി അല്‍പം പാത്രത്തിന്റെ വശങ്ങളില്‍ പുരട്ടിയാല്‍ ഇതൊഴിവാക്കാം.

മുട്ട പാകത്തിന് നേരം മാത്രം പുഴുങ്ങുക. കൂടുതല്‍ പുഴുങ്ങിയാല്‍ മുട്ട മഞ്ഞയ്ക്ക് ചാരനിറം വരുന്നതു കാണാം. പൈപ്പു വെള്ളത്തിന്റെ താഴെ പുഴുങ്ങിയ മുട്ട പിടിച്ചാല്‍ ഈ നിറം വരാതിരിക്കും. ഇതിന് ശേഷം മുട്ടത്തോട് കളയുക.

മുട്ട വെള്ള അധികം വന്നാല്‍ ഒരു പാത്രത്തിലടച്ച് ഫ്രിഡ്ജില്‍ വച്ച് സൂക്ഷിക്കാം. ഇത് കേടു വരാതിരിക്കും.

പാത്രത്തില്‍ വെള്ളം തിളയ്ക്കുമ്പോള്‍ ഇതിലേക്ക് മുട്ട പൊട്ടിച്ചൊഴിക്കുക. പോച്ച്ഡ് എഗ് ഇതേ രീതിയിലാണ് തയ്യാറാക്കുക. ഇതില്‍ ഒരു തുള്ളി നാരങ്ങാനീരൊഴിച്ചാല്‍ മുട്ടവെള്ളയും മഞ്ഞയും വേര്‍പെടാതെ കിട്ടുകയും ചെയ്യും.