ചിക്കന്‍പോക്സിന്‍റെ ലക്ഷണങ്ങള്‍

കടുത്ത പനി

ശരീരത്തിലെ രോഗപ്രതിരോധ സംവിധാനം വൈറസിന്‍റെ സാന്നിധ്യം തിരിച്ചറിയുന്നതോടെ അതിനെ തുരത്താനായി ശരീരത്തിന്‍റെ താപനില വര്‍ദ്ധിപ്പിച്ച് തുടങ്ങും. 100.4 ഡിഗ്രിയും അതിന് മേലേക്കും താപനില ഉയരാം. പനിക്കൊപ്പമുള്ള ഇന്‍ഫ്ലുവെന്‍സയുടെ ലക്ഷണങ്ങള്‍ കുട്ടികളേക്കാള്‍ മുതിര്‍ന്നവരിലാകും പ്രശ്നമാകുക.

തലവേദന

ചിക്കന്‍പോക്സിന്‍റെ അടയാളങ്ങള്‍ ശരീരത്തില്‍ കാണുന്നതിന് ഒന്നോ രണ്ടോ ദിവസം മുമ്പേ ചെറിയ തലവേദന ആരംഭിക്കും. തൊണ്ടവേദന, ചുമ, മൂക്കൊലിപ്പ് തുടങ്ങിയ ലക്ഷണങ്ങളും ഉണ്ടാകാം. ഇവ കൂടിവരുകയും ശരീരമാകെ രോഗം ബാധിക്കുകയും ചെയ്യും.

ചൊറിച്ചിലും ചുവന്ന പാടുകളും

തലവേദന, തൊണ്ടവേദന, ചുമ തുടങ്ങിയവയാണ് ചിക്കന്‍പോക്സിന്‍റെ പ്രാരംഭ ലക്ഷണങ്ങള്‍. ഇക്കാരണത്താല്‍ തന്നെ ഇത് ഇന്‍ഫ്ലുവെന്‍സയായി തെറ്റിദ്ധരിക്കപ്പെടാം. എന്നാല്‍ ചൊറിച്ചിലും, ചുവന്ന പാടുകളും കാണപ്പെടുന്നത് ചിക്കന്‍പോക്സിന്‍റെ ലക്ഷണമാണ്. ചൊറിച്ചില്‍ ക്രമേണ രൂക്ഷമാകും. കുട്ടികളില്‍ ചൊറിച്ചില്‍ ചര്‍മ്മത്തിലെ പ്രശ്നങ്ങള്‍ക്കും കാരണമാകാം.

പാടുകളും മുറിവുകളും

ചൊറിച്ചില്‍ തുടങ്ങി 12-14 മണിക്കൂറിനകം ചുവന്ന തിണര്‍പ്പുകള്‍ ചുവന്ന കുരുക്കളോ പാടുകളോ ആയി മാറും. ഇവയുടെ മുകള്‍ഭാഗം തീപ്പൊള്ളലേറ്റത് പോലെയാകും. ആദ്യം വയര്‍, മുഖം, പുറം, നെഞ്ച് എന്നിവിടങ്ങളിലാകും ഇവ പ്രത്യക്ഷപ്പെടുക. തുടര്‍ന്ന് കൈകള്‍, കാല്‍, തലയോട്ടി, നാക്ക്, വായ എന്നിവിടങ്ങളിലുമുണ്ടാകും. ഇതിന്‍റെ തീവ്രത ഓരോരുത്തരിലും വ്യത്യസ്ഥമായിരിക്കും. ശരാശരി 200-250 കുരുക്കള്‍ ഇത്തരത്തില്‍ ശരീരത്തിലുണ്ടാകാം.

വിശപ്പില്ലായ്മ

കുട്ടികളില്‍ പനിയും ചുവന്ന തിണര്‍പ്പുകളും കാണുന്നതിനൊപ്പം വയര്‍ വേദനയും അനുഭവപ്പെടാം. ക്ഷീണവും ഛര്‍ദ്ദിയും മൂലം വിശപ്പ് കുറയും. ഇത് ശരീരഭാരം കുറയാനിടയാക്കും.

ക്ഷീണം

രോഗപ്രതിരോധ ശേഷിക്കുറവും, ഛര്‍ദ്ദിയും, വിശപ്പില്ലായ്മയും മൂലം രോഗിക്ക് കാര്യമായ ക്ഷീണം അനുഭവപ്പെടും.