പ്രായത്തെ തടയും ഭക്ഷണങ്ങള്‍

സാല്‍മണ്‍

തൊലി ഉണര്‍വുള്ളതാകണമെങ്കില്‍ ആഴ്ചയില്‍ സാല്‍മണ്‍ മല്‍സ്യം (കോര,ചെമ്പല്ലി ഇനത്തിലെ മല്‍സ്യങ്ങള്‍) കഴിക്കണമെന്നാണ് അമേരിക്കന്‍ ഹാര്‍ട്ട് ഫൗണ്ടേഷന്‍െറ പഠനം പറയുന്നത്. ഒമേഗാ ത്രീ ഫാറ്റി ആസിഡ് ധാരാളം അടങ്ങിയ സാല്‍മണില്‍ രോഗങ്ങളില്‍ നിന്ന് പ്രതിരോധ കവചമൊരുക്കുന്ന വൈറ്റമിന്‍ ബി12, വൈറ്റമിന്‍ ഡി എന്നിവയും അടങ്ങിയിട്ടുണ്ട്. അമ്പത് വയസ് കഴിഞ്ഞ സ്ത്രീകളില്‍ പൊതുവെ കാണപ്പെടുന്ന രക്ത സമ്മര്‍ദത്തിനും സാല്‍മണ്‍ നല്ലോരു മരുന്നാണ്.

പച്ച നിറത്തിലുള്ള പച്ചക്കറികള്‍

കാബേജ്,ചീര തുടങ്ങിയ പച്ചനിറത്തിലുള്ള ഇലകളോടെയുള്ള പച്ചക്കറികള്‍ ധാരാളം കഴിക്കണം. വൈറ്റമിന്‍ സി,വൈറ്റമിന്‍ കെ, ഫോളിക്ക് ആസിഡ്, അയേണ്‍,പൊട്ടാസ്യം, കാല്‍സ്യം, മഗ്നീഷ്യം തുടങ്ങി തൊലിയുടെയും ശരീരത്തിൻറെയും ആരോഗ്യത്തിന് അന്ത്യന്താപേക്ഷിതമായ നിരവധി ഘടകങ്ങള്‍ ഇതിലുണ്ട്.

വെളുത്തുള്ളി

രുചിക്കും മണത്തിനും ഒപ്പം ശരീരത്തിന് അത്യന്താപേക്ഷിതമാണ് വെളുത്തുള്ളി. വിഷാംശങ്ങളെയും കാര്‍സിനോജനുകളെയും ഒഴിവാക്കാനൂള്ള കരളിൻറെ പ്രകൃതിദത്തമായ കഴിവ് വെളുത്തുള്ളി അടങ്ങിയ ഭക്ഷണം കഴിക്കുന്നതിലൂടെ വര്‍ധിക്കും. ഹൃദയാരോഗ്യത്തിനും നല്ലതായ വെളുത്തുള്ളിയുടെ ഉപയോഗം കോശങ്ങളുടെ അമിത വളര്‍ച്ചതെ തടയുകയും തലച്ചോറിലേക്കുള്ള രക്തയോട്ടം സുഗമമാക്കുകയും ചെയ്യും.

എക്സ്ട്രാ വിര്‍ജിന്‍ ഒലീവ് ഓയില്‍

ആരോഗ്യകരമായ തൊലിയും മുടിയും കാത്തുസൂക്ഷിക്കുന്നതിനുള്ള ആരോഗ്യകരമായ കൊഴുപ്പുകള്‍ അടങ്ങിയതാണ് ഒലീവ് ഓയില്‍. മോണോ സാച്ച്വറേറ്റഡ് ഫാറ്റി ആസിഡുകള്‍ അടങ്ങിയ ഒലീവ് ഓയില്‍ അമേരിക്കയടക്കം രാജ്യങ്ങളിലെ ഭക്ഷണശീലങ്ങളില്‍ നിന്ന് അപ്രത്യക്ഷമാവുകയാണ്. കുറഞ്ഞ രീതിയില്‍ മാത്രം സംസ്കരിക്കുന്നതിനാല്‍ എക്സ്ട്രാ വിര്‍ജിന്‍ ഓയില്‍ ഏറെ രുചികരമായിരിക്കും. ഒലീവ് ഉപയോഗിച്ച് പാചകം ചെയ്യുമ്പോള്‍ ഒരിക്കലും ഓയില്‍ പുകയുന്നിടത്തോളം ചൂടാക്കരുത്. കുറഞ്ഞതോ മീഡിയം ചൂടോ മാത്രം ഉപയോഗിക്കുക. പുകയുന്ന പക്ഷം ഒലീവ് ഓയില്‍ പുളിപ്പുള്ളതായി തീരും.

കുരുവില്ലാത്ത പഴങ്ങള്‍ കഴിക്കുക

കുരുവില്ലാത്ത പഴങ്ങളായ ബ്ളൂബെറി, സ്ട്രോബെറി, ക്രാന്‍ബെറി, ബ്ളാക്ക്ബെറി എന്നിവയില്‍ അടങ്ങിയിരിക്കുന്ന ഫ്ളവനോയിഡുകള്‍ ശക്തമായ ആന്‍റി ഓക്സിഡന്‍റുകളാണ്. ഇവ തലച്ചോറിലെ സിഗ്നലുകളെ പരിപോഷിപ്പിക്കുകയും ഗ്രഹണ ശേഷി വര്‍ധിപ്പിക്കുകയും ചെയ്യുമെന്ന് വിദഗ്ധര്‍ പറയുന്നു.