ദഹനപ്രശ്‌നങ്ങള്‍ പരിഹരിക്കാം

ദഹനപ്രശ്‌നങ്ങള്‍ പലരേയും അലട്ടുന്ന ഒന്നാണ്. ഭക്ഷണം ദഹിക്കാതിരുന്നാല്‍ വയറിളക്കം, ഛര്‍ദി പോലുള്ള പ്രശ്‌നങ്ങള്‍ ഉണ്ടാവുകയും ചെയ്യും.

ഭക്ഷണകാര്യത്തില്‍ ശ്രദ്ധിക്കുകയെന്നത് വളരെ പ്രധാനമാണ്. കാരണം മിക്കവാറും ഭക്ഷണങ്ങള്‍ ശരിയാകാതെ വരുമ്പോഴാണ് ദഹന പ്രക്രിയയും നേരെ നടക്കാത്തത്. ചില ഭക്ഷണങ്ങള്‍ എളുപ്പം ദഹിയ്ക്കും. ചില ഭക്ഷണങ്ങളാകട്ടെ, ദഹിക്കാന്‍ ഏറെ സമയം പിടിക്കുകയും ചെയ്യും.

ദഹനപ്രശ്‌നങ്ങളകറ്റാന്‍ ചില എളുപ്പ വഴികളുണ്ട്.

തവിടു കളയാത്ത ധാന്യങ്ങള്‍, പഴങ്ങള്‍, പച്ചക്കറി എന്നിവ ഭക്ഷണക്രമത്തില്‍ ഉള്‍പ്പെടുത്തണം.

ചെറുനാരങ്ങ ദഹനപ്രശ്‌നങ്ങള്‍ അകറ്റാന്‍ നല്ലതാണ്. ദിവസവും ചെറുനാരങ്ങാവെള്ളം കുടിയ്ക്കുക. ചെറുനാരങ്ങാനീര് ഭക്ഷണങ്ങളില്‍ ചേര്‍ത്തു കഴിയ്ക്കാം. പച്ചക്കറികളുടെ സാലഡ് തയ്യാറാക്കി ഇതില്‍ അല്‍പം ചെറുനാരങ്ങാനീരൊഴിച്ചു കഴിയ്ക്കുന്നത് ദഹനത്തെ സഹായിക്കും.

കരിക്കിന്‍ വെള്ളം കുടിയ്ക്കുന്നത് ദഹനത്തെ സഹായിക്കും. ഇത് അസിഡിറ്റി പോലുള്ള പ്രശ്‌നങ്ങള്‍ ഒഴിവാക്കുകയും ചെയ്യും. ദഹനം നന്നാകും. വെള്ളം കുടിയ്ക്കുന്നത് പതിവാക്കുക. ദഹനപ്രക്രിയയെ ശക്തിപ്പെടുത്താന്‍ ഇതിന് കഴിയും.

പൈനാപ്പിള്‍, പപ്പായ എന്നിവ ദഹനപ്രക്രിയയെ സഹായിക്കുന്ന ഭക്ഷണങ്ങളാണ്.
വറുത്ത ഭക്ഷണങ്ങള്‍, ഫാസ്റ്റ് ഫുഡ് എന്നിവ കഴിയ്ക്കാതിരിക്കുക. ഇവ ദഹനപ്രക്രിയക്ക് തടസം വരുത്തുന്ന ഭക്ഷണങ്ങളാണ്.

ഭക്ഷണത്തില്‍ വെളുത്തുള്ളി ചേര്‍ക്കുന്നത് നല്ലതാണ്. ഇത് ദഹനപ്രക്രിയയെ കൂടുതല്‍ വേഗത്തിലാക്കും. അസിഡിറ്റി, ഗ്യാസ് തുടങ്ങിയ പ്രശ്‌നങ്ങള്‍ പരിഹരിക്കാനും വെളുത്തുള്ളി നല്ലതാണ്.
നടക്കുന്നതു പോലുള്ള ലഘു വ്യായാമങ്ങള്‍ ചെയ്യുന്നത് ദഹനത്തെ സഹായിക്കുന്ന പ്രക്രിയകളാണ്.

സമയാസമയത്തു ഭക്ഷണം കഴിയ്ക്കുന്നതും ദഹനത്തെ സഹായിക്കും. പ്രത്യേകിച്ച് രാത്രിയില്‍. ഉറങ്ങുന്നതിന് രണ്ടുമൂന്നു മണിക്കൂര്‍ മുന്‍പെങ്കിലും ഭക്ഷണം കഴിയ്ക്കാന്‍ ശ്രദ്ധിക്കണം. ഇത് ദഹനത്തെ സഹായിക്കുന്ന ഒന്നാണ്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.