സോഫ ഒഴിവാക്കി സ്ഥലം ലാഭിക്കാം

Improvement

oi-Saritha

By Veena

Published: Tuesday, November 15, 2011, 11:29 [IST]

സോഫ സെറ്റുകള്‍ സ്വീകരണമുറിയുടെ അവിഭാജ്യഘടകങ്ങളാണ്. ഉപകാരം നിരവധിയുണ്ടെങ്കിലും ഇവയ്ക്ക് ധാരാളം സ്ഥലം വേണം. ചെറിയൊരു സ്വീകരണമുറിയാണെങ്കില്‍ ഒരു സോഫാസെറ്റ് ഇട്ടാല്‍ തന്നെ മുക്കാല്‍ഭാഗം സ്ഥലവും പോകും. പിന്നെ ഇരിക്കാന്‍ എന്തു ചെയ്യുമെന്നായിരിക്കും. മാര്‍ഗമുണ്ട്.

സോഫയ്ക്കു പകരം നിലത്തുവിരിക്കാവുന്ന പായയാണെങ്കിലോ. അയ്യേ എന്നു പറയാന്‍ വരട്ടെ. പണ്ടുകാലത്ത് രാജകൊട്ടാരങ്ങളില്‍ പോലും പരവതാനികളിലാണ് അതിഥികളെ ഇരുത്തിയിരുന്നത്. ഇപ്പോഴും കണ്ടിട്ടില്ലേ, ചില രാഷ്ട്രീയപാര്‍ട്ടികളും നിലത്തെ വിരിപ്പിലിരുന്നാണ് ചര്‍ച്ചകള്‍ നടത്തുന്നത്.

പായ വെറുതെ വിരിയ്‌ക്കേണ്ട. ഇതിനു മുകളില്‍ ഭംഗിയുള്ള വിരിപ്പ് വിരിക്കാം. വശങ്ങളില്‍ വിരിപ്പിന് ചേരുന്ന കുഷ്യനുകളോ ഉരുണ്ട തലയിണകളോ വയ്ക്കാം. അതിഥികള്‍ക്ക് വേറിട്ടൊരു കാഴ്ച കൂടിയാകും ഇത്. ആവശ്യം കഴിഞ്ഞാല്‍ മടക്കി വയ്ക്കാമെന്നതാണ് ഇതിന്റെ പ്രധാന ഗുണം.

പുതുതായി താമസം തുടങ്ങിയവര്‍ക്കും ബാച്ചിലേഴ്‌സിനും പറ്റിയതാണ് ബീന്‍ ബാഗുകള്‍. മൂന്നോ നാലോ ബീന്‍ ബാഗുകള്‍ വാങ്ങിയാലും സോഫാസെറ്റിനേക്കാളും സ്ഥലവും പണവും ലാഭിക്കാം. ഇരിക്കാനും സുഖമാണ്. എന്നാല്‍ അല്‍പം പ്രായമായവര്‍ക്ക് ഇതില്‍ ഇരിക്കുവാന്‍ ബുദ്ധിമുട്ടായിരിക്കും. അതുകൊണ്ട് ബീന്‍ ബാഗുകള്‍ വാങ്ങുമ്പോള്‍ പ്രായം കൂടി കണക്കിലെടുക്കണം.

ഇരിക്കാന്‍ പാകത്തിലുള്ള കുഷ്യനുകളും സോഫകള്‍ക്ക് പകരം ഉപയോഗിക്കാം. ആവശ്യത്തിനനുസരിച്ച് ഉയരത്തില്‍ കുഷ്യനുകള്‍ ലഭ്യമാണ്. അല്ലെങ്കില്‍ രണ്ടോ മൂന്നോ കുഷ്യനുകള്‍ ഒരുമിച്ചിടാം. ആളുകള്‍ ഇരുന്നാല്‍ മറിഞ്ഞുവീഴാത്ത തരത്തിലുള്ള കുഷ്യനുകള്‍ നോക്കി വാങ്ങണം. ഇവയ്ക്ക് പറ്റിയ കവറുകളും ഇടണം.

സ്ഥലം കളയാതിരിക്കാന്‍ ജാപ്പനീസ് ശൈലി വേണമെങ്കില്‍ സ്വീകരിക്കാം. ഒരു മേശയും അതിനു ചുറ്റും സ്റ്റൂളുകളുമാണ് ജാപ്പനീസ് സ്റ്റൈല്‍. മേശ മരത്തിന്റെയോ ഇരുമ്പിന്റെയോ ഗ്ലാസിന്റെയോ ആകാം. ഇതിന് ചുറ്റു ആറ് സ്റ്റൂളുകള്‍ ധാരാളം മതി. ഇത് വ്യത്യസ്തമായൊരു രീതി കൂടിയാകും. അധികം പണം ചെലവാകില്ലെന്നതും ഇതിന്റെ ഗുണമാണ്.

രാത്രി കിടക്കയായി ഉപയോഗിക്കാവുന്നതും പകല്‍ ഇരിക്കാവുന്നതുമായ സോഫാ കം ബെഡ് സ്ഥലം ലാഭിക്കുവാനുള്ള നല്ലൊരു മാര്‍ഗമാണ്.