പൂന്തോട്ടത്തില്‍ നല്ല മണ്ണു വേണ്ടേ?

ചെടികള്‍ പൂത്തുലഞ്ഞു നില്‍ക്കുന്ന ഒരു പൂന്തോട്ടം. കായ്‌ഫലങ്ങള്‍ വിളഞ്ഞുകിടക്കുന്ന ഒരു പച്ചക്കറിത്തോട്ടം. ഇതെല്ലാം സ്വപ്‌നം കാണാത്തവരായി ആരുമുണ്ടാകില്ല. തന്റെ തോട്ടത്തില്‍ നിന്നുള്ള പച്ചക്കറികളും മറ്റും അയല്‍വാസികള്‍ക്ക്‌ പങ്കിട്ടുകൊടുക്കുന്നത്‌ അഭിമാനകരമായ അനുഭവമായിരിക്കുമെന്ന്‌ പറയേണ്ടതില്ലല്ലോ?

നല്ലയിനം ചെടികള്‍ നട്ടുനനച്ചതു കൊണ്ട്‌ മാത്രം ഈ സ്വപ്‌നം സാക്ഷാത്‌കരിക്കാന്‍ കഴിയില്ല. ഫലഭൂയിഷ്‌ഠമായ മണ്ണ്‌ കൂടി വേണം. പതിവായി വളങ്ങള്‍ നല്‍കി മണ്ണിന്റെ ഫലപുഷ്ടി നിലനിറുത്തിയാല്‍ മാത്രമേ മെച്ചപ്പെട്ട വിളവ്‌ ലഭിക്കൂ. ജൈവവളങ്ങള്‍ ഉപയോഗിച്ച്‌ മണ്ണിന്റെ ഉത്‌പാദനക്ഷമത നിലനിറുത്താം.

മണ്ണില്‍ കമ്പോസ്‌റ്റ്‌ ഇടുക. മണ്ണിന്‌ അത്യാവശ്യം വേണ്ട പോഷകാംശമായ നൈട്രജന്‍ കമ്പോസ്‌റ്റില്‍ ധാരാളം അടങ്ങിയിട്ടുണ്ട്‌. മണ്ണില്‍ കമ്പോസ്‌റ്റ്‌ വാരി വിതറുന്നതിന്‌ പകരം ഇത്‌ നന്നായി കിളച്ച്‌ മണ്ണില്‍ ചേര്‍ക്കണം. കമ്പോസ്‌റ്റ്‌ വീട്ടില്‍ നിര്‍മ്മിച്ച്‌ ഉപയോഗിക്കുകയോ വാങ്ങിച്ച്‌ ഉപയോഗിക്കുകയോ ചെയ്യാം.

പശുവിന്റെയോ കുതിരയുടെയോ ചാണകം മണ്ണിലിടാം. ഇത്‌ നന്നായി കിളച്ച്‌ മണ്ണില്‍ ചേര്‍ക്കണം. ഇതിലും നൈട്രജന്‍ വലിയ അളവില്‍ അടങ്ങിയിട്ടുണ്ട്‌. നൈട്രജന്‍ ഹരിതസസ്യങ്ങളുടെ വളര്‍ച്ച ത്വരിതപ്പെടുത്തും.

രോഗബാധയില്ലാത്ത ഇലകള്‍ ചെറിയ കഷണങ്ങളാക്കി മണ്ണില്‍ ചേര്‍ക്കുക. കേടോ പൂപ്പല്‍ബാധയോ ഉള്ള ഇലകള്‍ ഉപയോഗിക്കാതിരിക്കാന്‍ പ്രത്യേകം ശ്രദ്ധിക്കണം. ഇത്‌ മണ്ണില്‍ രോഗാണുക്കളുടെ സാന്നിധ്യമുണ്ടാകാന്‍ ഇടയാക്കും. കിളച്ച്‌ ഇലകള്‍ മണ്ണിനടിയിലാക്കുക. ലോണ്‍മോവര്‍ ഉപയോഗിച്ച്‌ പുല്‍ത്തകിടിയില്‍ നിന്ന്‌ ഇലകള്‍ മുറിച്ചെടുക്കാവുന്നതാണ്‌.

വളരെയധികം ഉണങ്ങിയതും ഈര്‍പ്പമുള്ളതുമായ മണ്ണില്‍ ജൈവവസ്‌തുക്കള്‍ കിളച്ചു ചേര്‍ക്കുന്നത്‌ ഒഴിവാക്കുക. ഇളകിയ മണ്ണില്‍ മാത്രമേ ഇവ ചേര്‍ക്കാവൂ.