നാവ് ശുചിത്വത്തിന് 10 കാര്യങ്ങള്‍

1. നാവ് വടിക്കല്‍

നാവ് വൃത്തിയാക്കുന്നതിന് ഏറ്റവും സാധാരണയായി ചെയ്ത് വരുന്ന രീതിയാണ് നാവ് വടിക്കല്‍. ഇതിനായി പ്ലാസ്റ്റിക്,അല്ലെങ്കില്‍ ലോഹം കൊണ്ടുള്ള സ്ക്രാപ്പര്‍ ഉപയോഗിക്കാം. എന്നാല്‍ നാവ് വടിക്കുന്ന സമയത്ത് അധികം മര്‍ദ്ദം ചെലുത്തിയാല്‍ ചോര വരാനിടയാകും.

2. മൗത്ത്‍വാഷ്

ഭക്ഷണം കഴിച്ച് കഴിഞ്ഞാല്‍ മൗത്ത്‍വാഷ് ഉപയോഗിച്ച് വായ കഴുകുന്നത് ബാക്ടീരിയകള്‍ വഴി വായ്നാറ്റമുണ്ടാക്കുന്നത് തടയും. ഇത് വഴി വായും, നാവും വൃത്തിയായിരിക്കും.

3. ഉപ്പ് വെള്ളം

വായ പതിവായി ഉപ്പ് വെള്ളം ഉപയോഗിച്ച് കഴുകുന്നത് മൗത്ത്‍വാഷ് ഉപയോഗിക്കുന്നതിന് സമാനമായ ഫലം നല്കും. അണുക്കള്‍ നാവില്‍ വളരുന്നത് തടയുകയും ബാക്ടീരിയ, ഭക്ഷണാവശിഷ്ടങ്ങള്‍ എന്നിവ പല്ല് കേടാക്കുന്നതും, വായ്നാറ്റമുണ്ടാക്കുന്നതും തടയുകയും ചെയ്യും.

4. ഓയിന്‍റ്മെന്‍റുകള്‍

പനിയുള്ളപ്പോള്‍ നാവിന് മേലെ വെളുത്ത നിറം വരുന്നത് പലരും ശ്രദ്ധിച്ചിട്ടുണ്ടാവും. ഇത് ചിലപ്പോള്‍ ഫംഗസ് ബാധ മൂലമാകും. ഇത് തടയാന്‍ ഒരു ഡോക്ടറെ കണ്ട് അനുയോജ്യമായ ഓയിന്‍റ്മെന്‍റുകള്‍ ഉപയോഗിക്കുക.

5. ബ്രഷിന്‍റെ പിന്‍ഭാഗം

ചില ടൂത്ത് ബ്രഷുകളുടെ പിന്‍ഭാഗത്ത് പരുക്കനായ ഭാഗമുണ്ടാകും. ഇവിടം ടൂത്ത് പേസ്റ്റിനൊപ്പം ഉരച്ച് നാവ് വൃത്തിയാക്കാം.

6. ഗ്രീന്‍ ടീ

ഏറെ ആരോഗ്യഗുണങ്ങളുള്ള ഗ്രീന്‍ ടീ വായിലെ ബാക്ടീരിയകളെ നശിപ്പിക്കാനും ഉപയോഗിക്കാം. ഗ്രീന്‍ ടീ കുടിക്കുന്നത് നാവ് വൃത്തിയായിരിക്കാന്‍ സഹായിക്കും.

7. വെള്ളം

ശരീരത്തിലെ ജലാംശം കുറയുന്നത് നാവിലെ നിറമാറ്റത്തിന് കാരണമാകും. ഇത് തടയാനായി ധാരാളം വെള്ളം കുടിക്കുന്നത് ശീലമാക്കുക. കുടലിന്‍റെ പ്രവര്‍ത്തനത്തെ സുഗമമാക്കാനും ഇത് സഹായിക്കും.

8. ഉപദ്രവകാരികളായ ഭക്ഷണങ്ങള്‍

നാവിന് അലര്‍ജിയും, അസ്വസ്ഥതയുമുണ്ടാക്കുന്ന ഭക്ഷണങ്ങളുണ്ട്. ഇത് വ്യക്തികള്‍ക്കനുസരിച്ച് മാറും. അത്തരം ഭക്ഷണങ്ങളുപയോഗിക്കാതിരിക്കുക. അഥവാ കഴിക്കുകയാണെങ്കില്‍ ശേഷം വായും നാവും നല്ലത് പോലെ വൃത്തിയാക്കുക.

9. ഭക്ഷണത്തിന് മുമ്പും ശേഷവും വൃത്തിയാക്കുക

പലരും ഭക്ഷണ ശേഷം വായ വൃത്തിയാക്കാന്‍ ഉപദേശിക്കാറുണ്ട്. എന്നാല്‍ ഭക്ഷണത്തിന് മുമ്പും വായും നാവും വൃത്തിയാക്കുന്നത് ഏറെ ആരോഗ്യകരമാകുമെന്നാണ് പഠനങ്ങള്‍ കാണിക്കുന്നത്. ഇത് വഴി ഉപദ്രവകാരികളായ ബാക്ടീരിയകള്‍ വയറ്റിലെത്തുന്നത് തടയാം.

10. പതിവായ വൃത്തിയാക്കല്‍

ഇവിടെ പറഞ്ഞവയെല്ലാം പതിവായും, ഭക്ഷണശേഷവും, കിടക്കുന്നതിന് മുമ്പും നാവ് എങ്ങനെ വൃത്തിയാക്കണമെന്നതാണ്. ഇവ സ്ഥിരമായി ചെയ്യുന്നത് വഴി വായുടെ ആരോഗ്യം മാത്രമല്ല പിങ്ക് നിറമുള്ള ആരോഗ്യപൂര്‍ണ്ണമായ നാവും സ്വന്തമാക്കാം.