തടി കുറയ്ക്കാന്‍ ചില ശീലങ്ങളും

ഭക്ഷണശീലം പറയുകയാണെങ്കില്‍ വണ്ണം കുറഞ്ഞ പലരും കൃത്രിമ ഭക്ഷണങ്ങള്‍ അകറ്റി നിര്‍ത്തുന്നവരാണ്. പ്രോസസ്ഡ് ഫുഡ്, കൃത്രിമ നിറങ്ങള്‍, മധുരം തുടങ്ങിയവ ഒഴിവാക്കി പോഷകം നിറഞ്ഞ ഭക്ഷണം കഴിയ്ക്കുന്നവര്‍.

ആരോഗ്യകരമായ കൂട്ടത്തില്‍ കൂടുക. ആരോഗ്യശീലങ്ങള്‍ പിന്‍തുടരുന്ന കൂട്ടൂകാരുണ്ടെങ്കില്‍ സ്വാഭാവികമായി നമ്മളും ഇത്തരം ജീവിതത്തിലേക്കു തിരിയും. ഉദാഹരണമായി വ്യായാമം ചെയ്യുന്ന സുഹൃദ് സംഘമാണെങ്കില്‍ സ്വാഭാവികമായി നമ്മളും വ്യായാമം ചെയ്തു തുടങ്ങും.

മനസിണങ്ങിയ ജോലി സ്വീകരിക്കുക. ഇഷ്ടമില്ലാത്ത ജോലി ചെയ്യുന്നത് മാനസികസമ്മര്‍ദത്തിന് കാരണമാകും. മടുപ്പ് തടി കൂട്ടുന്ന ഘടകം തന്നെയാണ്.

മടി പിടിച്ച് ഒരു സ്ഥലത്ത് ചടഞ്ഞു കൂടിയിരിക്കാതെ എപ്പോഴും ഉന്മേഷത്തോടെയിരിക്കുക. മടി തടി കൂട്ടുന്ന ഘടകമാണ്. ടിവിക്കു മുന്നില്‍ എന്തെങ്കിലും കൊറിച്ച് കുത്തിപ്പിടിച്ചിരിക്കുന്നത് തടി കൂട്ടുന്ന മടിയ്ക്ക് ഒരു ഉദാഹരണം.

വ്യായാമം ഒരു ശീലമാക്കുക. ദിവസവും അരമണിക്കൂറെങ്കിലും വ്യായാമം മുടങ്ങാതെ ചെയ്യുന്നത് ഫിറ്റായ ശരീരത്തിനുള്ള ഒരു മാര്‍ഗമാണ്.

സ്‌ട്രെസ്, ടെന്‍ഷന്‍ തുടങ്ങിയവ കുറയ്ക്കാനുള്ള വഴികള്‍ തേടുക. അഡ്രിനാലിന്‍, കോര്‍ട്ടിസോള്‍ തുടങ്ങിയ ഹോര്‍മോണുകള്‍ തടി കൂട്ടുന്ന ഘടകങ്ങളാണ്. ഇവ ടെന്‍ഷനടിക്കുമ്പോള്‍ ഉല്‍പാദിപ്പിക്കപ്പെടുന്നതും.

ആരോഗ്യകരമായ ശീലങ്ങള്‍ക്ക് അസുഖം വരാന്‍ കാത്തിരിക്കേണ്ടതില്ല, ഡയറ്റും ഭക്ഷണനിയന്ത്രണവും മാത്രം പോര, കൃത്യമായ മെഡിക്കല്‍ ചെക്കപ്പും ആരോഗ്യമുള്ള ശരീരത്തിന് വളരെ പ്രധാനം. പ്രമേഹം, കൊളസ്‌ട്രോള്‍ തുടങ്ങിയവ പരിശോധിക്കുക. ഇവ നിയന്ത്രിച്ചു നിര്‍ത്തുന്നത് തടി കുറയ്ക്കാനുള്ള വഴികളിലൊന്നാണ്.

ഏതു കാര്യത്തിനും നിയന്ത്രണം വേണം. ഐസ്‌ക്രീം ഇഷ്ടമാണെങ്കില്‍ കഴിയ്ക്കാം. എന്നാല്‍ പാകത്തിന് മാത്രം കഴിയ്ക്കുക. ഇഷ്ടമാണെന്നു കരുതി വാരി വലിച്ചു തിന്നരുത്. എല്ലാ കാര്യത്തിനും ഇതു തന്നെ പാലിക്കണം.