തടി കുറയ്ക്കാന്‍ ചില 'ട്രിക്കു'കള്‍

ഭക്ഷണത്തിനൊപ്പം കോള, മില്‍ക് ഷെയ്ക്, കോള്‍ഡ് കോഫി തുടങ്ങിയ ശീലങ്ങളുണ്ടെങ്കില്‍ ഉപേക്ഷിച്ചേക്കൂ. ഇവയില്‍ പഞ്ചസാരയുടെ അളവ് കൂടുതലാണ്. രക്തത്തിലെ പഞ്ചസാരയുടെ തോതില്‍ വ്യതിയാനങ്ങളുണ്ടാകാന്‍ ഇത് കാരണമാവുകയും ചെയ്യും. ഇവ കഴിച്ചാല്‍ വയര്‍ പെട്ടെന്ന് നിറഞ്ഞെന്ന തോന്നലുണ്ടാകും. എന്നാലോ ഇത് താല്‍ക്കാലികവും. വീണ്ടും പെട്ടെന്നു വിശക്കാന്‍ ഇടയാക്കും. പഞ്ചസാരയും ഒഴിവാക്കാമായിരുന്ന വിശപ്പും തടി കൂട്ടാനുള്ള കാരണങ്ങള്‍ തന്നെയാണ്.

ചൂടും എരിവുമുള്ള ഭക്ഷണങ്ങള്‍ തടി കുറയ്ക്കാനുള്ള ഘടകങ്ങളാകുമെന്ന് തെളിഞ്ഞിട്ടുണ്ട്. ഇവ ശരീരത്തിലെ ഉപാപചയ പ്രവര്‍ത്തനങ്ങള്‍ ത്വരിതപ്പെടുത്തുന്നു. തടി കുറയ്ക്കാന്‍ സഹായിക്കുന്നു.

രാത്രി ഭക്ഷണത്തിന് മുന്‍പ് ഒരു കോപ്പ സൂപ്പാവാം. ആവശ്യത്തിനുള്ള പോഷകങ്ങള്‍ ലഭിക്കും. വിശപ്പു മാറും. അമിതമായി കഴിയ്ക്കുന്നത് കുറയ്ക്കുകയും ചെയ്യും.

അത്താഴം അരവയറോളം എന്ന പ്രമാണം തടി കുറയ്ക്കാനുതകും എന്ന കാര്യത്തില്‍ സംശയം വേണ്ട. കഴിയ്ക്കുന്നത് എന്താണെന്ന കാര്യവും പ്രധാനവും. കൊഴുപ്പുള്ള ഭക്ഷണങ്ങള്‍ അത്താഴത്തിന് ഒഴിവാക്കുകയാണ് ബുദ്ധി. ഇവ ദഹിക്കാന്‍ പ്രയാസമുണ്ടാകും. ഉറക്കത്തെ ബാധിക്കും. ഇവ രണ്ടും തടി കൂട്ടുന്ന ഘടകങ്ങള്‍ തന്നെയാണ്.

ജിമ്മില്‍ പോകാന്‍ നേരമില്ലെന്ന വിലപിക്കേണ്ട കാര്യമുണ്ടോ. ഇതില്ലാതെ തന്നെ ചെയ്യാവുന്ന വ്യായാമങ്ങള്‍ ധാരാളം. നടക്കുവാന്‍ കൂടുതല്‍ അവസരങ്ങളുണ്ടാക്കുക. കോണിപ്പടികള്‍ കയറാന്‍ ലിഫ്റ്റ് ഉപയോഗിക്കാതിരിക്കുക. വീട്ടമ്മമാര്‍ക്കാണെങ്കില്‍ വീട് അടിയ്ക്കുക, തുടയ്ക്കുക തുടങ്ങിയവ നല്ല വ്യായാമമാവും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.