സ്വന്തം വീടുകളിലെ ഗന്ധം അറിയില്ല, പക്ഷേ മറ്റുള്ള വീടുകളിലെ ഗന്ധം വേഗം തിരിച്ചറിയും, കാരണമറിയുമോ?

മറ്റുള്ളവരുടെ വീടുകളിലെ ഗന്ധം പിടിച്ചെടുക്കാന്‍ എല്ലാവര്‍ക്കും കഴിയും, പക്ഷേ സ്വന്തം വീടുകളിലെ മണങ്ങള്‍ തിരിച്ചറിയാനും സാധിക്കില്ല. ഇത് സത്യമാണ്. ശാസ്ത്രീയമായ വിശദീകരണവുമുണ്ട്. നമ്മുടെ നാസാരന്ധ്രങ്ങള്‍ കാലക്രമേണ പരിചിതമായ ഗന്ധങ്ങളുമായി പൊരുത്തപ്പെടുന്നു. ഈ പ്രക്രിയയെ ഓള്‍ഫാക്റ്ററി അഡാപ്‌റ്റേഷന്‍ അല്ലെങ്കില്‍ നാസിക അന്ധത എന്ന് വിളിക്കുന്നു.

നമ്മുടെ മസ്തിഷ്‌കം ഒരു പ്രത്യേക ഗന്ധത്തോട് പരിചിതമാകുമ്പോഴാണ് ഘ്രാണ വ്യതിയാനം സംഭവിക്കുന്നത്. ദീര്‍ഘനേരം ഒരേ ഗന്ധം അനുഭവിക്കുമ്പോള്‍, നമ്മുടെ മസ്തിഷ്‌കം അതിനെ അവഗണിക്കാന്‍ തുടങ്ങുന്നു. ഇത് അന്തരീക്ഷത്തിലെ പുതിയതും പ്രധാനപ്പെട്ടതുമായ ഗന്ധങ്ങളില്‍ ശ്രദ്ധ കേന്ദ്രീകരിക്കാന്‍ സഹായിക്കുന്നു.

ഗന്ധത്തിന്റെ തന്മാത്രകളെ റിസപ്റ്ററുകളുമായി ബന്ധിപ്പിക്കുന്ന മൂക്കില്‍ നിന്നാണ് ഗന്ധം ആരംഭിക്കുന്നത്. ഈ റിസപ്റ്ററുകള്‍ തലച്ചോറിലേക്ക് സിഗ്‌നലുകള്‍ അയയ്ക്കുന്നതിന്റെ ഫലമായി പ്രത്യേക ഗന്ധങ്ങള്‍ അനുഭവിക്കാന്‍ കഴിയുന്നു. നിരന്തരം ഒരേ ഗന്ധങ്ങള്‍ അനുഭവിക്കേണ്ടി വരുമ്പോള്‍ ഈ സിഗ്‌നലുകള്‍ ശ്രദ്ധിക്കപ്പെടാതെ പോകുന്നു.

എന്തുകൊണ്ടാണ് മറ്റ് വീടുകളിലെ ഗന്ധങ്ങള്‍ അറിയാന്‍ കഴിയുന്നത്

മറ്റൊരാളുടെ വീട് സന്ദര്‍ശിക്കുമ്പോള്‍, നിങ്ങളുടെ മസ്തിഷ്‌കത്തില്‍ പൊരുത്തപ്പെടാത്ത പുതിയ ഗന്ധങ്ങള്‍ അനുഭവവേദ്യമാകുന്നു. പാചകം, വൃത്തിയാക്കല്‍ ഉല്‍പ്പന്നങ്ങള്‍, വളര്‍ത്തുമൃഗങ്ങള്‍, അല്ലെങ്കില്‍ വീട്ടില്‍ ഉപയോഗിക്കുന്ന വസ്തുക്കള്‍ എന്നിവയില്‍ നിന്നായിരിക്കാം ഈ ഗന്ധങ്ങള്‍ വരുന്നത്. ഈ ഗന്ധങ്ങള്‍ പുതിയതായതിനാല്‍, നിങ്ങളുടെ മസ്തിഷ്‌കം അവയില്‍ കൂടുതല്‍ ശ്രദ്ധ ചെലുത്തുന്നു. അങ്ങനെയാണ് മറ്റുള്ളവരുടെ വീടുകളിലെ ഗന്ധങ്ങള്‍ നിങ്ങളുടെ മൂക്ക് പെട്ടെന്ന് തിരിച്ചറിയുന്നത്.

വീടിന്റെ ഗന്ധത്തെ സ്വാധീനിക്കുന്ന ഘടകങ്ങള്‍

ഒരു വീടിന് അതിന്റേതായ ഗന്ധമുണ്ട്. അതിന് നിരവധി ഘടകങ്ങള്‍ കാരണമാകുന്നു. പാകം ചെയ്ത ഭക്ഷണം, ഉപയോഗിക്കുന്ന ശുചീകരണ ഉല്‍പ്പന്നങ്ങള്‍, വളര്‍ത്തുമൃഗങ്ങളുടെ സാന്നിധ്യം, അവിടെ താമസിക്കുന്ന ആളുകള്‍ പോലും ഇതില്‍ ഉള്‍പ്പെടുന്നു. ഈ ഘടകങ്ങള്‍ ഓരോന്നും വീടിന്റെ മൊത്തത്തിലുള്ള സൗരഭ്യത്തെ സ്വാധീനിക്കുന്നു.

ശുചിത്വ ഉല്‍പ്പന്നങ്ങള്‍

വീട്ടില്‍ ഉപയോഗിക്കുന്ന ശുചിത്വ ഉല്‍പ്പന്നങ്ങള്‍ ഒരു വീടിന്റെ ഗന്ധത്തെ ബാധിക്കും. പെര്‍ഫ്യൂമുകള്‍, ഷാംപൂകള്‍, സോപ്പുകള്‍ എന്നിവയ്ക്കെല്ലാം വായുവിലും തുണിത്തരങ്ങളിലും തങ്ങിനില്‍ക്കാന്‍ കഴിയുന്ന സവിശേഷഗന്ധങ്ങളുണ്ട്. വീടിന്റെ മൊത്തത്തിലുള്ള ഗന്ധത്തില്‍ ഇവയും ഒരു പങ്ക് വഹിക്കുന്നു.

പാരിസ്ഥിതിക ഘടകങ്ങള്‍

വീടിന് ചുറ്റുമുള്ള പരിസ്ഥിതിയും അതിന്റെ ഗന്ധത്തില്‍ ഒരു പങ്ക് വഹിക്കുന്നു. ഉദാഹരണത്തിന്, കടലിന് സമീപമുള്ള വീടുകള്‍ക്ക് ഉപ്പിന്റെ ഗന്ധം ഉണ്ടായിരിക്കാം, വനങ്ങള്‍ക്ക് സമീപമുള്ളവയ്ക്ക് മണ്ണിന്റെ മണം ഉണ്ടാകും. ഈ പാരിസ്ഥിതിക ഗന്ധങ്ങള്‍ വീടിനുള്ളില്‍ സവിശേഷ ഗന്ധം സൃഷ്ടിക്കാന്‍ ഇന്‍ഡോര്‍ ഗന്ധങ്ങളുമായി കൂടിച്ചേരുന്നു.

സ്വന്തം വീടിന്റെ മണം എങ്ങനെ തിരിച്ചറിയാം

നിങ്ങളുടെ സ്വന്തം വീടിന്റെ ഗന്ധം തിരിച്ചറിയണമെങ്കില്‍, കുറച്ച് ദിവസത്തേക്ക് വീട്ടില്‍ നിന്ന് മാറിനിന്ന് മടങ്ങിവരുമ്പോള്‍ ഗന്ധം ശ്രദ്ധിക്കുക. ഈ ഇടവേളയില്‍ നിങ്ങളുടെ മൂക്ക് വീട്ടിലെ മണങ്ങള്‍ മറക്കുന്നു. നിങ്ങള്‍ തിരികെ വരുമ്പോള്‍ മസ്തിഷ്‌കം പുതിയ ഗന്ധമായി വീട്ടിലെ മണത്തെ തിരിച്ചറിഞ്ഞേക്കാം.

ചുരുക്കത്തില്‍, നമുക്ക് സ്വന്തം വീടുകള്‍ മണക്കാന്‍ കഴിയാത്തതും മറ്റുള്ള വീടുകളിലെ മണങ്ങള്‍ കണ്ടെത്താന്‍ കഴിയുന്നതും എന്തുകൊണ്ടെന്ന് olfactory adaptation വിശദീകരിക്കുന്നു. നമ്മുടെ മസ്തിഷ്‌കം കാലക്രമേണ പരിചിതമായ ഗന്ധങ്ങളുമായി പൊരുത്തപ്പെടുന്നു.

Disclaimer : ഇവിടെ നല്‍കിയിരിക്കുന്ന വിവരങ്ങള്‍ ഇന്റര്‍നെറ്റില്‍ നിന്ന് ലഭിച്ച പൊതുവായ അനുമാനങ്ങളുടെയും വിവരങ്ങളുടെയും അടിസ്ഥാനത്തിലാണ്. മലയാളം ബോള്‍ഡ്സ്‌കൈ ഇത് സ്ഥിരീകരിക്കുന്നില്ല. ഇത്തരം കാര്യങ്ങള്‍ ചെയ്യുന്നതിന് മുന്‍പ് വിദഗ്ധന്റെ ഉപദേശം സ്വീകരിക്കേണ്ടതാണ്.