സ്വെറ്ററുകള്‍ എളുപ്പത്തില്‍ വൃത്തിയാക്കാം

സ്വെറ്ററുകളില്‍ ഭക്ഷണ അവശിഷ്ടങ്ങള്‍ പോലുള്ളവ പറ്റിപ്പിടിച്ചിരിക്കുകയാണെങ്കില്‍ നഖം കൊണ്ട് പതുക്കെ മാന്തിക്കളയുന്നതായിരിക്കും നല്ലത്. ചെറിയ അഴുക്കുകള്‍ കഴുകാന്‍ നിന്നാല്‍ ഉണങ്ങാന്‍ സമയമെടുക്കും. എപ്പോഴും കഴുകുന്നത് തുണി കേടാക്കുകയും ചെയ്യും. മഷി പോലുളള വീണാല്‍ അവിടം മാത്രം കഴുകുകയോ അല്ലെങ്കില്‍ വെള്ളം നനച്ച് ഒപ്പിയെടുക്കുകയോ ചെയ്യുന്നതാണ് നല്ലത്.

ഇവ വാഷിംഗ് മെഷീനില്‍ ഇട്ടു കഴുകുന്നത് അത്ര നല്ലതല്ല. കൈകള്‍ ഉപയോഗിച്ച് മൃദുവായി കഴുകണം. വെള്ളത്തില്‍ കമ്പിളിത്തുണികള്‍ മുക്കി വയ്ക്കുകയുമരുത്. വീര്യം കുറഞ്ഞ സോപ്പുപൊടിയിട്ടായിരിക്കണം ഇവ കഴുകേണ്ടത്. കഴുകാന്‍ ബ്രഷുപയോഗിക്കുകയും ചെയ്യരുത്. ബ്രഷ് ഉപയോഗിച്ചാല്‍ ഇവയുടെ നൂലുകള്‍ അയഞ്ഞു പോകും.

കഴുകിയ ശേഷം ഏതെങ്കിലും ഫാബ്രിക് കണ്ടീഷണറില്‍ ഇവ മുക്കിയെടുക്കുന്നത് നല്ലതാണ്. ഹാംഗറില്‍ തൂക്കിയിട്ട് ഇവ ഉണക്കുന്നതാണ് നല്ലത്. വെയിലില്ലെങ്കില്‍ റൂം ഹീറ്ററിട്ടോ അല്ലെങ്കില്‍ ഹെയര്‍ ഡ്രയര്‍ ഉപയോഗിച്ചോ ഇത് ഉണക്കിയെടുക്കുക. കൂടുതല്‍ ദിവസം നനവോടെ കിടന്നാല്‍ കമ്പിളി വസ്ത്രങ്ങള്‍ക്ക് ദുര്‍ഗന്ധമുണ്ടാകും. തുണി പൂപ്പല്‍ പിടിക്കാനും സാധ്യതയുണ്ട്.

കുറച്ചു നാള്‍ കഴിഞ്ഞാല്‍ കമ്പിളി വസ്ത്രങ്ങളില്‍ നൂല്‍ പൊന്താന്‍ സാധ്യതയുണ്ട്. ഇങ്ങനെ പൊന്തി നില്‍ക്കുന്ന നൂലുകള്‍ പതുക്കെ വെട്ടിമാറ്റുക.

ഉണങ്ങിയ വസ്ത്രങ്ങള്‍ പേപ്പര്‍ ബാഗില്‍ മടക്കി വയ്ക്കണം. ഇവയില്‍ നാഫ്തലീന്‍ ഗുളികകളിട്ടു വയ്ക്കാം.

റോക്ക് സാള്‍ട്ട് ഇട്ട വെള്ളത്തില്‍ മുക്കിയാല്‍ കമ്പിളിവസ്ത്രങ്ങളുടെ നിറം പോവില്ല. ഒരിക്കലും ഇവ ബ്ലീച്ച് ചെയ്യരുത്.