ചോളം കഴിയ്ക്കുന്നില്ലേ?

ചോളം ധാരാളം നാരടങ്ങിയ ഒരു ഭക്ഷണമാണ്. ഇത് കഴിയ്ക്കുന്നത് ദഹനം എളുപ്പമാക്കും. മലബന്ധം, കുടലിനുണ്ടാകുന്ന ക്യാന്‍സര്‍ എന്നീ പ്രശ്‌നങ്ങളെ തടയാനും ചോളത്തിന് കഴിയും.

ധാരാളം ധാതുക്കളുടെ ശക്തികേന്ദ്രമെന്നു വേണമെങ്കില്‍ ചോളത്തെ വിളിയ്ക്കാം. ഇതില്‍ ആന്റി ഓക്‌സിഡന്റുകള്‍, മഗ്നീഷ്യം, അയേണ്‍, കോപ്പര്‍, ഫോസ്ഫറസ് തുടങ്ങിയവ അടങ്ങിയിട്ടുണ്ട്. ആരോഗ്യത്തിന് വളരെ പ്രധാനപ്പെട്ട ഘടകങ്ങളാണിവ.

ശരീരത്തിന് മാത്രമല്ലാ, സൗന്ദര്യത്തിനും ചോളം നല്ലതാണ്. ഇവയിലെ ആന്റി ഓക്‌സിഡന്റുകള്‍ ചര്‍മസൗന്ദര്യം വര്‍ദ്ധിപ്പിക്കും. ചെറുപ്പം നില നിര്‍ത്തും. കോണ്‍ ഓയില്‍ ചര്‍മത്തില്‍ പുരട്ടുന്നത് നല്ലതാണ്. ഇതിലെ ലിനോലെയിക് ആസിഡ് ചര്‍മത്തിന് തിളക്കം നല്‍കും. ചര്‍മത്തിലെ പാടുകള്‍ അകറ്റാന്‍ കോണ്‍ സ്റ്റാര്‍ച്ച് ഉപയോഗിക്കാറുണ്ട്.

ചോളത്തില്‍ ധാരാളം ഇരുമ്പടങ്ങിയിട്ടുണ്ട്. കൂടാതെ വൈറ്റമിന്‍ ബി, ഫോളിക് ആസിഡ് എന്നിവയും ഇവയിലുണ്ട്. ഇത് വിളര്‍ച്ച തടയാന്‍ സഹായിക്കും. ഫോളിക് ആസിഡ് ഗര്‍ഭസ്ഥ ശിശുവിന്റെ ആരോഗ്യത്തിന് പ്രധാനമാണ്. കുഞ്ഞിന് ആവശ്യമായ തൂക്കം ലഭിക്കാനും വിളര്‍ച്ച തടയാനും ചോളം സഹായിക്കും.

ഗര്‍ഭിണികള്‍ ചോളം കഴിയ്ക്കുന്നത് കുഞ്ഞിന്റെ മാത്രമല്ലാ, അമ്മയുടെ ആരോഗ്യത്തിനും നല്ലതാണ്. ഗര്‍ഭകാലത്തുണ്ടാകുന്ന മലബന്ധം കുറയ്ക്കാനും ഇത് സഹായിക്കും.

കൊളസ്‌ട്രോള്‍ കുറയ്ക്കാനും ചോളം നല്ലതാണ്. ഇതിലെ വൈറ്റമിന്‍ സി, കരോട്ടനോയ്ഡുകള്‍, ബയോഫ്‌ളേവനോയ്ഡുകള്‍ എന്നിവയാണ് എല്‍ഡിഎല്‍ കൊളസ്‌ട്രോള്‍ കുറയ്ക്കാനും എച്ച്ഡിഎല്‍ കൊളസ്‌ട്രോള്‍ കൂട്ടാനും സഹായിക്കുന്നത്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.