ദീപാവലിക്കു നിറക്കാഴ്ചയായി ചിരാതുകള്‍

Decor

oi-Saritha

By Veena

Published: Saturday, October 15, 2011, 12:12 [IST]

ദീപങ്ങളുടെ നിറക്കാഴ്ചയായ ദീപാവലി നമ്മുടെ പ്രധാന ആഘോഷമാണ്. ദീപ് എന്നും ആവലി എന്നുമുള്ള രണ്ടു ഹീന്ദി വാക്കുകളാണ് ദീപാവലിയായത്. ദീപ് എന്നാല്‍ ദീപമെന്നും ആവലിയെന്നാല്‍ കൂട്ടം എന്നാണുമര്‍ത്ഥം.എങ്ങും തെളിഞ്ഞു നില്‍ക്കുന്ന ആയിരം ദീപങ്ങള്‍ നമ്മുടെ മനസിലേക്കും പ്രകാശം പകരും. ദീപാവലിയുടെ ഏറ്റവും പ്രധാന ഘടകം ചിരാതുകളില്‍ കത്തിക്കുന്ന ദീപം തന്നെയാണ്. അമാവാസി നാളില്‍ ആഘോഷിക്കുന്ന ഏക ഉത്സവവും ഇതുമാത്രമാണ്. പ്രകാശമുള്ള വീടുകളേ ഗണപതിയും ലക്ഷ്മിയും സന്ദര്‍ശിക്കൂവെന്നാണ് വിശ്വാസം. അതുകൊണ്ടു തന്നെ ചിരാതില്‍ കത്തിക്കുന്ന ദീപങ്ങള്‍ക്ക് പ്രസക്തിയേറുന്നു.

ദീപങ്ങള്‍ കൊളുത്താനുള്ള ചിരാതുകള്‍ ദീപാവലിക്ക് ഏറ്റവും പ്രധാനമാണ്. ഇന്ന് വിപണിയില്‍ പല രൂപത്തിലും പല വര്‍ണത്തിലുമുള്ള ചിരാതുകള്‍ ലഭ്യമാണ്. കളിമണ്‍ ചിരാതുകളാണ് പരമ്പരാഗത രീതിയിലുള്ളവ. താല്‍പര്യമെങ്കില്‍ വീട്ടില്‍ത്തന്നെ നമുക്ക് ചിരാതുകള്‍ ഉ ണ്ടാക്കാവുന്നതേയുള്ളൂ.

പോളിമര്‍ ക്ലേ, പശ, മുത്തുകള്‍, ടീസേഴ്‌സ്, മെഴുകുതിരി എന്നിവയാണ് ഇതിനാവശ്യമായത്.

ആദ്യം മണ്ണെടുത്ത് പാകത്തിന് വെളളം ചേര്‍ത്തുകുഴച്ച് ആദ്യം കണ്ണുനീര്‍ത്തുളളിയുടെ ആകൃതിയില്‍ ആക്കിയെടുക്കുക. ഇതിന്റെ വശങ്ങള്‍ കൈകൊണ്ടു പതുക്കെ മുകളിലേക്കാക്കി ഒരു പാത്രത്തിന്റെ രൂപത്തിലാക്കിയെടുക്കുക. കൈവെള്ളയില്‍ പിടിക്കാവുന്ന വലുപ്പമേ ചിരാതിനുണ്ടായിരിക്കാവൂ. അതിനുളളില്‍ തിരിയിട്ട് എണ്ണയൊഴിക്കാനുളള സ്ഥലമുണ്ടാകണം. ചിലര്‍ തിരിക്കു പകരം മെഴുകുതിരിയും വക്കാറുണ്ട്. ചിരാത് പിന്നീട് വെയിലത്തു വച്ച് ഉണക്കിയെടുക്കണം.

ചിരാതുകള്‍ക്ക് നിറം കൊടുക്കുകയും അലങ്കരിക്കുകയും ചെയ്യുന്നത് അവയെ കൂടുതല്‍ മനോഹരമാക്കും. ഏതു നിറങ്ങള്‍ വേണമെങ്കിലും ചിരാതുകള്‍ക്ക് നല്‍കാം. ഒരു ചിരാതില്‍ തന്നെ ഒന്നിലധികം നിറങ്ങള്‍ നല്‍കാം. മുഴുവന്‍ നിറം നല്‍കാതെ ചില ഭാഗങ്ങള്‍ മാത്രം പെയിന്റ് ചെയ്യാം. ഭംഗിയുള്ള ചെറിയ ഡിസൈനുകളും വരച്ചു ചേര്‍ക്കാം. ചിരാതുകളിലെ പെയിന്റ് മുഴുവനായും ഉണങ്ങിയ ശേഷമെ ഇവ ഉപയോഗിക്കാവൂ.
ചെറിയ കണ്ണാടിക്കഷണങ്ങള്‍ ചിരാതില്‍ ഒട്ടിച്ചു ചേര്‍ത്താല്‍ കാണാന്‍ ഭംഗിയുണ്ടാകുമെന്നു മാത്രമല്ലാ, ദീപം തെളിയിക്കുമ്പോള്‍ ഈ ദീപത്തിന്റെ പ്രതിബിംബം കണ്ണാടികളില്‍ തെളിയുകയും ചെയ്യും. ഇതിനായി ചിരാതിന്റെ വശങ്ങളില്‍ പശ പുരട്ടണം. പിന്നീടിതില്‍ കണ്ണാടികളും മുത്തുകളും ഷെല്ലുകളും ഒട്ടിക്കാം. ഇവയും ഇളകിപ്പോകാത്ത വിധം ഉണക്കിയെടുക്കണം.വിളക്കുകള്‍ക്കുള്ളില്‍ തിരിയോ മെഴുകുതിരിയോ ഉറപ്പിക്കാം. ഇവയില്‍ എണ്ണയൊഴിച്ചു കത്തിക്കാം.

ചിരാതുകള്‍ ഉണ്ടാക്കുവാന്‍ മറ്റൊരു എളുപ്പമാര്‍ഗവുമുണ്ട്. ഗോതമ്പുമാവ് വെള്ളം ചേര്‍ത്തുകുഴച്ച് ആദ്യം ഉരുളകളാക്കുക. പിന്നീട് ഇവയ്ക്ക് ചിരാതിന്റെ രൂപം നല്‍കണം. ഇവ മോഡലായി ഉപയോഗിച്ച് ചിരാതുകള്‍ ഉണ്ടാക്കാം.വേണമെങ്കില്‍ ഗോതമ്പുമാവു കൊണ്ടു തന്നെ ചിരാതുകള്‍ ഉണ്ടാക്കുകയും ചെയ്യാം. ഗോതമ്പുമാവു കൊണ്ടുള്ള ചിരാതുകള്‍ തന്നെ ഉപയോഗിക്കുകയും ചെയ്യാം.ഗോതമ്പ് മാവിന്റെ കൂടെ കുറച്ച്‌
റോസാപ്പൂവിതളുകള്‍ കൂട്ടിച്ചേര്‍ത്ത് കുഴച്ചാല്‍ വ്യത്യസ്തമായ ചിരാതുകള്‍ കിട്ടും. മാത്രമല്ലാ, ഇവയ്ക്ക് നല്ല സുഗന്ധവുമുണ്ടാകും.