ചെമ്പരത്തി ഇലയുടെ ആരോഗ്യവശങ്ങള്‍

By VIJI JOSEPH

Published: Friday, November 15, 2013, 12:50 [IST]

ഉഷ്ണമേഖലാ പ്രദേശങ്ങളില്‍ സാധാരണമായി കാണുന്ന മനോഹരമായ പൂവുകളുണ്ടാകുന്ന ചെടിയാണ് ചെമ്പരത്തി. ചെമ്പരത്തി അതിന്‍റെ ഇനങ്ങളുടെ വൈവിധ്യത്താല്‍ ഏറെ പ്രശസ്തമാണ്. സൗത്ത് കൊറിയ, മലേഷ്യ, ഹെയ്റ്റി എന്നീ രാജ്യങ്ങളുടെ ദേശീയ പുഷ്പമാണ് ഇത്. ഇന്ത്യയില്‍ ചെമ്പരത്തിപ്പൂവ് ഹൈന്ദവ ആരാധനയില്‍ ഒരു പ്രധാന ഘടകമാണ്. ചെമ്പരത്തിയുടെ പൂവും ഇലയും ഏറെ ഔഷധഗണമുള്ളവയാണ്. ഭാരതീയ ആയുര്‍വേദത്തില്‍ നൂറ്റാണ്ടുകളായി ചെമ്പരത്തി പല രോഗങ്ങള്‍ക്കും പ്രതിവിധിയായി ഉപയോഗിച്ചുവരുന്നു.

ഔഷധ ആവശ്യങ്ങള്‍ക്ക് മാത്രമല്ല ചെമ്പരത്തി ഉപയോഗിക്കപ്പെടുന്നത്. അണിഞ്ഞൊരുങ്ങാനും, പൂന്തോട്ടങ്ങള്‍ക്ക് ചാരുതയേകാനും ചെമ്പരത്തി വ്യാപകമായി ഉപയോഗിക്കപ്പെടുന്നുണ്ട്. പാര്‍ക്കുകളിലും, പൂന്തോട്ടങ്ങളിലും ഒരു മുഖ്യ ഇനമായി ചെമ്പരത്തിയെ കാണാനാവും. ചെമ്പരത്തി ഇലകള്‍ക്കും വൈവിധ്യമാര്‍ന്ന ഉപയോഗമാണുള്ളത്. മെക്സിക്കന്‍ രീതിയില്‍ ആഹാരവിഭവങ്ങളുടെ അലങ്കാരത്തിന് ഉണങ്ങിയ ചെമ്പരത്തിപ്പൂവ് ഉപയോഗിച്ചു വരുന്നു. ചെമ്പരത്തിപ്പൂവ് ഉപയോഗിച്ചുള്ള ഒരിനം ചായ ലോകത്ത് പലയിടങ്ങളിലും പ്രശസ്തമാണ്. ഇവ പല ദേശങ്ങളില്‍ പല പേരുകളിലാണ് അറിയപ്പെടുന്നത്.

ചെമ്പരത്തിയുടെ ഔഷധഗുണം പല ഗവേഷണങ്ങള്‍ വഴിയും തെളിയിക്കപ്പെട്ടതാണ്. 2008 ല്‍ യു.എസ്.ഡി.എ നടത്തിയ പഠനമനുസരിച്ച് ചെമ്പരത്തിയുടെ ചായ കുടിക്കുന്നത് രക്തസമ്മര്‍ദ്ധം കുറയ്ക്കുമെന്ന് കണ്ടെത്തിയിട്ടുണ്ട്. ആയുര്‍വേദത്തില്‍ ചുവപ്പ്, വെള്ള ചെമ്പരത്തികള്‍ക്ക് വലിയ പ്രധാന്യമാണുള്ളത്. ചുമ, തലമുടി കൊഴിച്ചില്‍, മുടി ചെമ്പിക്കല്‍ എന്നിവയ്ക്ക് ആയുര്‍വേദത്തിലെ ഒരു പ്രധാന ഔഷധമാണ് ചെമ്പരത്തി. ആന്‍റി ഓക്സിഡന്‍റുകള്‍ ധാരാളമായി അടങ്ങിയ ചെമ്പരത്തി പ്രായത്തിന്‍റെ അടയാളങ്ങളെ തടയാനും നല്ലതാണ്. ചെമ്പരത്തി ഇല കൊണ്ടുള്ള ചായ മാനസികമായി ആശ്വാസം നല്കും.

ചെമ്പരത്തി ഇലയുടെ ചില ഔഷധ ഉപയോഗങ്ങളാണ് ഇവിടെ പറയുന്നത്

1. തലമുടിക്ക് സംരക്ഷണം

തലമുടിയില്‍ ഉപയോഗിക്കാവുന്ന ഹെയര്‍ കണ്ടീഷണറായി ചെമ്പരത്തി ഉപയോഗിക്കാം. ഇലയും, പൂവിന്‍റെ ഇതളുകളും അരച്ച് ഒരു പ്രകൃതിദത്ത കണ്ടീഷണറായി ഉപയോഗിക്കാം. മുടിക്ക് നിറം കൂടുതല്‍ കിട്ടാനും, താരന്‍ കുറയ്ക്കാനും ഷാംപൂ കൊണ്ട് കഴുകിയ ശേഷം ഇത് ഉപയോഗിക്കുക.

2. ചായ

ചെമ്പരത്തി ഇല കൊണ്ടുള്ള ചായ പല രാജ്യങ്ങളിലും ഔഷധമായി ഉപയോഗിക്കുന്നുണ്ട്. വൃക്കത്തകരാറുള്ളവരില്‍ മൂത്രോത്പാദനം സുഗമമാക്കാന്‍ പഞ്ചസാര ചേര്‍ക്കാത്ത ചെമ്പരത്തി ചായ നല്ലതാണ്. മാനസിക സമ്മര്‍ദ്ധം കുറയ്ക്കാനും ചെമ്പരത്തി ചായ ഉപയോഗിക്കപ്പെടുന്നു.

3. ചര്‍മ്മ സംരക്ഷണം

ചര്‍മ്മസംരക്ഷണത്തിനുപയോഗിക്കുന്ന ഉത്പന്നങ്ങളിലുള്ള ഘടകങ്ങള്‍ ചെമ്പരത്തിയിലും അടങ്ങിയിട്ടുണ്ട്. പരമ്പരാഗത ചൈനീസ് ഔഷധങ്ങളില്‍ ചെമ്പരത്തിയിലയുടെ നീര് സൂര്യപ്രകാശത്തില്‍ നിന്നുള്ള അള്‍ട്രാ വയലറ്റ് റേഡിയേഷന്‍ ഒഴിവാക്കാനായി ഉപയോഗിച്ചിരുന്നു. കൂടാതെ ചര്‍മ്മത്തിലെ ചുളിവുകള്‍ക്കും മറ്റ് പല പ്രശ്നങ്ങള്‍ക്കും അവര്‍ ചെമ്പരത്തി ഉപയോഗപ്പെടുത്തുന്നു.

4. രക്ത സമ്മര്‍ദ്ധം കുറയ്ക്കാം

ഉയര്‍ന്ന രക്തസമ്മര്‍ദ്ധം അനുഭവിക്കുന്നവര്‍ക്ക് ആശ്വാസം നല്കാന്‍ ചെമ്പരത്തിയുടെ ഇല കൊണ്ടുള്ള ചായ കുടിക്കുന്നത് സഹായിക്കും. സ്ഥിരവും, നിയന്ത്രിതവുമായ ഉപയോഗം ഇതിന് ആവശ്യമാണ്.

5. മുറിവുകള്‍ ഉണക്കാം

ചെമ്പരത്തിയില്‍ നിന്നെടുക്കുന്ന എണ്ണ മുറിവുകള്‍ ഉണക്കാന്‍ ഉപയോഗിക്കുന്നു. ക്യാന്‍സര്‍ മൂലമുള്ള മുറിവുകള്‍ ഉണക്കാനും ഇത് ഫലപ്രദമാണ്. ആരംഭദശയിലുള്ള ക്യാന്‍സറിനാണ് ഇത് ഏറെ ഗുണം ചെയ്യുക. ചെമ്പരത്തി എണ്ണ ഉപയോഗിച്ചാല്‍ മുറിവുകള്‍ വേഗത്തില്‍ ഉണങ്ങും.

6. കൊളസ്ട്രോള്‍ കുറയ്ക്കാം

ദോഷകരമായ എല്‍.ഡി.എല്‍ കൊളസ്ട്രോള്‍ കുറയ്ക്കാന്‍ ചെമ്പരത്തി ഇലകൊണ്ടുള്ള ചായ ഫലപ്രദമാണ്. ധമനികളില്‍ കൊഴുപ്പ് അടിയുന്നത് തടയുകയും അതുവഴി കൊള്സ്ട്രോള്‍ കുറയ്ക്കാനും ഇത് സഹായിക്കും.

7. ചുമ, ജലദോഷം

ചുമ, ജലദോഷം എന്നിവയെ തടയാന്‍ സഹായിക്കുന്ന വിറ്റാമിന്‍ സി സമൃദ്ധമായി ചെമ്പരത്തി ചായയിലും, മറ്റ് ഉത്പന്നങ്ങളിലുമടങ്ങിയിരിക്കുന്നു. ജലദോഷത്തിന് ശമനം കിട്ടാനും ഇവ സഹായിക്കും.

8. ശരീരഭാരം കുറയ്ക്കാനും, ദഹനത്തിനും

ചെമ്പരത്തി ഒരു പ്രകൃതിദത്ത ദഹനസഹായിയായി പ്രവര്‍ത്തിക്കുകയും, ശരീരഭാരം കുറയ്ക്കാന്‍ സഹായിക്കുകയും ചെയ്യും. ചെമ്പരത്തി ഇലകൊണ്ടുള്ള ചായ നല്ല ദഹനം നല്കുകയും, അതു വഴി കൊഴുപ്പ് അമിതമായി ശരീരത്തിലടിയുന്നത് തടയുകയും ചെയ്യും.

9. ആര്‍ത്തവം

ചെമ്പരത്തി ഇല കൊണ്ടുള്ള ചായ സ്ഥിരമായി കഴിക്കുന്നത് സ്ത്രീകളുടെ ശരീരത്തിലെ ഈസ്ട്രജന്‍ ഹോര്‍മോണിന്‍റെ അളവ് കുറയ്ക്കാന്‍ സഹായിക്കും. ഇതു വഴി ശരീരത്തിന്‍റെ ഹോര്‍മോണ്‍ നില സന്തുലിതമാക്കപ്പെടുകയും ആര്‍ത്തവം ക്രമമായി നടക്കുകയും ചെയ്യും.

10. പ്രായത്തിന്‍റെ അടയാളങ്ങളെ തടയാം

ആന്‍റി ഓക്സിഡന്‍റുകളാല്‍ സമ്പന്നമാണ് ചെമ്പരത്തി. ശരീരത്തിലെ ദോഷകാരികളായ മൂലകങ്ങളെ പുറന്തള്ളാന്‍ ഇതിന് കഴിവുണ്ട്. അതിനാല്‍ ചെമ്പരത്തി ഉപയോഗം വഴി പ്രായം കൂടുന്നത് മൂലമുണ്ടാകുന്ന പല ശാരീരികപ്രവര്‍ത്തനങ്ങളെയും തടഞ്ഞ് ആയുര്‍ദൈര്‍ഘ്യം കൂട്ടാന്‍ ഇവ സഹായിക്കും.