വിശപ്പു കുറയ്ക്കാന്‍ വഴിയുണ്ട്

Published: Tuesday, November 6, 2012, 15:28 [IST]

വിശപ്പാണ് പലരുടേയും പ്രശ്‌നം. ഇതു രണ്ടു വിധമുണ്ട്. ഭക്ഷണം തീരെ കഴിയ്ക്കാതിരിക്കുമ്പോള്‍ വിശപ്പു തോന്നുന്നത് സാധാരണം. എന്നാല്‍ ഭക്ഷണം കഴിച്ചിട്ടും വിശക്കുന്നേയെന്ന മന്ത്രം ചൊല്ലുന്നവരുണ്ട്.

അമിതമായ വിശപ്പ് ഒരു രോഗമെന്നു വേണമെങ്കില്‍ പറയാം. പ്രമേഹം പോലുള്ള അസുഖങ്ങളുള്ളവര്‍ക്കും ചിലപ്പോള്‍ വിശപ്പു കൂടുതല്‍ തേന്നു.

അമിതമായ വിശപ്പ് അനാരോഗ്യകരമായ ഭക്ഷണശീലങ്ങളിലേക്കു വഴി വയ്ക്കും. ഇത് അസുഖങ്ങളും വണ്ണം പോലുള്ള പ്രശ്‌നങ്ങളും ഉണ്ടാക്കുകയും ചെയ്യും.

നല്ല ഉറക്കം വിശപ്പു നിയന്ത്രിക്കാന്‍ പ്രധാനമാണെന്ന കാര്യം പലര്‍ക്കും അറിഞ്ഞു കൂടാത്ത വസ്തുതയാണ്. ശരിയായി ഉറങ്ങാതിരിക്കുമ്പോള്‍ മെലാട്ടനിന്‍ എന്ന ഹോര്‍മോണ്‍ ഉല്‍പാദനം കൂടുന്നു. ഇത് വിശപ്പു കൂട്ടും.

ഭക്ഷണം ചവച്ചരച്ചു കഴിയ്ക്കുന്നത് വിശപ്പു കുറയ്ക്കും. ഭക്ഷണത്തിന്റെ അളവും സ്വാഭാവികമായി കുറയും.

ടെന്‍ഷന്‍ വരുമ്പോള്‍ കൂടുതല്‍ ഭക്ഷണം കഴിയ്ക്കുന്നവരുണ്ട്. ടെന്‍ഷന്‍ മറക്കാനുള്ള ഒരു ശ്രമമാണിതിത്. ഇങ്ങനെ ചെയ്യുന്നതിന് പകരം ടെന്‍ഷന്‍ ഒഴിവാക്കാന്‍ ശ്രമിക്കുക. അല്ലെങ്കില്‍ ടെന്‍ഷന്റെ പേരില്‍ ഭക്ഷണം കഴിയ്ക്കുന്ന ശീലം ഒഴിവാക്കുക.

പ്രാതല്‍ ഒഴിവാക്കുന്നത് വിശപ്പു കൂട്ടുക മാത്രമല്ല, ഭക്ഷണത്തോട് ആര്‍ത്തി തോന്നാനും കാരണമാകും. ഇത് അനാരോഗ്യകരമായ ഭക്ഷണശീലങ്ങളിലേക്കു തിരിയാനും ഇട വരുത്തും. ഡയറ്റിന്റെ പേരില്‍ ആവശ്യത്തിനു പ്രാതല്‍ കഴിയ്ക്കാത്തതും പ്രശ്‌നങ്ങളുണ്ടാക്കും.