മാറുന്ന കാലാവസ്ഥയില്‍ ന്യുമോണിയ വഷളാകും; തടയാന്‍ വഴിയിത്

ന്യുമോണിയക്ക് കാരണങ്ങള്‍

ന്യുമോണിയ പകരുന്നതിന് ബാക്ടീരിയകളാണ് ഏറ്റവും സാധാരണമായ കാരണം. സ്‌ട്രെപ്‌റ്റോകോക്കസ് ന്യുമോണിയ അല്ലെങ്കില്‍ ന്യുമോകോക്കസ് ആണ് ഏറ്റവും സാധാരണമായ ബാക്ടീരിയ. ന്യുമോണിയ കേസുകളുടെ പകുതിയോളവും സംഭവിക്കുന്നത് ഈ ബാക്ടീരിയി കാരണമാണ്. വിട്ടുമാറാത്ത ശ്വാസകോശ രോഗങ്ങളുള്ളവരില്‍ മറ്റ് ബാക്ടീരിയകളും ന്യുമോണിയയ്ക്ക് കാരണമായേക്കാം. ന്യുമോണിയയുടെ പ്രധാന കാരണങ്ങളിലൊന്നാണ് ക്ഷയരോഗം.

ന്യുമോണിയ ലക്ഷണങ്ങള്‍

പനി, നെഞ്ചുവേദന, ചുമ, വിറയല്‍, ശ്വാസതടസ്സം, വേഗത്തിലുള്ള ശ്വാസോച്ഛ്വാസം എന്നിവയാണ് ന്യൂമോണിയയുടെ ലക്ഷണങ്ങള്‍. പ്രായമായ ആളുകള്‍ക്ക് വളരെ ഗുരുതരമായ അസുഖമുണ്ടാകാം, എന്നാല്‍ കുറച്ച് ലക്ഷണങ്ങള്‍ മാത്രമേ കാണിക്കുകയുള്ളൂ. ചുമയ്ക്കുമ്പോള്‍ പഴുപ്പോ രക്തമോ അടങ്ങിയ കഫം പുറത്തുവരുന്നത് ഗുരുതരമായ അണുബാധയുടെ സൂചനയാണ്. അസുഖം കടുത്തതായാല്‍ ചര്‍മ്മം നീലകലര്‍ന്നതായി മാറിയേക്കാം. കൂടാതെ രക്തത്തിലെ ഓക്‌സിജന്റെ അളവും കുറഞ്ഞേക്കാം.

അപകടസാധ്യതാ ഘടകങ്ങള്‍

രോഗപ്രതിരോധ ശേഷി കുറവുള്ളവര്‍ക്കും 65 വയസ്സിനു മുകളിലുള്ളവര്‍ക്കും മറ്റുള്ളവരെ അപേക്ഷിച്ച് ന്യുമോണിയ പിടിപെടാനുള്ള സാധ്യത കൂടുതലാണ്. പുകവലിക്കുന്നവര്‍ക്കും സ്ഥിതി മറ്റൊന്നല്ല. ജലദോഷം, പനി തുടങ്ങിയ അണുബാധകളും ന്യുമോണിയയുടെ അപകട സാധ്യത വര്‍ദ്ധിപ്പിക്കുന്നു. ശസ്ത്രക്രിയക്ക് വിധേയരായവരിലും ന്യുമോണിയ സാധ്യതയുണ്ട്. ന്യുമോണിയയുടെ മറ്റ് അപകട ഘടകങ്ങളാണ് മദ്യത്തിന്റെയും മയക്കുമരുന്നിന്റെയും ഉപയോഗം, പ്രമേഹം, കാന്‍സര്‍, ആസ്ത്മ, കരള്‍ രോഗങ്ങള്‍, ബ്രോങ്കൈറ്റിസ്, ഹൃദയ സംബന്ധമായ അസുഖങ്ങള്‍ എന്നിവ.

ന്യുമോണിയ പലതരം

ഏകദേശം 8 തരം ന്യുമോണിയയുണ്ട്. അണുക്കള്‍ മൂലമുണ്ടാകുന്ന വിവിധ തരം ന്യുമോണിയകള്‍ ഇവയാണ്:

* വൈറ ന്യൂമോണിയ - ഇത് ശ്വസന വൈറസുകള്‍ മൂലമാണ് ഉണ്ടാകുന്നത്.

* ബാക്ടീരിയ ന്യൂമോണിയ - ഇത് സ്‌ട്രെപ്‌റ്റോകോക്കസ് ന്യൂമോണിയ മൂലമാണ് ഉണ്ടാകുന്നത്.

* ഫംഗല്‍ ന്യുമോണിയ - ഇത് മണ്ണില്‍ നിന്നുള്ള ഫംഗസുകള്‍ മൂലമാണ് ഉണ്ടാകുന്നത്.

ന്യുമോണിയ സാധ്യത തടയാന്‍

സാംക്രമിക രോഗങ്ങള്‍ ഒഴിവാക്കുന്നതിനുള്ള ഏറ്റവും സാധാരണമായ മാര്‍ഗ്ഗങ്ങളിലൊന്ന് അവ ബാധിച്ച ആളുകളുമായി സമ്പര്‍ക്കം പുലര്‍ത്താതിരിക്കുക എന്നതാണ്. ന്യുമോണിയ പടരാതിരിക്കാനായി ചില കാര്യങ്ങള്‍ നിങ്ങള്‍ ശ്രദ്ധിക്കേണ്ടതുണ്ട്. ന്യുമോണിയ വാക്‌സിന് കൃത്യമായി എടുക്കുക. നിങ്ങളുടെ രോഗപ്രതിരോധ ശേഷി വര്‍ദ്ധിപ്പിക്കുന്നതിന് ഇത് സഹായിക്കുന്നു. ആരോഗ്യകരവും ശുചിത്വവുമുള്ള ജീവിതം നയിക്കുക എന്നതാണ് ന്യുമോണിയ പോലുള്ള പകര്‍ച്ചവ്യാധികള്‍ തടയുന്നതിനുള്ള മറ്റൊരു മാര്‍ഗ്ം. പതിവായി സോപ്പ് ഉപയോഗിച്ച് കൈ കഴുകുക. പതിവായി വ്യായാമം ചെയ്യുന്നതിലൂടെയും ആരോഗ്യകരവും പോഷകപ്രദവുമായ ഭക്ഷണം കഴിക്കുന്നതിലൂടെയും ആരോഗ്യകരമായ ജീവിതശൈലി പിന്തുടരുക. നിങ്ങള്‍ താമസിക്കുന്ന ചുറ്റുപാടുകള്‍ ശുചിയായി വയ്ക്കുക. പുകവലി ഒഴിവാക്കുക. ന്യുമോണിയ പോലുള്ള സാംക്രമിക രോഗങ്ങളുടെ അപകടസാധ്യതയുള്ള ആളുകളില്‍ ഭൂരിഭാഗവും പുകവലിക്കാരാണ്.