ചൂടുവെള്ളത്തില്‍ തുണി കഴുകാമോ?

തുണി കഴുകാന്‍ ചൂടുവെള്ളം ഉപയോഗിക്കുമ്പോള്‍ തുണി ചുരുങ്ങുകയാണ് ചെയ്യുന്നത്. തുണി ചുരുങ്ങുന്നതു മാത്രമല്ലാ, തുണിയുടെ നിറം മങ്ങുകയും ചെയ്യുന്നു. ചൂടുവെള്ളത്തിലിടുമ്പോള്‍ തുണികള്‍ക്ക് നിറം നല്‍കുന്ന ഡൈ മങ്ങുന്നു. ഇതാണ് നിറം പോകാന്‍ കാരണം.

തുണികളിലെ നൂലുകള്‍ക്കിടയില്‍ അകലം കൂടാനും ചൂടുവെള്ളത്തില്‍ കഴുകുന്നത് കാരണമാകും. ഇത് തുണിയുടെ ഗുണവും ഭംഗിയും നശിപ്പിക്കുകയും ചെയ്യും. ബ്രഷ് കൊണ്ട് തുണികള്‍ കഴുകുമ്പോള്‍ നൂലുകള്‍ വലിയുന്നതു പോലെയാണ് ചൂടുവെള്ളം തുണികളില്‍ പ്രവര്‍ത്തിക്കുന്നത്.

ചൂടുവെള്ളത്തില്‍ തുണി കഴുകുകയാണെങ്കില്‍ തന്നെ ശ്രദ്ധിക്കേണ്ട പല കാര്യങ്ങളുമുണ്ട്. ചില തുണികളുടെ ലേബലില്‍ ചൂടുവെള്ളം ഉപയോഗിക്കാമോ എന്നതു സംബന്ധിച്ച നിര്‍ദേശങ്ങളുണ്ടാകും. ഇത് വായിച്ചു നോക്കുക.

തുണി യാതൊരു കാരണവശാലും പത്തു മിനിറ്റില്‍ കൂടുതല്‍ ചൂടുവെള്ളത്തില്‍ ഇടരുത്.

തുണിയുടെ ഒരു ചെറിയ ഭാഗം ആദ്യം ചൂടുവെള്ളം ഉപയോഗിച്ച് കഴുകി നോക്കുക. നിറം പോകുകയാണെങ്കില്‍ പിന്നീടിത് കഴുകാന്‍ ചൂടുവെള്ളം ഉപയോഗിക്കരുത്.

തിളച്ച വെള്ളത്തില്‍ ഒരിക്കലും തുണിയിടരുത്. ചൂടുവെള്ളം മാത്രം ഉപയോഗിക്കുക.

തുണികളിലെ കറ കളയാനാണെങ്കില്‍ ചൂടുവെള്ളത്തിന് പകരം ബേക്കിംഗ് സോഡ, ചെറുനാരങ്ങാനീര് തുടങ്ങിയവ ഉപയോഗിക്കാം.