പെണ്‍കാര്യങ്ങള്‍, കരുതലുകള്‍

Wellness

oi-Saritha

By Veena

Updated: Thursday, August 2, 2012, 16:24 [IST]

കൗമാരം ഒരു പെണ്‍കുട്ടിയുടെ ജീവിതത്തിലെ ഏറ്റവും പ്രധാനപ്പെട്ട അവസ്ഥയാണെന്നു പറയാം. ശാരീരിക, മാനസിക മാറ്റങ്ങളുടെ സമയം. ഒരേ സമയം സന്തോഷങ്ങളും ആശങ്കകളുമുണ്ടാകുന്ന കാലം.

ആര്‍ത്തവം തുടങ്ങുന്നതും ഹോര്‍മോണ്‍ പ്രവര്‍ത്തനങ്ങള്‍ തുടങ്ങുന്നതും ഈ കാലത്താണ്. പൊതുവെ പെണ്‍കുട്ടികള്‍ പെട്ടെന്ന് വളരുന്ന പ്രായം.

ശാരീരിക പ്രവര്‍ത്തനങ്ങളുടെ ഫലമായി ഈ കാലങ്ങളില്‍ വിശപ്പു കൂടും. ഇത് കൂടുതല്‍ ഭക്ഷണം കഴിയ്ക്കാന്‍ കാരണമാകും. തടി കൂട്ടും. വറുത്തതും പൊരിച്ചതുമായ ഭക്ഷണങ്ങള്‍ മുഖക്കുരു പോലുള്ള ചര്‍മപ്രശ്‌നങ്ങള്‍ ഉണ്ടാക്കുകയും ചെയ്യും. ഭക്ഷണകാര്യങ്ങളില്‍ കൗമാരപ്രായക്കാരായ പെണ്‍കുട്ടികള്‍ ശ്രദ്ധിക്കണമെന്നു പറയുന്നതിന്റെ കാര്യങ്ങള്‍ ഇതൊക്കെയാണ്.

ഒരിക്കല്‍ അമിതവണ്ണം വച്ചാല്‍ പിന്നെ അത് കുറയുക വളരെ ബുദ്ധിമുട്ടാണ്. വണ്ണം വയ്ക്കാതിരിക്കുവാന്‍ നോക്കുക. വിശക്കുമ്പോള്‍ പച്ചക്കറി, ഫലങ്ങള്‍ തുടങ്ങിയവ കഴിയ്ക്കാം. ജ്യൂസ് കുടിയ്ക്കുന്നത് വിശപ്പു കുറയുവാന്‍ സഹായിക്കും. വ്യായാമം, യോഗ എന്നിവ പതിവാക്കുക.

കൗമാരകാലം പെണ്‍കുട്ടികളില്‍ മാസമുറ ആരംഭിയ്ക്കുന്ന സമയം കൂടിയാണ്. ആര്‍ത്തവത്തെ കുറിച്ചും ആര്‍ത്തവസമയത്ത് പാലിക്കേണ്ട വൃത്തിയെക്കുറിച്ചും അറിഞ്ഞിരിക്കണം. ഈ സമയത്ത് ജനനേന്ദ്രിയത്തില്‍ അണുബാധ ഉണ്ടാകാനുള്ള സാധ്യത കൂടുതലായതു കൊണ്ട് വൃത്തി ഏറ്റവും പ്രധാനമാണ്.

മാസമുറ ആരംഭിക്കുന്ന സമയത്ത് ശാരീരികവും മാനസികവുമായ ബുദ്ധിമുട്ടുകള്‍ ഉണ്ടാകും.വയറുവേദന, കൈകാല്‍ കഴപ്പ് എന്നിവ സാധാരണമാണ്. ഈ സമയത്ത് ധാരാളം വെള്ളം കുടിയ്ക്കണം. പുളി, ഉപ്പ് തുടങ്ങിയവ കുറയ്ക്കുന്നത് വയറുവേദന കുറയ്ക്കുന്നതിന് നല്ലതാണ്. ഇത്തരം ശാരീരിക പ്രയാസങ്ങളുമായി ചേര്‍ന്നുപോകാന്‍ പെണ്‍കുട്ടികല്‍ ശീലിച്ചേ മതിയാകൂ.

ക്രമരഹിതമായ ആര്‍ത്തവം കൗമാരക്കാരില്‍ കണ്ടുവരുന്ന പ്രശ്‌നമാണ്. പ്രത്യേകിച്ചും മാസമുറയുടെ തുടക്കത്തില്‍. ഇത് ക്രമേണ ശരിയായിക്കൊളളും. ദീര്‍ഘനാള്‍ കഴിഞ്ഞിട്ടും ഈ പ്രശ്‌നം തുടരുകയാണെങ്കില്‍ ഡോക്ടറെ കാണുന്നത് നല്ലതാണ്. എത്ര ദിവസത്തിനുള്ളിലാണ് മാസമുറ വരുന്നത് എന്ന് കൃത്യമായി രേഖപ്പെടുത്തുന്നത് നല്ലതാണ്.

കൗമാരത്തില്‍ തന്നെ ലൈംഗിക കാര്യങ്ങളില്‍ പെണ്‍കുട്ടികള്‍ക്ക് തിരിച്ചറിവുണ്ടാകേണ്ടത് പ്രധാനമാണ്. ഇത് പലപ്പോഴും മുന്‍കരുതലുകളെടുക്കാന്‍ സഹായിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.