പ്രഭാത ഭക്ഷണത്തിലും ഒളിഞ്ഞിരിപ്പുണ്ട് ചില രഹസ്യം

നമുക്ക് വളരണ്ടേ?

വളര്‍ച്ചയ്ക്ക് അത്യാവശ്യമായുള്ള ഘടകങ്ങള്‍ ലഭിക്കുന്നത് പ്രത്യേകിച്ചും നാം കഴിക്കുന്ന പ്രഭാത ഭക്ഷണത്തില്‍ നിന്നാണ്. അതുകൊണ്ട് പ്രഭാത ഭക്ഷണം കുറച്ച് ആഘോഷമാക്കിയാലും ഒരു കുഴപ്പവുമില്ല.

തൂക്കം കൃത്യമായി നിലനിര്‍ത്തും

വിശ്വസിക്കാന്‍ പ്രയാസമോ? പ്രഭാത ഭക്ഷണം സ്ഥിരമായി കഴിക്കുന്ന ഒരാള്‍ തികച്ചും ആരോഗ്യവാനും കൃത്യമായ തൂക്കം ഉള്ളയാളുമായിരിക്കും. നമ്മുടെ പ്രായത്തിനനുസരിച്ചുള്ള കൃത്യമായ തൂക്കം പ്രഭാത ഭക്ഷണം നമുക്ക് നല്‍കുന്നു.

പോഷകങ്ങളാല്‍ സമ്പുഷ്ടം

പ്രഭാത ഭക്ഷണം കഴിക്കുന്നതു തന്നെ ഒരു തരത്തില്‍ ആരോഗ്യമുള്ള ശരീരത്തെ പ്രദാനം ചെയ്യുന്നു. എന്നാല്‍ ആ ഭക്ഷണത്തില്‍ അല്‍പം പയറു വര്‍ഗ്ഗങ്ങളും, പാല്‍, മുട്ട എന്നിവയും കൂടി ഉള്‍പ്പെടുത്തിയാല്‍ സംഗതി ഉഷാറാകും. പക്ഷേ അവിടേയും ഒഴിവാക്കേണ്ട ചില കാര്യങ്ങളുണ്ട് അവയിലൊന്നാണ് ജങ്ക് ഫുഡ്.

ഏകാഗ്രത, ശ്രദ്ധ

നമ്മുടെ കുട്ടികള്‍ക്ക് ആരോഗ്യകരമായ പ്രഭാത ഭക്ഷണം നല്‍കാന്‍ എന്നും എപ്പോഴും ടീച്ചര്‍മാരുടെ ഉപദേശം ഉണ്ടാകും. കൃത്യമായ സമയത്ത് ഭക്ഷണം കഴിക്കുന്ന ഒരു കുട്ടിക്ക് ഏകാഗ്രത, ശ്രദ്ദ തുടങ്ങിയ ഗുണങ്ങള്‍ ഉണ്ടാകും. ക്ലാസ്സില്‍ ശ്രദ്ധിക്കാതിരിക്കുക, ഡസ്‌കില്‍ ചാരി ഉറക്കം തൂങ്ങിയിരിക്കുക തുടങ്ങിയ കലാപരിപാടികള്‍ പതിവായിരിക്കും. ഇതിനു പരിഹാരമെന്നോണമാണ് പ്രഭാതഭക്ഷണം പലരും നിര്‍ദ്ദേശിക്കുന്നത്.

സ്വഭാവത്തിലും മാറ്റം?

വിശന്നിരിക്കുമ്പോള്‍ ഞാന്‍ ഞാനല്ലാതായി മാറുമെന്ന് പലരും പറഞ്ഞ് നാം കേട്ടിട്ടുണ്ട്. പറഞ്ഞു കേള്‍ക്കുക മാത്രമല്ല പലര്‍ക്കും അനുഭവവുമുണ്ടായിരിക്കും. എന്നാല്‍ നാം കൃത്യസമയത്ത് പ്രഭാത ഭക്ഷണം കഴിച്ചു കഴിയുമ്പോള്‍ നമ്മുടെ സ്വഭാവത്തില്‍ തന്നെ ഒരു പോസിറ്റീവ് മാറ്റം വരും. അതു കൊണ്ട് തന്നെ എന്തൊക്കെ ഒഴിവാക്കിയാലും പ്രഭാത ഭക്ഷണം നാം ഒരിക്കലും ഉപേക്ഷിക്കരുത്.