നേരത്തെ എഴുന്നേല്‍ക്കൂ, ഗുണങ്ങളറിയണോ?

വ്യായാമം ചെയ്യാന്‍ സമയമില്ലെന്നു പരാതിപ്പെടുന്ന ഭൂരിഭാഗം പേരും വൈകി ഉണരുന്നവരായിരിക്കും. നേരത്തെ എഴുന്നേറ്റാല്‍ സമാധാനമായി വ്യായാമം ചെയ്യാം. ഇതിനായി സമയം മാറ്റി വയ്ക്കാനും സാധിക്കും.

ധ്യാനം പോലുള്ളവ ചെയ്യാനും നേരത്തെ എഴുന്നേല്‍ക്കുന്നതു കൊണ്ട് സമയമുണ്ടാക്കാന്‍ സാധിക്കും. ഇത് ശരീരത്തിനും മനസിനും ഒരുപോലെ ഗുണം ചെയ്യും.

അതിരാവിലെ ഉണര്‍ന്നെണീറ്റ് ചുറ്റുപാടും പ്രകൃതിഭംഗിയും ആസ്വദിക്കാന്‍ ഏറ്റവും പറ്റിയ സമയമാണ്. പ്രകൃതിയെ ആസ്വദിക്കാന്‍ പറ്റിയ ഇതിലും നല്ല സമയമില്ലെന്നു തന്നെ പറയാം.

നേരമില്ലെന്ന കാര്യം പറഞ്ഞ് പ്രാതല്‍ ഉപേക്ഷിക്കുന്നവരുണ്ട്. ഇത് ഏറ്റവും അനാരോഗ്യകരമായ ഒരു ശീലം തന്നെയാണ്. നേരത്തെയെഴുന്നേറ്റാല്‍ ഈ പ്രശ്‌നം പരിഹരിക്കാം.

നേരത്തെയെഴുന്നേല്‍ക്കുന്നതു കൊണ്ട് ഹോട്ടല്‍ ഭക്ഷണവും വറുത്തതും പൊരിച്ചതുമെല്ലാം ഒഴിവാക്കാമെന്നൊരു ഗുണം കൂടിയുണ്ട്. ഇത് ആരോഗ്യത്തിനു ചെയ്യുന്ന പ്രയോജനം ഏറെയാണ്.

സ്‌ട്രെസ്, ടെന്‍ഷന്‍ എന്നിവ കുറയ്ക്കാന്‍ ഈ ശീലം സഹായിക്കും. നേരം വൈകിയെന്ന പേരില്‍ ഉണ്ടാകുന്ന ടെന്‍ഷന്‍ മിക്കവാറും പേര്‍ക്കും ചെറുതൊന്നുമല്ല.

നല്ല മൂഡിനും നേരത്തെ എഴുന്നേല്‍ക്കുന്ന ശീലം സഹായിക്കും. ഡിപ്രഷന്‍, ഇന്‍സോംമ്‌നിയ തുടങ്ങിയ പല രോഗങ്ങള്‍ക്കും നേരത്തെ എഴുന്നേല്‍ക്കുന്ന ശീലം ഗുണം ചെയ്യുമെന്നു തെളിഞ്ഞിട്ടുണ്ട്.